ເຈົ້າຄອງນະຄອນຫລວງວຽງຈັນ ເນັ້ນໃຫ້ຕຳຫລວດທ່ອງທ່ຽວ ແກ້ໄຂປາກົດການຫຍໍ້ທໍ້ຕ່າງໆ ທີ່ຈະສົ່ງຜົນກະທົບຕໍ່ການທ່ອງທ່ຽວ

ວັນທີ 21 ກັນຍາ 2023 ກອງປະຊຸມພົບປະ ເຮັດວຽກກັບເຈົ້າໜ້າທີ່ຕຳຫຼວດທ່ອງທ່ຽວປະຈຳຢູ່ແຫຼ່ງທ່ອງທ່ຽວ ໃນ ນວ ຂອງທ່ານ ອາດສະພັງທອງ ສີພັນດອນ ເຈົ້າຄອງ ນວ, ມີທ່ານ ພົນຈັດຕະຫວາ ບົວພັນ ຟອງມະນີ ຫົວໜ້າກອງບັນຊາການ ປກສ ນວ .

ໃນໄລຍະຜ່ານມາ ຫົວໜ່ວຍທຸລະກິດບໍລິການພັກແຮມ ຢູ່ ນະຄອນຫຼວງວຽງຈັນ (ນວ) ມີການຂະຫຍາຍຕົວຢ່າງໄວ ເຊິ່ງມີການກໍ່ສ້າງ ແລະ ເປີດດຳເນີນທຸລະກິດເພີ່ມຂື້ນ ຍ້ອນ ນວ ໄດ້ມີການພັດທະນາເສດຖະກິດ-ສັງຄົມ ນັບມື້ນັບຂະຫຍາຍຕົວຢ່າງບໍ່ຢຸດຢັ້ງ ເພາະສະນັ້ນ ການຂະຫຍາຍຕົວຂອງໂຮງແຮມ ເຮືອນພັກ ແລະ ອາພາດເມັ້ນ ກໍໄດ້ມີການຂະຫຍາຍຕົວຂຶ້ນຕາມການພັດທະນາເສດຖະກິດ-ສັງຄົມຂອງ ນວ ປັດຈຸບັນ ໂຮງແຮມມີ 288 ຫົວໜ່ວຍ ເຮືອນພັກ 203 ຫົວໜ່ວຍ ອາພາດເມັ້ນ 42 ຫົວໜ່ວຍ ແຕ່ຄຽງຄູ່ກັບການຂະຫຍາຍຕົວ ກໍມີບາງບັນຫາທີ່ເກີດຂຶ້ນຕາມມາເປັນຕົ້ນ ການເກັບກຳຈົດກ່າຍແຂກເຂົ້າພັກເຊົາ ຈຳນວນໜຶ່ງບໍ່ຄົບຖ້ວນ ການໂອນກໍາມະສິດໃຫ້ເຊົ່າບໍ່ແຈ້ງຕໍ່ພາກສ່ວນກ່ຽວຂ້ອງ ການເປີດບໍລິການຍັງບໍ່ໄດ້ຮັບອະນຸຍາດດໍາເນີນທຸລະກິດ ມີການກໍ່ອາລະວາດຕີກັນ ບໍ່ຈ່າຍຄ່າພັກເຊົາ ມີການມົ້ວສຸມຢາເສບຕິດ ຫຼີ້ນການພະນັນ ໃຫ້ຄົນບໍ່ດີເຄື່ອນໄຫວທີ່ຕັ້ງຄໍເຊັນເຕີ້ ບາງຫົວໜ່ວຍກໍບໍ່ລາຍງານສະພາບທີ່ເກີດຂຶ້ນ ບໍ່ໃຫ້ຄວາມຮວ່ມມືກັບເຈົ້າໜ້າທີ່ກ່ຽວຂ້ອງ ແລະ ອື່ນໆ.

