ໂມຣ໊ອກໂກຢືນຢັນເດີນໜ້າເປັນເຈົ້າພາບ ຈັດກອງປະຊຸມ IMF-ທະນາຄານໂລກ ເດືອນຕຸລານີ້
ລັດຖະບານໂມຣ໊ອກໂກຢືນຢັນໃນວັນທີ 14 ກັນຍາວ່າ: ເມືອງມາຣາເກຈະເປັນເຈົ້າພາບຈັດກອງປະຊຸມປະຈໍາປີຂອງກອງທຶນການເງິນສາກົນ (IMF) ແລະ ທະນາຄານໂລກ ໃນເດືອນຕຸລານີ້ ເຖິງວ່າເກີດແຜ່ນດິນໄຫວຂຶ້ນເມື່ອມໍ່ໆມານີ້ກໍຕາມ. ຂະນະທີ່ IMF ແລະ ທະນາຄານໂລກຍັງບໍ່ໄດ້ຢືນຢັນແຜນຈັດກອງປະຊຸມດັ່ງກ່າວ.
ສໍານັກຂ່າວຣອຍເຕີລາຍງານວ່າ: IMF ແລະ ທະນາຄານໂລກ ຍັງປະເມີນວ່າ: ກອງປະຊຸມວັນທີ 9-15 ຕຸລາ ຈະສາມາດຈັດຂຶ້ນຢູ່ເມືອງມາຣາເກໄດ້ຢ່າງປອດໄພ ຫລື ບໍ່ ເນື່ອງຈາກເມືອງມາຣາເກຕັ້ງຢູ່ຫ່າງຈາກຈຸດທີ່ເກີດແຜ່ນດິນໄຫວຂະໜາດ 6,8 ແມກນິຈູດພຽງ 72 ກິໂລແມັດ ເຊິ່ງແຜ່ນດິນໄຫວດັ່ງກ່າວໄດ້ຂ້າຊີວິດປະຊາຊົນໄປ 2.900 ກວ່າຄົນ ໃນວັນທີ 8 ກັນຍາຜ່ານມາ.
ສໍາລັບກອງປະຊຸມປະຈໍາປີຂອງ IMF ແລະ ທະນາຄານໂລກ ຈະດຶງດູດຄົນປະມານ 10.000-15.000 ຄົນມາສູ່ເມືອງມາຣາເກ ເຊິ່ງເປັນເມືອງທ່ອງທ່ຽວ ແລະ ຈະເປັນຊ່ອງທາງສໍາຄັນໃນການຊ່ວຍບັນເທົາທຸກໃຫ້ພື້ນທີ່ປະສົບແຜ່ນດິນໄຫວ.
ແຫລ່ງຂ່າວລະບຸວ່າ: ເຈົ້າໜ້າທີ່ຂອງ IMF ແລະ ທະນາຄານໂລກ ກໍາລັງປະເມີນວ່າ: ກອງປະຊຸມດັ່ງກ່າວຈະຂັດຂວາງຄວາມພະຍາຍາມໃນການຟື້ນຟູພື້ນທີ່ເສຍຫາຍ ຫລື ບໍ່.
ນອກຈາກນີ້, ຂໍ້ຄວນພິຈາລະນາອື່ນໆ ໄດ້ແກ່ ການເບິ່ງແຍງຮັກສາຄວາມປອດໄພ, ຄວາມປອດໄພບ່ອນຢູ່ອາໄສ ແລະ ໂຄງລ່າງພື້ນຖານຂອງເມືອງມາຣາເກ ລວມທັງລະບົບນໍ້າປະປາ ແລະ ໄຟຟ້າ ລວມທັງໂຮງໝໍທີ່ຈະສາມາດຮອງຮັບຜູ້ມາຢ້ຽມຢາມໂດຍບໍ່ສົ່ງຜົນກະທົບຕໍ່ຊັບພະຍາກອນຂອງປະເທດ.
ໂຄສົກສະຖານທູດໂມຣ໊ອກໂກໃນນະຄອນຫລວງວໍຊິງຕັນເປີດເຜີຍຕໍ່ສໍານັກຂ່າວຣອຍເຕີວ່າ: “ຂ້າພະເຈົ້າມີຄວາມຍິນດີຈະແຈ້ງໃຫ້ທ່ານຮູ້ວ່າ: ລັດຖະບານໂມຣ໊ອກໂກຈະດໍາເນີນກອງປະຊຸມປະຈໍາປີຕາມກໍານົດຕໍ່ໄປ ເຖິງວ່າເກີດແຜ່ນດິນໄຫວກໍຕາມ”.
