ອົງການອະນາໄມໂລກເປີດເຜີຍ! ບັງກະລາເທດ  ພວມປະເຊີນພະຍາດໄຂ້ເລືອດອອກຢ່າງໜັກເສຍຊີວິດຢ່າງໜ້ອຍ 691 ຄົນ

ວັນທີ 8 ກັນຍາ 2023 ຜ່ານມາ ນີ້ ອົງການອະນາໄມໂລກ (WHO) ໄດ້ເປີດເຜີຍບົດລາຍງານໂດຍລະບຸວ່າ: ປີນີ້ ໄຂ້ເລືອດອອກກຳລັງແພ່ລະບາດຢ່າງໜັກໃນອາຊີໃຕ້ ໂດຍສະເພາະບັງກລາເທດ ມີຜູ້ເສຍຊີວິດຫຼາຍສຸດເປັນປະຫວັດສາດ ຊຶ່ງຜູ້ຊ່ຽວຊານລະບຸວ່າ: ມີປັດໄຈມາຈາກໂລກຮ້ອນ ແລະ ລະດູຝົນທີ່ດົນ.

ບັງກະລາເທດ ມີຜູ້ເສຍຊີວິດຍ້ອນພະຍາດໄຂ້ເລືອດອອກຢ່າງໜ້ອຍ 691 ຄົນ ແລະ ມີຜູ້ຕິດເຊື້ອອີກຫຼາຍກວ່າ 138.000 ຄົນ ເຮັດໃຫ້ເປັນປີທີ່ມີຜູ້ເສຍຊີວິດດ້ວຍພະຍາດໄຂ້ເລືອດອອກຫຼາຍທີ່ສຸດນັບຕັ້ງແຕ່ເລີ່ມມີການລະບາດໃນປີ 2000 ແລະ ເພີ່ມຂຶ້ນຫຼາຍເມື່ອທຽບກັບສະຖິຕິສູງທີ່ສຸດກ່ອນໜ້ານີ້ທີ່ 281 ຄົນໃນປີຜ່ານມາ. ຂະນະດຽວກັນ, ເນປານ ມີຜູ້ເສຍຊີວິດຍ້ອນໄຂ້ເລືອດອອກຢ່າງໜ້ອຍ 13 ຄົນ ແລະ ຜູ້ຕິດເຊື້ອອີກຫຼາຍກວ່າ 21.200 ຄົນ ໃນປີນີ້ ແລະ ເຈົ້າໜ້າທີ່ສາທາລະນະສຸກຂອງເນປານກັງວົນວ່າ ຈຳນວນຜູ້ເສຍຊີວິດອາດຈະທຽບເທົ່າກັບປີ 2022 ທີ່ຜ່ານມາ ມີຜູ້ເສຍຊີວິດ 88 ຄົນ ແລະ ຜູ້ຕິດເຊື້ອອີກ 54.000 ຄົນ ແຕ່ໄຂ້ເລືອດອອກບໍ່ໄດ້ຈຳກັດການແພ່ລະບາດຢູ່ໃນອາຊີໃຕ້ເທົ່ານັ້ນ ໂດຍມີຜູ້ຕິດເຊື້ອເພີ່ມຂຶ້ນໃນທົ່ວໂລກລວມ 4,2 ລ້ານຄົນໃນປີຜ່ານມາ ເພີ່ມຂຶ້ນ 8 ເທົ່າຈາກປີ 2000.

WHO ໄດ້ກ່າວເຕືອນວ່າ: ໄຂ້ເລືອດອອກເປັນພະຍາດເຂດຮ້ອນທີ່ແພ່ລະບາດໄວທີ່ສຸດ ແລະ ສ່ຽງລະບາດທົ່ວໂລກ. ນັກກົດວິທະຍາ ແລະ ນັກລະບາດວິທະຍາລະບຸວ່າ: ອຸນຫະພູມທີ່ສູງຂຶ້ນ ແລະ ລະດູຝົນທີ່ດົນ ເຮັດໃຫ້ສະພາບແວດລ້ອມເໝາະສົມແກ່ການແພ່ພັນຂອງຍຸງ. ຂະນະທີ່ນັກລະບາດວິທະຍາໃນບັງກລາເທດ ລະບຸວ່າ: ການຂາດມາດຕະການປ້ອງກັນທີ່ເໝາະສົມເຮັດໃຫ້ຍຸງແພ່ເຊື້ອພະຍາດໄຂ້ເລືອດອອກໄປເກືອບທຸກພື້ນທີ່ຂອງປະເທດ ແລະ ສະພາບອາກາດເໝາະສົມຕໍ່ການແພ່ພັນຂອງຍຸງ.

