ເຊບັ້ງໄຟ ແລະ ເຊຈຳພອນ ລະດັບນໍ້າຂຶ້ນສູງເກີນເຂດອັນຕະລາຍແລ້ວ

ກົມອຸຕຸນິຍົມ ແລະ ອຸທົກກະສາດ ພະຍາກອນອາກາດ ແລະ ແຈ້ງເຕືອນວ່າ: ຮ່ອງຄວາມກົດດັນອາກາດຕໍ່າ ຫລື ຮ່ອງຝົນຍັງຈະສືບຕໍ່ພາດ ຜ່ານຢູ່ເຂດພາກກາງຂອງປະເທດລາວ, ຊຶ່ງຈະເຮັດໃຫ້ມີຝົນຕົກ ໃນລະດັບ ຄ່ອຍຢູ່ໃນແຕ່ລະພາກ ແລະ ຕົກປານກາງ ພ້ອມມີລົມພັດແຮງຢູ່ບາງ ທ້ອງຖິ່ນ ແຂວງພາກກາງ ລົງຫາ ພາກໃຕ້.

ເວລາ 12:00 ໂມງ ວັນທີ 15 ກັນຍາ 2023 ສໍາລັບລະດັບນໍ້າຢູ່ສະຖານີຂົວເຊບັ້ງໄຟ ເຊົ້າມື້ນີ້ແທກໄດ້ 18.23 ແມັດ ໄດ້ສູງກາຍເຂດລະດັບເຕືອນໄພ (ເຂດເຕືອນໄພ 17.50 ແມັດ, ເຂດອັນ ຕະລາຍ 18.50 ແມັດ) ແລະ ລະດັບນໍ້າເຊຈໍາພອນ ແທກໄດ້ 8.10 ແມັດ ໄດ້ກາຍເຂດລະດັບອັນຕະລາຍ (ເຂດອັນຕະລາຍ 8.00 ແມັດ), ສະຖານີວາປີ ລະດັບນໍ້າແທກໄດ້ 15.20 ແມັດ. ໄດ້ສູງກາຍເຂດອັນຕະລາຍ, (ເຂດອັນຕະ ລາຍ 15.00 ແມັດ), ສະຖານີສຸວັນນະຄີລີ ລະດັບນໍ້າແທກໄດ້ 11,10 ແມັດ. ໄດ້ສູງກາຍເຂດອັນຕະລາຍ (ເຂດອັນຕະລາຍ 11.00 ແມັດ).

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະ ອໍານາດການ ປົກຄອງທຸກພາກສ່ວນ ທີ່ອາໄສຢູ່ແຂວງພາກກາງ ລົງຫາ ພາກໃຕ້ ໂດຍສະເພາະແຂວງຄໍາມ່ວນ, ສະຫວັນນະເຂດ ແລະ ສາລະວັນ ທີ່ອາໄສ ຢູ່ລຽບຕາມແຄມນໍ້າເຊບັ້ງໄຟ, ເຊຈໍາພອນ ແລະ ເຊໂດນ. ຈົ່ງມີສະຕິລະວັງ ຕໍ່ສະພາບຝົນຕົກໜັກ ທີ່ຈະເຮັດໃຫ້ເກີດມີນໍ້າຖ້ວມ ທີ່ຈະເກີດຂຶ້ນໃນໄລຍະ ວັນທີ 15-16 ກັນຍາ 2023. ພ້ອມຂໍໃຫ້ຕິດຕາມການລາຍງານຂ່າວ ພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.