ລິຊາລີສັນ ກຽມພົບຈິດຕະແພດ ຫລັງພົບປັນຫາລຸມເລົ້າຈົນເຮັດໃຫ້ຟອມຕົກ ຢ່າງຮຸນແຮງຈົນສູນເສຍຄວາມໝັ້ນໃຈ

ລິຊາລີສັນ ກອງຫນ້າທີມຊາດບຣາຊີວ ເປີດເຜີຍວ່າລາວກໍາລັງກະກຽມທີ່ຈະປຶກສາກັບຫມໍຈິດຕະວິທະຍາໃນປະເທດອັງກິດ ເພື່ອຊ່ວຍຮຽກຄືນຄວາມຫມັ້ນໃຈໃນການເຕະບານ. ຫລັງປະສົບບັນຫາຕົກຢ່າງຕໍ່ເນື່ອງ.

ກອງຫນ້າອາຍຸ 26 ປີ ກໍາລັງປະເຊີນກັບບັນຫາການຫລິ້ນຕົກຕ່ຳ ໂດຍຕະຫລອດລະດູການທີ່ຜ່ານມາ ລາວຍິງໄດ້ພຽງ 3 ປະຕູຈາກທຸກການແຂ່ງຂັນກັບ ທັອດແນມ ຮັອດສະເປີ, ໃນຂະນະທີ່ເກມທີ່ທີມຊາດບຣາຊິວ ຊະນະ ໂບລິເວຍ 5-1, ລາວມີໂອກາດຈາກໄລຍະໃກ້ ແຕ່ກໍ່ຍິງຂ້າມຄານໄປ. ກ່ອນ​ທີ່​ຈະ​ຖືກ​ປ່ຽນ​ຕົວ​ອອກ ​ແລະ​ ຖືກ​ຈັບພາບ​ຢູ່​ຂ້າງ​ສະໜາມວ່າກຳລັງ​ຮ້ອງໄຫ້.

ນັກເຕະຊາວແຊມບ້າ ຈະກັບໄປລາຍງານຕົວກັບ “ໄກ່ເດືອດທອງ” ໃນທ້າຍອາທິດນີ້ ຢ່າງໃດກໍ່ຕາມ, ໃນການສໍາພາດກັບ Globo, ສື່ໃນບ້ານເກີດໄດ້ກ່າວວ່າລາວຈະຊອກຂໍຄໍາປຶກສາຈາກນັກຈິດຕະວິທະຍາ. ດ້ວຍ​ຄວາມ​ຫວັງ​ວ່າ​​ຈະ​ຊ່ວຍ​ໃຫ້​ສະພາບ​ຈິດ​ໃຈ​ຂອງ​ລາວ​ກັບ​ມາ​ເປັນ​ປົກກະຕິ ແລະ​ ກັບ​ມາຫລິ້ນ​​ບານ​ເຕະ​ໄດ້ດີຄືເກົ່າ.