Google ຖືກຟ້ອງຂໍ້ຫາປະໝາດ ບໍ່ອັບເດດ Maps ຈົນເຮັດໃຫ້ຜູ້ຊາຍຊາວອາເມລິກາຂັບລົດຕົກຂົວເສຍຊີວິດ
Google ບໍລິສັດເຕັກໂນໂລຊີຍັກໃຫຍ່ ກໍາລັງຖືກຟ້ອງຮ້ອງດໍາເນີນຄະດີຂໍ້ຫາປະໝາດ ຫລັງຈາກຜູ້ຊາຍຄົນໜຶ່ງຂັບລົດຕາມຄໍາແນະນໍາຂອງ Google Maps ຈົນຕົກຂົວທີ່ເປ່ເພເສຍຫາຍນັບແຕ່ສິບປີກ່ອນ ລົງສູ່ແມ່ນໍ້າຈົນເສຍຊີວິດ.
ຄໍາຟ້ອງທີ່ຄອບຄົວຂອງຜູ້ຊາຍຄົນດັ່ງກ່າວຍື່ນຕໍ່ສານສູງເວກເຄົາຕີໃນວັນທີ 19 ກັນຍາ ລະບຸວ່າ: ທ້າວ ຟີລິບ ແພກສັນ ພະນັກງານຂາຍອຸປະກອນແພດ ອາຍຸ 47 ປີ ຈາກເມືອງຮິກເກີຣີ ລັດນອດແຄໂຣໄລນາ ຈົມນໍ້າເສຍຊີວິດໃນວັນທີ 30 ກັນຍາ 2022 ຫລັງຈາກລົດກະບະ Jeep Gladiator ຂອງລາວຕົກລົງນໍ້າ Snow Creek ໃນເມືອງຮິກເກີຣີ ລະຫວ່າງຂັບລົດເມືອເຮືອນຫລັງໄປຮ່ວມງານລ້ຽງວັນເກີດປີທີ 9 ຂອງລູກສາວ.
ທ້າວ ແພກສັນ ຂັບລົດຕາມ Google Maps ຂ້າມຂົວທີ່ເປ່ເພໃຊ້ບໍ່ໄດ້ນັບແຕ່ 9 ປີກ່ອນ ແລະ ບໍ່ເຄີຍໄດ້ຮັບການສ້ອມແປງ. ຂະນະທີ່ບໍ່ມີສິ່ງກີດຂວາງ ຫລື ປ້າຍສັນຍາລັກແຈ້ງເຕືອນຜູ້ຂັບຂີ່ເຖິງອັນຕະລາຍ ຈົນເຮັດໃຫ້ລົດຂອງລາວຕົກຈາກຖະໜົນທີ່ບໍ່ມີການປ້ອງກັນ ແລະ ຕົກລົງລຸ່ມປະມານ 20 ຟຸດ ກ່ອນທີ່ທະຫານຈະມາພົບສົບຂອງທ້າວ ແພກສັນ ທີ່ຕິດຢູ່ໃນລົດກະບະທີ່ຂວ້ຳ ແລະ ຈົມຢູ່ໃຕ້ນໍ້າບາງສ່ວນ.
ນອກຈາກ Google ແລ້ວ, ຄອບຄົວຂອງທ້າວ ແພກສັນ ຍັງຟ້ອງຮ້ອງບໍລິສັດບໍລິຫານຈັດການອະລັງຫາລິມະຊັບເອກະຊົນອີກຈໍານວນໜຶ່ງ ເຊິ່ງຮັບຜິດຊອບດິນທີ່ເກີດອຸປະຕິບັດ ແລະ ດິນອ້ອມຮອບ.
ໜ່ວຍລາດຕະເວນຂອງລັດນອດແຄໂຣໄລນາລະບຸວ່າ: ການເບິ່ງແຍງຮັກສາຂົວແຫ່ງນີ້ບໍ່ໄດ້ຢູ່ພາຍໃຕ້ຄວາມຮັບຜິດຊອບຂອງໜ່ວຍງານທ້ອງຖິ່ນ ແລະ ຂອງລັດ. ຂະນະທີ່ບໍລິສັດຜູ້ພັດທະນາຂົວແຫ່ງນີ້ໄດ້ປິດກິດຈະການໄປແລ້ວ.
