ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ມະຫາວິທະຍາໄລ ກວາງຊີ ແຫ່ງ ສປ ຈີນ ສືບຕໍ່ການຮ່ວມມືດ້ານກົດໝາຍ ແລະ ນິຕິກໍາ

ວັນທີ 16 ກັນຍາ 2023, ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມຄະນະ ໄດ້ເຂົ້າພົບປະ ທ່ານ ຮັນ ລິນໄຮ ອະທິການບໍດີ ມະຫາວິທະຍາໄລກວາງຊີ ເເຫ່ງ ສປ ຈີນ ພ້ອມຄະນະ ຕາມການເຊື້ອເຊີນ ແລະ ຕ້ອນຮັບອັນອົບອຸ່ນ, ທັງເປັນການຈັດຕັ້ງປະຕິບັດຕາມການຕົກລົງຂອງສອງພັກ ແລະ ສອງລັດ ກ່ຽວກັບ ການສ້າງຄູ່ຮ່ວມຊະຕາກຳ ລາວ-ຈີນ, ຈີນ-ລາວ ຮ່ວມອຸດົມການສັງຄົມນິຍົມ ຕາມທິດໝັ້ນຄົງ-ຍາວນານ ແລະ ສີ່ດີ, ໂດຍສະເພາະ ອົງການໄອຍະການປະຊາຊົນ ແຫ່ງ ສປປ ລາວ ແລະ ມະຫາວິທະຍາໄລກວາງຊີ ເເຫ່ງ ສປ ຈີນ ທີ່ນັບມື້ແໜ້ນແຟ້ນ ແລະ ກ້າວສູ່ລວງເລິກ ໃນການກໍ່ສ້າງ ແລະ ບໍາລຸງພະນັກງານໄອຍະການ, ທຶນການສຶກສາ ແລະ ພື້ນຖານວັດຖຸເຕັກນິກ.

ໂອກາດພົບປະຄັ້ງນີ້, ຄະນະຜູ້ເເທນສອງຝ່າຍໄດ້ລົງນາມບົດບັນທຶກຊ່ວຍຈຳທີ່ສະແດງໃຫ້ເຫັນເຖິງໄມຕີຈິດມິດຕະພາບອັນດີ ຊຶ່ງມີເນື້ອໃນ ກ່ຽວກັບການແລກປ່ຽນຄະນະຜູ້ແທນ; ການຝຶກອົບຮົມໃຫ້ພະນັກງານອົງການໄອຍະການຂອງ ສປປ ລາວ; ການສຶກສາລະດັບປະລິນຍາຕີ, ປະລິນຍາໂທ ແລະ ປະລິນຍາເອກ; ແລະ  ການແລກປ່ຽນຂໍ້ມູນເອກະສານກົດໝາຍ ແລະ ນິຕິກໍາ.