ໂຄງການປັບປຸງ ແລະ ສ້ອມແປງທາງເລກທີ 13 ໃຕ້ ບໍ່ບັນລຸຕາມແຜນການ

ອີງຕາມການລາຍງານ ທ່ານ ສີສົມພັນ ພິມສີປະສົມ ຫົວໜ້າໂຄງການປັບປຸງ ແລະ ສ້ອມແປງເສັ້ນທາງເລກ 13 ໃຕ້ ສັນຍາທີ 1–2 ໃຫ້ຮູ້ວ່າ: ໂຄງການປັບປຸງ ແລະ ສ້ອມແປງເສັ້ນທາງເລກທີ 13 ໃຕ້ ແຕ່ກິໂລແມັດ (ກມ) ທີ 71 ເມືອງທ່າພະບາດ ແຂວງບໍລິຄໍາໄຊ ຫາ ກິໂລແມັດທີ 346 ເມືອງ ທ່າແຂກ ແຂວງ ຄໍາມ່ວນ ຄວາມຍາວ 275 ກິໂລແມັດ. ແບ່ງອອກເປັນ 2 ໂຄງການ ມີ 4 ສັນຍາຄື: ໂຄງການທີ 1 ລວມມີ 2 ສັນຍາ ຄື: ສັນຍາທີ 1 ໄລຍະທາງເລີ່ມແຕ່ ກມ ທີ 71 ຫາ ກມ 111 ລວງຍາວ 40 ກມ ນໍາໃຊ້ທຶນກູ້ຢືມຈາກທະນາຄານໂລກ (WB), ສ່ວນສັນຍາທີ 2 ເລີ່ມແຕ່ ກມ ທີ 111– ກິໂລແມັດທີ190, ລວງຍາວ 79 ກມ ນໍາໃຊ້ທຶນກູ້ຢືມຈາກທະນາຄານລົງທຶນເອີຣົບ (EIB). ມາຮອດທ້າຍເດືອນສິງຫາ 2023 ສະເພາະໂຄງການທີ 1; ມີສອງສັນຍາ, ສັນຍາທີ 1 ແມ່ນສຳເລັດຕາມບໍລິມາດວຽກ 99,5%; ສ່ວນສັນຍາທີ 2 ສຳເລັດ 57,14% ທຸກສັນຍາປະຕິບັດຫລຸດຄາດໝາຍແຜນການ.

ສໍາລັບໂຄງການ ທີ 2 ລວມມີ 2 ສັນຍາຄື: ສັນຍາທີ 3 ເລີ່ມແຕ່ ກມ ທີ 190–ກມ 268 ລວງຍາວ 78 ກມ ນໍາໃຊ້ເງິນກູ້ຢືມ ຈາກທະນາຄານລົງທຶນໂຄງລ່າງ ພື້ນຖານອາຊີ (AIIB) ແລະ ສັນຍາ 4 ເລີ່ມແຕ່ ກມ 268 – ກມ 346, ລວງຍາວ 78 ກມ ນໍາໃຊ້ເງິນກູ້ຢືມຈາກທະນາຄານລົງທຶນເອີຣົບ (EIB) ໂດຍປັບປຸງຍົກລະດັບຈາກທາງປູຢາງ 2 ຊັ້ນ ໃຫ້ເປັນເສັ້ນທາງປູອັດສະຟານ (ຢາງຂົ້ວ) ໂດຍແມ່ນກົມຂົວທາງກະຊວງໂຍທາທິການ ແລະ ຂົນສົ່ງ ເປັນເຈົ້າຂອງໂຄງການ.

ສໍາລັບຄວາມຄືບໜ້າລວມຂອງ 2 ສັນຍາ ໃນໂຄງການທີ 3 ແລະ 4 ນີ້ ມາຮອດເດືອນສິງຫາ 2023 ໂຄງການ 3 ກມ ຮອດປັດຈຸບັນ 57,08%  ແລະ  ສັນຍາທີ 4 ຮອດປັດຈຸບັນສຳເລັດ 79,98%  ທັງສອງສັນຍາ ບໍ່ບັນລຸຕາມແຜນການ,  ວມແລ້ວທັງ 4 ສັນຍາ ໃນສອງໂຄງການ ຖືວ່າຊັກຊ້າກວ່າແຜນການກຳນົດ.

ຂໍ້ມູນ: ຂ່າວເສດຖະກິດ-ການຄ້າ