ສະຖານະການເລີ່ມຕຶງຄຽດ! ແມນຢູ ລົງວິໄນ ຈາດອນ ຊານໂຊ້ ແຍກຊ້ອມດ່ຽວກັບທີມຊຸດໃຫຍ່
ແມນເຊັສເຕີ ຢູໄນເຕັດ ອອກຖະແຫລງການກ່ຽວກັບສະຖານະການຫລ້າສຸດຂອງ ຈາດອນ ຊານໂຊ້ ເມື່ອວັນທີ 14 ກັນຍາ ທີ່ຜ່ານມາ ໂດຍປະກາດວ່າດາວເຕະໄວ 23 ປີ ຈະບໍ່ມີສ່ວນຮ່ວມກັບທີມໃນເກມພຣີເມຍລີກ ເກມຕ້ອນຮັບການມາຢາມຂອງ ໄບຣຕັນ ໃນວັນເສົານີ້.
ຈາດອນ ຊານໂຊ້ ຖືກຄາດໝາຍວ່າໝົດອະນາຄົດກັບ ແມນເຊັສເຕີ ຢູໄນເຕັດ ແລ້ວຫລັງໄດ້ໂພສຂໍ້ຄວາມລົງໃນສື່ສັງຄົມເພື່ອຕອບໂຕ້ກັບ ເອຣິກ ເທນຮາກ ກ່າວຕໍ່ແຟນບານວ່າລາວເປັນຕົວຮັບບາບ ກໍລະນີຖືກຕັດອອກຈາກທີມໃນການແຂ່ງຂັນ ພຣີເມຍລີກ ເສຍໃຫ້ ອາເຊນອລ 3-1 ໂດຍຄູຝຶກຊາວໂຮນລັງໃຫ້ເຫດຜົນກັບສື່ວ່າລາວບໍ່ປະທັບໃຈກັບການຝຶກຊ້ອມຂອງລາວ.
ໃນກໍລະນີດັ່ງກ່າວ, ຊານໂຊ້ ໄດ້ລົບຂໍ້ຄວາມປລ້ວຫລັງຈາກການເຂົ້າພົບກັບ ເອຣິກ ເທນຮາກ ໃນວັນຈັນທີ່ຜ່ານມາເພື່ອແກ້ໄຂບັນຫາ. ແຕ່ສື່ກ່າວວ່າ, ທັງສອງຄົນບໍ່ສາມາດຕົກລົງກັນໄດ້ ແລະ ຄາດກັນວ່າ ອະດີດດາວຍິງຂອງ ດັອດມຸນ ຈະບໍ່ໄດ້ລົງຫລິ້ນໃຫ້ກັບ ໄບຣຕັນ ເຖິງວ່າ ອັນໂຕນີ ກອງກາງທີມຊາດບຣາຊິນ ຈະໄດ້ຮັບອະນຸຍາດໃຫ້ອອກໄປສະສາງບັນຫາສ່ວນຕົວໃນກໍລະນີທີ່ເຂົາຖືກແຟນເກົ່າກ່າວຫາວ່າໄດ້ທຳຮ້າຍຮ່າງກາຍ.
ຈົນຫລ້າສຸດ ແມນເຊັສເຕີ ຢູໄນເຕັດ ອອກມາຖະແຫລງການທີ່ສາມາດຊີ້ບອກອະນາຄົດຂອງ ຊານໂຊ້ ຢູ່ ໂອລແທັບຟອດ ວ່າລາວຈະຖືກແຍກຕົວໄປຝຶກຊ້ອມຄົນດຽວ ແລະ ຈະບໍ່ໄດ້ລົງຫລິ້ນກັບທີມ ໄບຣຕັນ ໄດ້.
