ປກສ ແຂວງຄຳມ່ວນ ນຳຕົວຜູ້ໂພສກ່າວຫາວ່າ ດຣ ໃນຄຣິນິກ ໄດ້ລ່ວງລະເມີດຄວາມເປັນ ສ່ວນຕົວຂອງຕົນ ມາສຶກສາອົບຮົມ

ເມື່ອຮັບຮູ້ແນວນັ້ນ ຈຶ່ງເກີດຄວາມບໍ່ພໍໃຈ ແລະ ໄດ້ຂຽນຂໍ້ຄວາມໂພສລົງ ເຟສບຸກສ່ວນຕົວອອກຊື່ PaNick Zoulixok ວ່າ: ມີໜູ່ຂອງຜູ້ກ່ຽວໄດ້ໄປກວດພະຍາດຢູ່ຄລີນິກແຫ່ງດັ່ງກ່າວ ແລ້ວໄດ້ເວົ້າວ່າ: ດ໋ອກເຕີຢູ່ຄລີນິກແຫ່ງນັ້ນໄດ້ລ່ວງລະເມີດສິດສ່ວນຕົວຂອງໜູ່ຕົນເອງ. ເຮັດໃຫ້ມີຜູ້ຄົນໃນສື່ສັງຄົມອອນລາຍ ເຂົ້າໄປເບິ່ງ ແລະ ເກີດຄວາມສົນໃຈໃນເລື່ອງຕ່າງໆທີ່ຕົນເອງໄດ້ໂພສ໌ ລົງໄປນັ້ນ. ຈົນເຮັດໃຫ້ສັງຄົມເກີດມີຄວາມບໍ່ສະຫງົບ. ຕໍ່ມາໄດ້ມີເຟສບຸກຂອງກຸ່ມຄົນບໍ່ຫວັງດີ ໄດ້ນຳໄປເຜີຍແຜ່ ແລະ ໄດ້ອອກຊື່ວ່າ ເປັນຄລີນິກ ຂອງ ດຣ ແສງຈັນ ຈຶ່ງເຮັດໃຫ້ຄລີນິກດັ່ງກ່າວເສື່ອມເສຍ ແລະ ຂາດຄວາມເຊື່ອໝັ້ນຕໍ່ສັງຄົມກໍຄືຜູ້ມາຮັບການບໍລິການປິ່ນປົວ.

ຈາກນັ້ນເຈົ້າໜ້າທີ່ພະແນກຕຳຫລວດສະກັດກັ້ນ ແລະ ຕ້ານການຄ້າມະນຸດ ປກສ ແຂວງຄຳມວ່ນ ຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງລົງເກັບກຳຂໍ້ມູນເຫັນວ່າບໍ່ມີມູນຄວາມຈິງ ແລະ ໄດ້ເອີ້ນ ນາງ ປານິກ ຜູ້ນຳໃຊ້ເຟສບຸກອອກຊື່ PaNick Zoulixok ມາໃຫ້ຂໍ້ມູນຜ່ານການເກັບກຳຂໍ້ມູນລະອຽດແລ້ວເຫັນວ່າ: ນາງ ປານິກ ແມ່ນໄດ້ໂພສ໌ ເລື່ອງດັ່ງກ່າວ ຜ່ານສື່ອອນລາຍແທ້, ແຕ່ຜູ້ກ່ຽວບໍ່ມີເຈດຕະນາອອກຊື່ນາມ ຫລື ໃສ່ຮ້າຍປ້າຍສີ ຄລີນິກຂອງຜູ້ໃດ, ຕໍ່ການກະທຳຂອງຜູ້ກ່ຽວຈຶ່ງເຮັດໃຫ້ນາງ ປານິກ ຮູ້ສຶກຜິດ ແລະ ກິນແໜງແຄງໃຈ ໃນການກະທຳຂອງຕົນທີ່ໄດ້ກະທຳລົງໄປນັ້ນ.

ສະນັ້ນ ເຈົ້າໜ້າທີ່ ປກສ ແຂວງຄຳມ່ວນຈຶ່ງ ໄດ້ນຳເອົາຜູ້ກ່ຽວໄປສຶກສາອົບຮົມເພື່ອບໍ່ໃຫ້ມີການກະທຳເຊັ່ນນີ້ອີກ, ຊຶ່ງຜູ້ກ່ຽວຍອມຮັບຜິດ ແລະ ໄດ້ຂໍໂທດຕໍ່ສັງຄົມ ຜ່ານສື່ອອນລາຍ ທີ່ໄດ້ເຮັດໃຫ້ພໍ່ແມ່ປະຊາຊົນທຸກຊັ້ນຄົນເກີດຄວາມເຂົ້າໃຈຜິດຕໍ່ຄລີນິກດັ່ງກ່າວ.