ກວດພົບຄົນຕ່າງປະເທດດຳເນີນທຸລະກິດບໍ່ຖືກຕ້ອງ 31 ຫົວໜ່ວຍ
ທ່ານ ເຮືອງເພັດ ໄຊພອນເຮືອງ ຮອງຫົວໜ້າຫ້ອງການອຸດສາຫະກຳ ແລະ ການຄ້າ ເມືອງດາກຈຶງ ແຂວງເຊກອງ ລາຍງານວ່າ: ວັນທີ 6-8 ກັນຍາ 2023, ເຈົ້າໜ້າທີ່ກວດກາການຄ້າ ພະແນກອຸດສາ ຫະກຳ ແລະ ການຄ້າແຂວງ ຮ່ວມກັບ ຫ້ອງການອຸດສາຫະກຳ ແລະ ການຄ້າເມືອງ ໄດ້ລົງກວດກາລາຄາ ແລະ ສິນຄ້າຢູ່ທີ່ຕະຫຼາດເທດສະບານເມືອງ ນີ້ກໍເພື່ອເຮັດໃຫ້ວຽກງານຄຸ້ມຄອງ ແລະ ນໍາເຂົ້າສິນຄ້າຈາກຕ່າງປະເທດໃຫ້ຢູ່ໃນລະບຽບກົດໝາຍທີ່ໄດ້ກຳນົດໄວ້, ເຊິ່ງການລົງກວດກາຂອງເຈົ້າໜ້າທີ່ຄັ້ງນີ້ກວດພົບປະເພດສິນຄ້າໝົດອາຍຸ ແລະ ເຊື່ອມຄຸນນະພາບ, ສິນຄ້ານອກລະບົບ ໃນເທສະບານເມືອງດາກຈຶງ ມີທັງໝົດ 11 ຮ້ານ, ພົບເຫັນສິນຄ້າໝົດອາຍຸ ແລະ ເສື່ອມຄຸນນະພາບມີ 7 ລາຍການເປັນຕົ້ນ: ຢາສູບ, ເຂົ້າໝົມ, ໝີ່, ນໍ້າປາ, ຊັອດໝາກເຜັດ, ຄະນໍປຸງລົດ ແລະ ປາແດກ ທີ່ນຳເຂົ້າຈາກປະເທດໃກ້ຄຽງ ລວມມູນຄ່າທັງໝົດ: 3.194.000 ກີບ.
ຕິດຕາມກວດກາລາຄາສິນຄ້າໃນທ້ອງຕະຫຼາດສົດເຫັນວ່າການຂາຍປະເພດສິນຄ້າໃນບັນຊີຄວບຄຸມບັນຊີ(ກ) ເປັ້ນຕົ້ນ ຊີ້ນງົວ, ຄວາຍປະເພດ1, ຊີ້ນໝູ, ປາດຸກພັນ ເຫັນວ່າເປັນໄປຕາມກົນໄກຕະຫຼາດ. ສຳລັບຫົວໜ່ວຍທຸລະກິດປໍ້ານໍ້າມັນເຊື້ອໄຟ 2 ຫົວໜ່ວຍ ແມ່ນມີເອກະສານການອະນຸຍາດຈາກຂະແໜງການທີ່ກ່ຽວຂ້ອງຄົບຖ້ວນ ແລະ ໄດ້ນຳນໍ້າມັນເຊື້ອໄຟມາຈາກບໍລິສັດເປໂຕຼດິແມັກ ຫວຽນາມ ສາຂາແຂວງ ເຊກອງ ແລະ ແຂວງຈຳປາສັກ 16.000 ລິດ/ອາທິດ ແລະ ຂາຍໃນໂຄງສ້າງລາຄາທີ່ກະຊວງອຸດສາຫະກໍາ ແລະ ການຄ້າ ແຈ້ງການອອກມາໃນແຕ່ລະໄລຍະ.
ນອກນີ້,ຍັງໄດ້ຕິດຕາມກວດກາການຖືທະບຽນດຳເນີນທຸລະກິດຂອງຄົນຕ່າງປະເທດລວມທັງໝົດມີຢູ່ 31 ຫົວໜ່ວຍ, ມີໃບທະບຽນວິສາຫະກິດ 5 ຫົວໜ່ວຍ, ທີ່ໄດ້ເຄື່ອນໄຫວທຸລະກິດບໍ່ຖືກຕ້ອງ ແລະ ບໍ່ສອດຄ່ອງຕາມລະບຽບກົດໝາຍ.