ເພື່ອເປັນທິດທາງໃຫ້ແກ່ການຈັດຕັ້ງປະຕິບັດຂອງເຈົ້າໜ້າທີ່ຕໍາຫຼວດທ່ອງທ່ຽວ ທີ່ປະຈໍາຢູ່ແຕ່ລະແຫຼ່ງທ່ອງທ່ຽວ ທ່ານ ອາດສະພັງທອງ ສີພັນດອນ ເຈົ້າຄອງ ນວ ໄດ້ເນັ້ນບາງບັນຫາຄື: ສືບຕໍ່ຮັບປະກັນເຮັດໃຫ້ 6 ແຫຼ່ງທ່ອງທ່ຽວ ພາຍໃນເທສະບານ ນວ ມີຄວາມສະຫງົບ ເປັນລະບຽບຮຽບຮ້ອຍຢ່າງໜັກແໜ້ນ ແລະ ເອົາໃຈໃສ່ແກ້ໄຂປາກົດການຫຍໍ້ທໍ້ໃນກຸ່ມນັກທ່ອງທ່ຽວ ນັກທຸລະກິດ ຜູ້ປະກອບການ ຕ່າງປະເທດທີ່ມາທ່ອງທ່ຽວ ແລະ ດໍາເນີນກິດຈະການຢູ່ ນວ ໃຫ້ເຂົ້າສູ່ລະບຽບການ ຂອງສປປ ລາວ ຂອງພວກເຮົາ ໃຫ້ຂື້ນແຜນລົງກວດກາ ເກັບກຳສະຖິຕິ ເຮັດບົດບັນທຶກວຽກງານປ້ອງກັນຄວາມສະຫງົບ  ກັບຫົວໜ່ວຍທຸລະກິດບໍລິການດ້ານການທ່ອງທ່ຽວ ຢູ່ 4 ເມືອງໃນ ໃຫ້ສໍາເລັດໃນປີ 2023 ສືບຕໍ່ສົມທົບກັບ ປກສ ເມືອງ ກົມຕຳຫຼວດທ່ອງທ່ຽວ ລົງຕິດຕາມ ກວດກາບັນດາຫົວໜ່ວຍທຸລະກິດ ທີ່ມີຫາງສຽງຈາກສັງຄົມ ຈຳນວນ 55 ຫົວໜ່ວຍ ທີ່ເຄື່ອນໄຫວຜິດຕໍ່ລະບຽບກົດໝາຍ ເປັນຕົ້ນມົ້ວສຸມສິ່ງເສບຕິດ ຄ້າປະເວນີ ອາລະວາດຕີກັນ ໃຊ້ອາວຸດເສິກຍິງກັນ ມອບໃຫ້ເຈົ້າໜ້າທີ່ ປກສ ເມືອງ ແລະ ຫ້ອງວິຊາສະເພາະທີ່ກ່ຽວຂ້ອງດຳເນີນປະຕິບັດຕາມກົດໝາຍ.

ສໍາລັບ ທຸລະກິດທີ່ບໍ່ມີໃບອະນຸຍາດດໍາເນີນທຸລະກິດ ຖ້າຫາກມີການກວດກາພົບເຫັນ ມອບໃຫ້ພະແນກ ຖວທ ນວ ສາມາດປະຕິບັດມາດຕະການຄື: ສຶກສາອົບຮົມກ່າວເຕືອນ ລົງວິໄນ ປັບໄໝ ຕາມທີ່ໄດ້ກໍານົດໃນ ມາດຕາ 59 60 61 ຂອງຂໍ້ຕົກລົງວ່າດ້ວຍຮ້ານອາຫານ ແລະ ໝວດທີ 5 ມາດຕາ 28 ຂອງດໍາລັດ 315/ລບ ວ່າດ້ວຍການບັນເທີງ ໃຫ້ຕຳຫຼວດທ່ອງທ່ຽວ ສົມທົບກັບ ພະແນກ ຖວທ ນວ ດໍາເນີນການເກັບກໍາຂໍ້ມູນລະອຽດສະຖິຕິ ສະຖານທີ່ພັກແຮມ ຮ້ານອາຫານ ຮ້ານກິນດື່ມ ຮ້ານບັນເທີງ ແລະ ບໍລິສັດນໍາທ່ຽວ ຄືນໃໝ່ໃນ 9 ຕົວເມືອງ ທີ່ຂຶ້ນກັບ ນວ ເພື່ອໃຫ້ມີຕົວເລກສະຖິຕິທີ່ຊັດເຈນ ແລະ ເປັນບ່ອນອີງໃນການຂື້ນແຜນລົງຕິດຕາມ ກວດກາ ແລະ ທັງເປັນຂໍ້ມູນລາຍງານສະພາບການຂະຫຍາຍຕົວຂອງວຽກງານທ່ອງທ່ຽວ ຢູ່ ນວ ເປັນແຕ່ລະໄລຍະ.