ຮົງກົງສັ່ງປິດໂຮງຮຽນໃນວັນທີ 14 ກັນຍານີ້ ຫລັງມີປະກາດເຕືອນໄພຝົນຕົກໜັກ-ນໍ້າຖ້ວມກະທັນຫັນ
ຮົງກົງສັ່ງປິດໂຮງຮຽນຫລາຍແຫ່ງໃນວັນທີ 14 ກັນຍານີ້ ຫລັງເຈົ້າໜ້າທີ່ໄດ້ອອກປະກາດເຕືອນໄພຝົນຕົກໜັກລະດັບສີແດງ ພ້ອມເຕືອນໃຫ້ລະວັງນໍ້າຖ້ວມເປັນວົງກວ້າງ ຫລັງຈາກຮົງກົງຖືກພາຍຸຝົນຖະຫລົ່ມໜັກທີ່ສຸດນັບແຕ່ເລີ່ມມີການບັນທຶກເມື່ອ 140 ປີກ່ອນ.
ຫໍສັງເກດການຮົງກົງອອກປະກາດເຕືອນໄພພາຍຸຝົນລະດັບສີແດງໃນໄລຍະກ່ອນ 6:00 ໂມງ ຕາມເວລາທ້ອງຖິ່ນ ໂດຍລະບຸວ່າ: ປະລິມານນໍ້າຝົນຈະສູງເກີນ 50 ມິນລີແມັດພາຍໃນເວລາ 1 ຊົ່ວໂມງ ແລະ ມີທ່າອ່ຽງຝົນຈະຕົກຢ່າງຕໍ່ເນື່ອງ.
ເຖິງຢ່າງໃດກໍຕາມ, ຕະຫລາດຫຸ້ນຮົງກົງຍັງເປີດເຮັດວຽກຕໍ່ ນອກຈາກວ່າຈະມີການປະກາດເຕືອນໄພພາຍຸຝົນຢູ່ລະດັບສີດໍາ.
ຝົນຕົກໜັກເກີດຂຶ້ນໃນຂະນະທີ່ຮົງກົງກໍາລັງສ້ອມແປງຄວາມເສຍຫາຍອັນເກີດຈາກຝົນຕົກໜັກຈາກພາຍຸໄຕ້ຝຸ່ນ “ໄຫ່ຂຸຍ” ເຊິ່ງຫາກໍພັດຜ່ານໄປເມື່ອມໍ່ໆນີ້.
ພື້ນທີ່ຫລາຍແຫ່ງຂອງເມືອງເຊິ່ງຕັ້ງຢູ່ໃນເຂດພູເຂົາຍັງຜະເຊີນຄວາມສ່ຽງສູງຈະເກີດດິນເຈື່ອນ ຫລັງຈາກສະພາບອາກາດປຽກຊຸ່ມຜິດປົກກະຕິ.
ບາງພື້ນທີ່ຂອງເມືອງເຊັ່ນ: ເຈິ້ງກວນໂອ ແລະ ໄຊກຸງ ຍັງປະສົບບັນຫານໍ້າຖ້ວມນັບແຕ່ຕົ້ນອາທິດນີ້. ທັງນີ້, ນໍ້າທີ່ເລິກລະດັບເອວໄດ້ເຂົ້າຖ້ວມຖະຫນົນເສັ້ນແຄບໆຂອງຮົງກົງ, ຫ້າງສັບພະສິນຄ້າ, ສະຖານີລົດໄຟໃຕ້ດິນ ແລະ ອຸໂມງຕ່າງໆ ສົ່ງຜົນເຮັດໃຫ້ມີຜູ້ເສຍຊີວິດ 2 ຄົນ ແລະ ບາດເຈັບຫລາຍກວ່າ 144 ຄົນໃນອາທິດຜ່ານມາ.
