ປກສ ເມືອງສີສັດຕະນາກ ມອບລົດທີ່ ຄືນໃຫ້ເຈົ້າຂອງເດີມ

ວັນທີ 14 ກັນຍາ 2023, ທ່ານ ພັທ ອິນປັນ ຫາດາວເຮືອງ ຮອງຫົວໜ້າ ປກສ ເມືອງສີສັດຕະນາກ ນະຄອນຫລວງວຽງຈັນ ໄດ້ມອບລົດຈັກ 7 ຄັນ ທີ່ເກັບກູ້ຄືນໄດ້ຈາກການລົງແກ້ໄຂເປົ້າໝາຍລັກຊັບໃນຕົ້ນເດືອນພຶດສະພາ 2023 ຜ່ານມາ ຄືນໃຫ້ເຈົ້າຂອງເດີມ, ຕາງໜ້າຮັບໂດຍ ທ່ານ ນາງ ເສົາ ປະຊາຊົນບ້ານຂາມງອຍ ເມືອງໄຊເສດຖາ ນະຄອນຫລວງວຽງຈັນ.

ທ່ານ ຮອງຫົວໜ້າກອງບັນຊາການ ປກສ ເມືອງສີສັດຕະນາກ ໃຫ້ຮູ້ວ່າ: ໃນຕົ້ນເດືອນພຶດສະພາ 2023 ຜ່ານມາ ເຈົ້າໜ້າທີ່ ປກສ ເມືອງ ໄດ້ລົງແກ້ໄຂເປົ້າໝາຍລັກລົດຈັກພາຍໃນເມືອງ, ສາມາດເກັບກູ້ລົດຈັກຄືນມາໄດ້ 7 ຄັນທີ່ກຳລັງກຽມຈັດສົ່ງໄປຂາຍຢູ່ຕ່າງແຂວງ, ສ່ວນເປົ້າໝາຍລັກລົດແມ່ນເອົາຕົວຫລົບໜີ.

ພາຍຫລັງເກັບກູ້ລົດມາໄດ້ເຈົ້າໜ້າທີ່ໄດ້ສົມທົບກັບກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ກວດກາເລກຈັກ, ເລກຖັງລົດ ຈຶ່ງຮູ້ໄດ້ວ່າ ລົດທັງ 7 ຄັນ ອອກຊື່  ທ້າວ ຫ້າ;   ນາງຈັນສຸກ;  ທ້າວ ອານຸສິດ; ທ້າວສຸລິຍາ;  ທ້າວ ດາວເພັດ ຫລວງມີໄຊ;   ທ້າວ ພອນທິບ; ແລະ ອີກໜຶ່ງຄັນບໍ່ມີປ້າຍທະບຽນ, ດັ່ງນັ້ນຈຶ່ງໄດ້ຕິດຕໍ່ຫາເຈົ້າຂອງລົດນຳເອົາເອກະສານເຂົ້າມາພົວພັນນຳເອົາລົດຂອງຕົນຄືນໄປນຳໃຊ້.