ເຈົ້າໜ້າທີ່ໄທ ຢຶດຢາກັນຍຸງ 2 ຍີ່ຫໍ້ ທີ່ມີການປະສົມສານເຄມີອັນຕະລາຍ ເມື່ອດົມເຂົ້າໄປເຮັດໃຫ້ມີອາການເຈັບຫົວ ຊັກ ໝົດສະຕິ
ວັນທີ 22 ກັນຍາ 2023, ກອງບັນຊາການຕຳຫລວດສອບສວນໄທ ສົມທົບກັບເລຂາທິການຄະນະກຳມະການອາຫານ ແລະ ຢາ ຖະແຫລງ ຜົນການກວດຄົ້ນໂຮງງານຜະລິດຢາຈູດກັນຍຸງເຖື່ອນ ແລະ ຈຸດກະຈາຍສິນຄ້າ ອີກ 3 ຈັງຫວັດ ພ້ອມຢຶດຂອງກາງທີ່ມີສານເຄມີອັນຕະລາຍ 227,000 ກັບ, ເຊິ່ງກ່ອນໜ້ານີ້ ຕຳຫລວດພົບຢາກັນຍຸງ 2 ຍີ່ຫໍ້ທີ່ບໍ່ມີສະຫລາກເປັນພາສາໄທ, ບໍ່ມີເລກຜະລິດຕະພັນທີ່ມີການໂຄສະນາຂາຍ ຕາມສື່ອອນລາຍ ແລະ ນຳມາວາງຈຳໜ່າຍຕາມຮ້ານຄ້າຂາຍຍ່ອຍ ໃນລາຄາທີ່ຖືກກວ່າທ້ອງຕະຫລາດ ຈົນເປັນທີ່ນິຍົມຂອງປະຊາຊົນທົ່ວໄປ.
ຈາກການກວດສອບ ພົບວ່າ ຂອງກາງມີສານເຄມີໃນກຸ່ມ ໄພຣີທຣອຍ Pyrethriods, ເມເພີຟລູທຣີນ Meperfluthrin,ແລະ ໄດເມີຟລູທຣິນ Dimefluthrin ເຊິ່ງເປັນພິດຕໍ່ຄົນ ແລະ ສັດ, ຫາກດົມຄວັນເຂົ້າໄປໃນປະລິມານຫລາຍອາດເຮັດໃຫ້ ມຶນງົງ, ເຈັບຫົວ, ປວດຮາກ, ອ່ອນເພຍ, ຊັກ ຫລື ໝົດສະຕິໄດ້ ຈາກນັ້ນຈຶ່ງເຂົ້້າກວດຄົ້ນໂຮງງານຜະລິດໃນ ຈັງຫວັດສະໝຸດສາຄອນ ແລະ ຈຸດກະຈາຍສິນຄ້າ ຄື ຈັງຫວັດ ໄຊນາດ, ອ່າງທອງ ແລະ ຈັງຫວັດສຸພັນບູຣີ.
ຈາກການສອບສວນເຈົ້າຂອງໂຮງງານ ຮູ້ວ່າ: ໄດ້ສັ່ງຊື້ຢາຊະນິດດັ່ງກ່າວມາຈາກປະເທດຈີນ ນຳເຂົ້າມາເພື່ອປະກອບກັບສານເຄມີທີ່ໄລ່ຍຸງແທ້, ສານເຄມີທີ່ໃຊ້ອົບຢາກັນຍຸງນັ້ນບໍ່ໄດ້ຂໍອະນຸຍາດນຳເຂົ້າ ແລະ ຜະລິດເພື່ອຈຳໜ່າຍ ກ່ອນນຳມາບັນຈຸໃນກັບຜະລິດຕະພັນແລ້ວສົ່ງຂາຍໃຫ້ຮ້ານຄ້າຕ່າງໆທົ່ວປະເທດ.
ເຈົ້າໜ້າທີ່ຈຶ່ງແຈ້ງຂໍ້ກ່າວຫາຕໍ່ໂຮງງານຜູ້ຜະລິດໃນຂໍ້ຫາຄອບຄອງວັດຖຸອັນຕະລາຍໂດຍບໍ່ໄດ້ຮັບອະນຸຍາດ ແລະ ຜະລິດວັດຖຸອັນຕະລາຍທີ່ບໍ່ໄດ້ຂຶ້ນທະບຽນ, ສ່ວນ ຮ້ານຄ້າ 3 ແຫ່ງນັ້ນ ຈະພິຈາລະນາແຈ້ງຂໍ້ຫາຖານຄອບຄອງວັດຖຸອັນຕະລາຍ.
ອ້າງອີງຈາກ: https://www.khaosod.co.th/breaking-news/news_7879237