ນອກຈາກນີ້, ຍັງມີຄວາມສ່ຽງທີ່ຈຳນວນຜູ້ຕິດເຊື້ອຈະເພີ່ມສູງຂຶ້ນອີກໃນເດືອນກັນຍາ ປົກກະຕິໄຂ້ເລືອດອອກຈະແພ່ລະບາດໃນໄລຍະລະດູຝົນ ລະຫວ່າງເດືອນມິຖຸນາ-ກັນຍາ ເມື່ອຍຸງແພ່ພັນຢ່າງວ່ອງໄວໃນບໍລິເວນທີ່ມີນ້ຳຂັງ. ນອກຈາກນີ້, ນັກວິໄຈໃນເນປານຍັງເປີດເຜີຍວ່າ: ການແພ່ລະບາດຂອງໄຂ້ເລືອດອອກເພີ່ມສູງຂຶ້ນທົ່ວປະເທດຢ່າງວ່ອງໄວໃນໄລຍະບໍ່ເທົ່າໃດປີທີ່ຜ່ານມາ ແລະ ເລີ່ມພົບຜູ້ຕິດເຊື້ອໄຂ້ເລືອດອອກໃນໄລຍະລະດູໃບໄມ້ຫຼົ່ນທີ່ມີອຸນຫະພູມຕ່ຳກວ່າໄລຍະລະດູຝົນ ແລະ ພື້ນທີ່ໃນແຖວພູທີ່ບໍ່ເຄີຍມີການແພ່ລະບາດຂອງໄຂ້ເລືອດອອກກໍກຳລັງພະຍາຍາມຄວບຄຸມຈຳນວນຜູ້ຕິດເຊື້ອໃນຂະນະນີ້.

WHO ລະບຸວ່: ປັດໄຈທີ່ເຮັດໃຫ້ໄຂ້ເລືອດອອກເພີ່ມສູງຂຶ້ນເປັນເພາະໂລກຮ້ອນຂຶ້ນບວກກັບປັດໄຈອື່ນໆເຊັ່ນ: ການເຄື່ອນຍ້າຍຂອງຄົນ ແລະ ສິນຄ້າ, ການເພີ່ມຂຶ້ນຂອງເມືອງ ແລະ ບັນຫາກ່ຽວກັບສຸຂະອະນາໄມ. ເມື່ອເດືອນກໍລະກົດ ຜ່ານມາ WHO ຊີ້ບອກວ່າ: ປະລິມານຝົນຕົກໜັກທີ່ຜິດປົກກະຕິໃນບັງກລາເທດ ບວກກັບອຸນຫະພູມທີ່ເພີ່ມສູງຂຶ້ນ ແລະ ຄວາມຊຸ່ມສູງຂຶ້ນເຮັດໃຫ້ປະຊາກອນຍຸງເພີ່ມສູງຂຶ້ນທົ່ວປະເທດ. ນອກຈາກນີ້, ໃນໄລຍະຫຼາຍປີທີ່ຜ່ານມາ, ບັງກລາເທດ ຍັງພົບກັບລະດູຝົນດົນກວ່າປົກກະຕິ ໂດຍມີຝົນຕົກໜັກຕັ້ງແຕ່ເດືອນມີນາ-ຕຸລາ ແລະ ມີແຫຼ່ງນ້ຳຂັງທີ່ເໝາະແກ່ການແພ່ພັນຂອງຍຸງຫຼາຍຍິ່ງຂຶ້ນ.

ທີ່ມາ: ປະຊາຊົນ