ສ.ເກົາຫລີ ຜ່ານກົດໝາຍປົກປ້ອງຄູບໍ່ໃຫ້ຖືກຜູ້ປົກຄອງຄຸກຄາມ ຫລັງປະສົບບັນຫາການປະທ້ວງໜັກ
ລັດຖະບານ ສ.ເກົາຫລີ ມີມະຕິຜ່ານກົດໝາຍສະບັບໃໝ່ຂອງປະເທດ ເພື່ອປົກປ້ອງຄູຈາກບັນດາຜູ້ປົກຄອງທີ່ມີພຶດຕິກໍາບໍ່ເໝາະສົມ ຫລັງຈາກຜະເຊີນກະແສປະທ້ວງຕໍ່ເນື່ອງເຖິງ 9 ອາທິດ.
ໂດຍກ່ອນໜ້ານີ້, ບັນດາຄູຊາວ ສ.ເກົາຫລີ ເຄີຍນັດພັກວຽກເພື່ອຮ່ວມເດີນຂະບວນປະທ້ວງໃຫຍ່ ຢູ່ບໍລິເວນໜ້າອາຄານລັດຖະສະພາໃນນະຄອນຫລວງເຊອຸນ ເພື່ອຮຽກຮ້ອງການຄຸ້ມຄອງສິດຂອງຄູ ແລະ ຕໍ່ຕ້ານການກະທໍາຄຸກຄາມ ແລະ ການປະຕິບັດຢ່າງໂຫດຮ້າຍຈາກບັນດາພໍ່ແມ່ຜູ້ປົກຄອງ ລວມທັງນັກຮຽນ ພາຍຫລັງເກີດກໍລະນີຄູຢ່າງໜ້ອຍ 3 ຄົນຂ້າຕົວຕາຍ ນັບແຕ່ເດືອນກໍລະກົດຜ່ານມາ.
ໃນຈໍານວນຄູທີ່ຂ້າຕົວຕາຍພົບວ່າ 1 ຄົນເປັນຄູສາວຢູ່ໂຮງຮຽນແຫ່ງໜຶ່ງໃນນະຄອນຫລວງເຊອຸນ ເຊິ່ງຕັດສິນໃຈຈົບຊີວິດຫລັງຜະເຊີນກໍລະນີຄວາມຮຸນແຮງ ແລະ ຂໍ້ຂັດແຍ່ງກັບກຸ່ມນັກຮຽນໃນໂຮງຮຽນ ເຊິ່ງສົ່ງຜົນໃຫ້ເກີດກະແສຄວາມບໍ່ພໍໃຈກ່ຽວກັບການຄຸກຄາມ ແລະ ການປະຕິບັດທີ່ບໍ່ດີຕໍ່ຄູ ເຮັດໃຫ້ມີການນັດພັກວຽກເພື່ອເດີນຂະບວນປະທ້ວງ.
ຄູຫລາຍຄົນກ່າວວ່າ: ພວກເຂົາເຄີຍມີປະສົບການຖືກຜູ້ປົກຄອງຄຸກຄາມຫລາຍເທື່ອເຊັ່ນ: ເມື່ອມີເຮືອງຜິດໃຈກັນເກີດຂຶ້ນກໍລາຍງານຢ່າງມຸ້ງຮ້າຍຕໍ່ໂຮງຮຽນວ່າຄູທຳຮ້າຍເດັກ ເພື່ອຫວັງຈະໃຫ້ຄູຖືກໄລ່ອອກຈາກວຽກ, ບາງເທື່ອຜູ້ປົກຄອງກໍລາຍງານກັບໂຮງຮຽນວ່າຄູກັກຂັງໜ່ວງໜ່ຽວ ທັງທີ່ເດັກມີພຶດຕິກໍາໃຊ້ຄວາມຮຸນແຮງ ຫລື ຖືກວິຈານເລື່ອງໃຊ້ຄໍາເວົ້າຮ້າຍດ່ານັກຮຽນ ເຊິ່ງຄູເບິ່ງວ່າການກະທໍາຂອງຜູ້ປົກຄອງໃນລັກສະນະນີ້ເຮັດໃຫ້ພວກເຂົາສອນເດັກໃຫ້ຢູ່ໃນລະບຽບວິໄນບໍ່ໄດ້.
ສໍາລັບກົດໝາຍສະບັບໃໝ່ນີ້ມີຊື່ວ່າ: ຮ່າງກົດໝາຍຟື້ນຟູສິດຂອງຄູ (Teacher Rights Restoration Bill ໂດຍພາຍໃຕ້ບົດບັນຍັດນີ້ ເມື່ອຄູຖືກລາຍງານເລື່ອງພຶດຕິກໍາທີ່ມີສ່ວນກ່ຽວຂ້ອງກັບການທາລຸນເດັກ ຈະບໍ່ມີການໄລ່ອອກທັນທີ, ແຕ່ທາງໂຮງຮຽນ ແລະ ໜ່ວຍງານທີ່ກ່ຽວຂ້ອງຈະຕ້ອງມີການສອບສວນ ແລະ ກວດຫາຫລັກຖານເພີ່ມຕື່ມກ່ອນຈຶ່ງຈະມີການດໍາເນີນຕໍ່ໄປ. ນອກຈາກນີ້ ຈະມີການໃຫ້ເງິນຊ່ວຍເຫລືອຄູທີ່ຕ້ອງຕໍ່ສູ້ຄະດີ ແລະ ຄູລະດັບຫົວໜ້າຝ່າຍຈະຕ້ອງມີຄວາມຮັບຜິດຊອບເພີ່ມຂຶ້ນໃນການປົກປ້ອງຄູໃນການເບິ່ງແຍງຂອງຕົນ.
ສ່ວນສະມາພັນຄູແຫ່ງ ສ.ເກົາຫລີ ຍິນດີກັບກົດໝາຍໃໝ່ ໂດຍກ່າວວ່າກົດໝາຍສະບັບນີ້ຈະຊ່ວຍ “ຂະຫຍາຍສິດໃນການສອນໄດ້ເພີ່ມຂຶ້ນ ລວມທັງປົກປ້ອງສິດໃນການຮຽນຮູ້ຂອງນັກຮຽນ” ລວມທັງກ່າວຂອບໃຈຕໍ່ບັນດາຄູທີ່ຮ່ວມປະທ້ວງໃນຫລາຍອາທິດຜ່ານມາ ຈົນເຮັດໃຫ້ການຮຽກຮ້ອງຄັ້ງນີ້ປະສົບຜົນສໍາເລັດ.
ອ້າງອີງ:
