ຖືກຕັດແຂນແລະຂາ ຫລັງຕິດເຊື້ອແບັກທີເຣຍ ຍ້ອນກິນອາຫານທະເລດິບ ຫລື ປຸງແຕ່ງບໍ່ສຸກ
ສຳນັກຂ່າວຕ່າງປະເທດ AFP ລາຍງານຈາກເມືອງຊານໂຮເຊ ລັດແຄລິຟໍເນຍ ສະຫະລັດອາເມຣິກາ ວັນທີ 18 ກັນຍາ 2023 ວ່າ: ນາງລໍຣາ ອາຍຸ 40 ປີ ເຂົ້າຜ່າຕັດສຸກເສີນພາຍຫລັງນອນປິ່ນປົວຢູ່ໃນໂຮງໝໍມາດົນກວ່າ 1 ເດືອນ ຍ້ອນພະຍາດຂອງນາງ ຈົນທີມແພດຕ້ອງຕັດສິນໃຈຕັດແຂນຂາທັງໝົດ.
ຕາມຂໍ້ມູນທີ່ໝູ່ຂອງລາວໃຫ້ຮູ້ວ່າ: ນາງລໍຣາໄດ້ລົ້ມປ່ວຍເປັນເວລາຫລາຍມື້ ຫລັງຈາກທີ່ນາງກິນປາດິບ ທີ່ຊື້ມາຈາກຕະຫລາດໃນທ້ອງຖິ່ນເມື່ອທ້າຍເດືອນກໍລະກົດຜ່ານມາ. ຕ້ອງໄດ້ໃຊ້ເຄື່ອງຊ່ວຍຫາຍ ໃຈຕະຫລອດເວລາ, ນິ້ວມື, ນິ້ວຕີນເປັນສີດຳ, ມີອາການຕິດເຊື້ອໃນກະແສເລືອດຢ່າງຮຸນແຮງ ແລະ ເກີດພາວະໝາກໄຂ່ຫລັງຫລົ້ມເຫລວ, ເຊິ່ງການຕິດເຊື້ອດັ່ງກ່າວເກີດຈາກເຊື້ອ ວິບຣິໂອ ວັລນິຟິຄັສ ເຊິ່ງເປັນເຊື້ອ ແບັກທີເຣຍ ທີ່ສູນຄວບຄຸມ ແລະ ປ້ອງກັນພະຍາດ ສະຫະລັດ ປະກາດເຕືອນໃນວັນທີ 1 ກັນຍາ 2023 .
ເຊື້ອແບັກທີເຣຍດັ່ງກ່າວເກີດຈາກການກິນອາຫານທະເລທີ່ດິບ, ປຸງແຕ່ງບໍ່ສຸກ ຫລື ຈາກບາດແຜທີ່ສຳຜັດກັບນ້ຳທະເລ. ປັດຈຸບັນ ໃນແຕ່ລະປີມີລາຍງານວ່າ ຜູ້ຕິດເຊື້ອຈາກພະຍາດດັ່ງກ່າວປະມານ 150-200 ຄົນ ແລະ ຜູ້ຕິດເຊື້ອປະມານ 20% ເສຍຊີວິດ.
ອ້າງອີງຈາກ: https://www.dailynews.co.th/news/2727462/
