ແຂວງສະຫວັນນະເຂດ ແລະ ຈັງຫວັດມຸກດາຫານ ຮ່ວມມືສົ່ງເສີມດ້ານສາທາລະນະສຸກລະດັບທ້ອງຖິ່ນ

ວັນທີ 18 ກັນຍາ 2023, ພະແນກສາທາລະນະສຸກແຂວງສະຫວັນນະເຂດ ສປປ ລາວ ແລະ ສໍານັກງານສາທາລະນະສຸກ ຈັງຫວັດມຸກດາຫານ ແຫ່ງ ຣາຊະອານາຈັກໄທ ໄດ້ເຊັນບົດບັນທຶກຄວາມເຂົ້າໃຈ ສະບັບທີ 2 ປະຈໍາປີ 2023 ເລື່ອງການຮ່ວມມືດ້ານສາທາລະນະສຸກລະດັບທ້ອງຖິ່ນ, ໂດຍແມ່ນທ່ານ ດຣ ແສງດາວ ສີດາໄລ ຫົວໜ້າພະແນກສາທາລະນະສຸກ ແຂວງສະຫວັນນະເຂດ ກັບ ທ່ານ ນາຍແພດ ມານົບ ສະລາດທັນຍະກິດ ນາຍແພດ ສາທາລະນະສຸກ ຈັງຫວັດມຸກດາຫານ.

ເພື່ອເປັນການສົ່ງເສີມສະໜັບສະໜູນໃຫ້ການຮ່ວມມືໃນວຽກງານສາທາລະນະສຸກ ແລະ ວຽກງານເຝົ້າລະວັງ, ປ້ອງກັນ ແລະ ຄວບຄຸມພະຍາດຕິດຕໍ່ລະຫວ່າງທີ່ມີຢູ່ໃນປັດຈຸບັນເປັນໄປຢ່າງຕໍ່ເນື່ອງ, ມີປະສິດທິພາບ, ເປັນຮູບປະທໍາສາມາດນໍາໄປສູ່ການປະຕິບັດທີ່ແທ້ຈິງໂດຍໜ່ວຍງານກ່ຽວຂ້ອງ ເພື່ອສົ່ງເສີມຄວາມສໍາພັນ ແລະ ມິດຕະພາບອັນດີລະຫວ່າງໜ່ວຍງານ ແລະ ບຸກຄະລາກອນ ທີ່ກ່ຽວຂ້ອງ ແລະ ປະຊາຊົນທັງສອງຝ່າຍ ສະຫວັນນະເຂດ ແລະ ຈັງຫວັດມຸກດາຫານໃຫ້ມີຄວາມຍືນຍົງ.