ຈໍານວນຜູ້ເສຍຊີວິດຈາກນໍ້າຖ້ວມຢູ່ລີເບຍສູງເຖິງ 2.000 ຄົນ ສູນຫາຍນັບໝື່ນ ຫລາຍຄົນຖືກນໍ້າພັດລົງທະເລ
ສະຖານະການນໍ້າຖ້ວມຢູ່ລີເບຍຢູ່ໃນຂັ້ນວິກິດໜັກ ໂດຍລາຍງານຫລ້າສຸດລະບຸວ່າ: ຈໍານວນຜູ້ເສຍຊີວິດສູງເຖິງ 2.000 ຄົນແລ້ວ, ຂະນະທີ່ມີປະຊາຊົນຢ່າງໜ້ອຍ 10.000 ຄົນຍັງສູນຫາຍບໍ່ຮູ້ຊະຕາກໍາ ຫລັງອິດທິພົນຈາກພາຍຸແດນຽວທີ່ພັດຖະຫລົ່ມປະເທດ 12 ກັນຍາ 2023 ເຮັດໃຫ້ເກີດຝົນຕົກໜັກຢູ່ພາກຕາເວັນອອກສຽງເໜືອ ແລະ ເຮັດໃຫ້ເຂື່ອນ 2 ແຫ່ງພັງທະລາຍລົງມາຈົນເກີດນໍ້າຖ້ວມໃຫຍ່ໃນທ້າຍອາທິດຜ່ານມາ. ຂະນະທີ່ເມືອງເດິນາໄດ້ຮັບຄວາມເສຍຫາຍໜັກ ໂດຍເນື້ອທີ 1 ໃນ 4 ຂອງເມືອງຖືກນໍ້າຖ້ວມ.
ສໍາລັບຕົວເລກຜູ້ເສຍຊີວິດນັ້ນແຕ່ລະແຫລ່ງຂ່າວມີການລາຍງານທີ່ແຕກຕ່າງກັນ ໂດຍແພດອາວຸໂສໃນເມືອງເດິນາເປີດເຜີຍຕໍ່ສໍານັກຂ່າວ Reuters ວ່າ: ມີຜູ້ເສຍຊີວິດແລ້ວ 2.000 ກວ່າຄົນ, ຂະນະທີ່ເຈົ້າໜ້າທີ່ລີເບຍຕາເວັນອອກປະເມີນວ່າ: ຈໍານວນຜູ້ເສຍຊີວິດອາດມີຫລາຍກວ່າ 5.000 ຄົນ.
ນັກຂ່າວຂອງ Reuters ໄດ້ລົງພື້ນທີ່ສໍາຫລວດເມືອງເດິນາ ເຊິ່ງມີປະຊາກອນປະມານ 125.000 ຄົນ ໂດຍລາຍງານວ່າ: ສະພາບໃນເມືອງນັ້ນເສຍຫາຍໜັກ, ອາຄານຖືກກະແສນໍ້າພັດເສຍຫາຍໜັກ. ຂະນະທີ່ລົດຫລາຍຄັນຖືກປົກຄຸມດ້ວຍຂີ້ຕົມ ແລະ ເສດຫີນຈາກກະແສນໍ້າທີ່ຖະຫລົ່ມເມືອງແຫ່ງນີ້ຫລັງເຂື່ອນແຕກ. ອີກທັງຍັງມີສົບຜູ້ເສຍຊີວິດຈໍານວນຫລາຍຖືກຈັດວາງລຽງໄວ້ບ່ອນທາງຍ່າງຂອງໂຮງໝໍ ທ່າມກາງປະຊາຊົນທີ່ພະຍາຍາມມາຢືນເບິ່ງ ເພື່ອລະບຸຕົວຕົນວ່າເປັນຍາດພີ່ນ້ອງຂອງຕົນເອງ ຫລື ບໍ່.
ສໍານັກງານເພື່ອການປະສານງານກິດຈະການດ້ານມະນຸດສະທໍາແຫ່ງສະຫະປະຊາຊາດ (OCHA) ລະບຸວ່າ: ປັດຈຸບັນມີການລະດົມທຶນຜະເຊີນເຫດສຸກເສີນເພື່ອຊ່ວຍເຫລືອປະຊາຊົນຢູ່ລີເບຍແລ້ວ. ນອກຈາກນີ້ ຍັງມີປະເທດອື່ນໆ ລວມທັງຕວກກີ ທີ່ສົ່ງການຊ່ວຍເຫລືອມາດິນແດນແຫ່ງນີ້ ລວມທັງຍານພາຫະນະສໍາລັບຄົ້ນຫາຜູ້ລອດຊີວິດ, ເຮືອກູ້ໄພ, ເຄື່ອງປັ່ນໄຟ ແລະ ອາຫານ ເພື່ອເພີ່ມກໍາລັງຊ່ວຍເຫລືອເຈົ້າໜ້າທີ່ລີເບຍອີກແຮງໜຶ່ງ.
ອ້າງອີງ:
- https://www.reuters.com/world/africa/more-than-1000-bodies-recovered-libyan-city-after-floods-minister-2023-09-12/
- https://www.bbc.com/news/world-africa-66793306
