ຈຸດອ່ອນ ແລະ ຂໍ້ຄົງຄ້າງ ທີ່ພະນັກງານ ກະຊວງແຮງງານ ແລະ ສະຫວັດດີການສັງຄົມ ຕ້ອງເອົາໃຈໃສ່ແກ້ໄຂໃນຕໍ່ໜ້າ

ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດກອງປະຊຸມເຊື່ອມຊຶມຜົນສຳເລັດຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງ ຮສສ ສະໄໝທີ XI ຂຶ້ນໃນວັນທີ 15 ກັນຍາ 2023 ໂດຍການເປັນປະທານຂອງ ທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ.

ທ່ານນາງ ໃບຄຳ ຂັດທິຍະ ໄດ້ຂຶ້ນຜ່ານບົດຄຳເຫັນໂອ້ລົມຂອງ ທ່ານນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ຕໍ່ກອງປະຊຸມຄົບຄະນະກາງສະໄໝ ຂອງຄະນະບໍລິຫານພັກກະຊວງ ຮສສ ສະໄໝທີ XI ວ່າ: ສິ່ງທີ່ກ່າວມານັ້ນແມ່ນຜົນງານທີ່ພົ້ນເດັ່ນອັນເປັນພື້ນຖານ ເພື່ອສືບຕໍ່ເສີມຂະຫຍາຍຄຽງຄູ່ກັບຈຸດດີ ແລະ ຜົນງານທີ່ຍາດມາໄດ້ນັ້ນ ແນ່ນອນວ່າບໍ່ສາມາດປາສະຈາກໄດ້ຈຸດອ່ອນ, ຂໍ້ຄົງຄ້າງຈຳນວນໜຶ່ງທີ່ຈະຕ້ອງໄດ້ເອົາໃຈໃສ່ແກ້ໄຂໃນຕໍ່ໜ້າ ເປັນຕົ້ນການປະຕິບັດວຽກງານພັກ-ພະນັກງານຍັງບໍ່ແຂງແຮງເທົ່າທີ່ຄວນ, ຍັງມີຄະນະພັກ ແລະ ຄະນະໜ່ວຍພັກຈຳນວນໜຶ່ງ ຍັງບໍ່ທັນເປັນເຈົ້າການນຳພາສະມາຊິກພັກ-ພະນັກງານຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍບັນດາແນວທາງ, ນະໂຍບາຍຂອງພັກ, ບັນດາກົດໝາຍ ແລະ ນິຕິກໍາຂອງລັດຢ່າງເລິກເຊິ່ງ; ເຖິງຈະມີການແບ່ງງານ, ແບ່ງຄວາມຮັບຜິດຊອບໃນຄະນະພັກ, ຄະນະໜ່ວຍພັກຢ່າງຈະແຈ້ງແລ້ວກໍຕາມ ແຕ່ການປະຕິບັດຕົວຈິງຍັງບໍ່ໄປຕາມແຜນການທີ່ກໍານົດໄວ້. ສະແດງອອກໃນບາງວຽກງານບໍ່ມີຜົນສຳເລັດຕາມລະດັບຄາດໝາຍ. ການປະຕິບັດບາງວຽກງານທີ່ກໍານົດໃນແຜນພັດທະນາ 5 ປີ (2021-2025) ແມ່ນຍັງບໍ່ສາມາດປະຕິບັດໄດ້ດີໃນບາງດ້ານ ໂດຍສະເພາະການສົ່ງເສີມການຈັດຫາງານ ແລະ ການເຂົ້າເຖິງບໍລິການຈັດຫາງານໃນລະບົບຍັງບໍ່ທັນເຂັ້ມແຂງ, ບັນຫາການເຄື່ອນຍ້າຍແຮງງານຈາກຊົນນະບົດເຂົ້າສູ່ຕົວເມືອງ, ເຄື່ອນຍ້າຍໄປຕ່າງປະເທດ ນັບມື້ຫຼາຍຂຶ້ນເຮັດໃຫ້ຂາດແຄນແຮງງານໃນທ້ອງຖິ່ນ, ການຄຸ້ມຄອງແຮງງານລາວແລະ ແຮງງານຕ່າງປະເທດຢູ່ລາວຍັງບໍ່ທັນເປັນລະບົບ ເຮັດໃຫ້ການເກັບລາຍຮັບເຂົ້າງົບປະມານມີຄວາມຫຍຸ້ງຍາກ, ການເກັບກຳຈຳນວນຜູ້ເສຍອົງຄະ, ຜູ້ມີຄຸນງາມຄວາມດີໃນການປະຕິວັດຊາດ ປະຊາທິປະໄຕ ຍັງບໍ່ທັນລະອຽດຊັດເຈນ, ບາງຄັ້ງຍັງມີການຊໍ້າຊ້ອນ ແລະ ປະຕິບັດບໍ່ທັນທົ່ວເຖິງ, ການສ້າງ ແລະ ປັບປຸງກົດໝາຍໃນຂົງເຂດແຮງງານ ແລະ ສະຫວັດດີການສັງຄົມ ຍັງບໍ່ທັນເປັນລະບົບຄົບຊຸດ; ການຈັດຕັ້ງປະຕິບັດບັນດາກົດໝາຍ, ນິຕິກໍາໃຕ້ກົດໝາຍທີ່ກ່ຽວ ຂ້ອງຍັງບໍ່ທັນເຂັ້ມງວດ ແລະ ບໍ່ສາມາດປະຕິບັດມາດຕະການວິໄນຕໍ່ຜູ້ລະເມີດໄດ້ຢ່າງເດັດຂາດ ຊຶ່ງເປັນສິ່ງທ້າທາຍທີ່ຈະຕ້ອງສືບຕໍ່ແກ້ໄຂໃຫ້ເປັນຮູບປະທໍາ. ການນໍາພາປັບປຸງກົງຈັກການຈັດຕັ້ງ, ປັບປຸງພາລະບົດບາດຂອງຂະແໜງການ ບາງພາກສ່ວນຍັງຊັກຊ້າ; ການຄຸ້ມຄອງພະນັກງານ-ລັດຖະກອນ ໂດຍສະເພາະໃນຂົງເຂດວິຊາການ ຍັງບໍ່ທັນດີເທົ່າທີ່ຄວນ; ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຍັງບໍ່ທັນຮັບປະກັນຄຸນນະພາບ ແລະ ບໍ່ສາມາດບັນລຸຕາມແຜນການທີ່ວາງໄວ້. ສາເຫດຂອງການປະຕິບັດວຽກງານບໍ່ໄດ້ຕາມແຜນ ຍ້ອນຫຼາຍສາເຫດໃນຕົວ ແລະ ນອກຕົວ ເຮັດໃຫ້ບາງວຽກງານຖືກແກ່ຍາວ ແລະ ບໍ່ສໍາເລັດຕາມກຳນົດເວລາ.