ຄໍາຟ້ອງລະບຸອີກວ່າ: ໄລຍະຫລາຍປີຜ່ານມາ ມີຫລາຍຄົນພະຍາຍາມແຈ້ງໃຫ້ Google Maps ຮູ້ກ່ຽວກັບຂົວທີ່ເປ່ເພເສຍຫາຍແຫ່ງນີ້ ແລະ ຮຽກຮ້ອງໃຫ້ບໍລິສັດອັບເດດຂໍ້ມູນເສັ້ນທາງ. ນອກຈາກນີ້ ຄໍາຟ້ອງຍັງລວມບັນທຶກໂຕ້ຕອບອີເມລຈາກຊາວເມືອງຮິກເກີຣີອີກຄົນໜຶ່ງທີ່ເຄີຍໃຊ້ຟີເຈີ “ແນະນໍາ ແລະ ແກ້ໄຂ” (Suggest and Edit) ໃນ Maps ໃນເດືອນກັນຍາ 2020 ເພື່ອແຈ້ງເຕືອນ Google ວ່າ: ແຜນທີ່ຂອງບໍລິສັດໄດ້ບອກທາງຄົນຂັບລົດໄປໃນຂົວທີ່ເປ່ເພ, ກ່ອນ Google ຈະແຈ້ງຢືນຢັນທາງອີເມລໃນເດືອນພະຈິກ 2020 ວ່າ: ບໍລິສັດໄດ້ຮັບລາຍງານຂອງລາວແລ້ວ ແລະ ກໍາລັງກວດສອບການປ່ຽນແປງທີ່ແນະນໍາ, ແຕ່ຄໍາຟ້ອງລະບຸວ່າ: Google ບໍ່ໄດ້ດໍາເນີນງານໃດໆ.
ໂຄສົກຂອງ Google ເຊິ່ງມີສໍານັກງານໃຫຍ່ຢູ່ແຄລິຟໍເນຍ ຍັງບໍ່ອອກມາສະແດງຄວາມເຫັນກ່ຽວກັບການຟ້ອງຮ້ອງດັ່ງກ່າວ. ເຖິງຢ່າງໃດກໍດີ, ໃນຖະແຫລງການທີ່ສົ່ງເຖິງ Guardian ໂຄສົກຄົນໜຶ່ງຂອງ Google ກ່າວວ່າ: “ພວກເຮົາເສຍໃຈຢ່າງສຸດຊຶ້ງຕໍ່ຄອບຄົວທ້າວ ແພກສັນ, ເປົ້າໝາຍຂອງພວກເຮົາຄືການໃຫ້ຂໍ້ມູນເສັ້ນທາງທີ່ຖືກຕ້ອງໃນ Maps ແລະ ພວກເຮົາກໍາລັງກວດສອບຄະດີຟ້ອງຮ້ອງນີ້”.
ແຕ່ທ້າວ ຟີລິບ ແພກສັນ ບໍ່ແມ່ນຄົນທໍາອິດທີ່ເສຍຊີວິດຈາກອຸປະຕິບັດທີ່ກ່ຽວຂ້ອງກັບ GPS.
ໃນປີ 2020 ຊາວຣັດເຊຍ ອາຍຸ 18 ປີ ຕິດຢູ່ໃນລົດເປັນເວລາໜຶ່ງອາທິດຈົນແຂງຕາຍ ຫລັງຈາກລາວ ແລະ ໝູ່ໃຊ້ Google Maps ເຊິ່ງບອກທາງລາວໄປໃນຖະໜົນກະດູກ (Road of Bones) ໃນໄຊບີເຣຍ ທີ່ໄດ້ຊື່ວ່າເປັນຖະໜົນທີ່ໜາວເຢັນທີ່ສຸດໃນໂລກ. ກ່ອນໜ້ານັ້ນໃນປີ 2019 The Straits Times ລາຍງານວ່າ: ຄົນຂັບລົດບັນທຸກໃນນະຄອນຫລວງຈາກາຕາ ປະເທດອິນໂດເນເຊຍ ຂັບລົດຕົກເຂົາຫລັງຈາກຂັບລົດຕາມ Google Maps ໄປຕາມເສັ້ນທາງທີ່ກໍານົດໃຫ້ໃຊ້ສະເພາະລົດຈັກເທົ່ານັ້ນ ແລະ ໃນປີ 2015 ນາງ ໂຊຣາ ຮຸສເຊນ ອາຍຸ 51 ປີ ເສຍຊີວິດຈາກອຸປະຕິບັດທາງລົດໃນລັດອິນເດຍນາ ຫລັງຈາກຜົວຂອງນາງຂັບລົດຕາມ GPS ທີ່ຕິດຕັ້ງໃນລົດ Nissan Sentra ຂອງລາວ ໄປໃນຖະໜົນທີ່ບໍ່ມີປ້າຍບອກທາງຈົນນໍາໄປສູ່ຂົວທີ່ເປ່ເພເສຍຫາຍ, ທ້າວ ອິບຕິຄາ ຮຸສເຊນ ຜົວຂອງນາງ ຟ້ອງຮ້ອງລັດອິນເດຍນາຂໍ້ຫາບໍ່ສະແດງເຄື່ອງກີດຂວາງເຕືອນ. ຕາມລາຍງານຂອງໜັງສືພິມ Chicago Tribune.
ອ້າງອີງ:
- www.theguardian.com/technology/2023/sep/20/google-maps-collapsed-bridge-negligence-lawsuit
- https://fortune.com/2023/09/20/google-maps-lawsuit-collapsed-bridge-driver-death/
