ຮົງກົງຝົນຕົກໜັກສຸດໃນຮອບ 140 ປີ ເຮັດໃຫ້ນ້ຳຖ້ວມສູງ ເມືອງເປັນອໍາມະພາດ ເສຍຊີວິດແລ້ວ 2 ຄົນ
ຮົງກົງຜະເຊີນຝົນຕົກໜັກທີ່ສຸດເປັນປະຫວັດສາດໃນຮອບຢ່າງໜ້ອຍ 140 ປີ ສົ່ງຜົນເຮັດໃຫ້ເກີດນໍ້າຖ້ວມຮຸນແຮງ ແລະ ເຮັດໃຫ້ສູນກາງທາງການເງິນຂອງອາຊີ ແລະ ຂອງໂລກແຫ່ງນີ້ກາຍເປັນອໍາມະພາດ, ຫລ້າສຸດມີລາຍງານພົບຜູ້ເສຍຊີວິດແລ້ວ 2 ຄົນ ແລະ ບາດເຈັບຫລາຍກວ່າ 100 ຄົນ.
ຝົນທີ່ຕົກລົງມາຢ່າງໜັກນີ້ເກີດຈາກອິດທິພົນຂອງພາຍຸໄຕ້ຝຸ່ນ “ໄຫ່ຂຸຍ” ເຖິງວ່າຈະອ່ອນກໍາລັງລົງເປັນພາຍຸດີເປສຊັນ ຫລື ພາຍຸເຂດຮ້ອນແລ້ວ, ແຕ່ເມກທີ່ເຄື່ອນທີ່ຊ້າໆ ເຮັດໃຫ້ເກີດຝົນຕົກປະລິມານມະຫາສານໃນຮົງກົງທີ່ຫາກໍໄດ້ຮັບຜົນກະທົບຈາກຊຸບເປີພາຍຸໄຕ້ຝຸ່ນ “ເຊົາລາ” ໃນອາທິດກ່ອນໜ້າ.
ເຊົ້າວັນທີ 8 ກັນຍາ, ສໍານັກງານອຸຕຸນິຍົມວິທະຍາຮົງກົງອອກຄໍາເຕືອນພາຍຸຝົນຟ້າຄະນອງລະດັບ “ສີດໍາ” ເຊິ່ງເປັນລະດັບສູງສຸດ ແລະ ຖືເປັນຄັ້ງທໍາອິດໃນຮອບ 2 ປີ ໂດຍລະບຸວ່າມີຝົນຕົກຫລາຍກວ່າ 200 ມມ ຢູ່ເກາະຫລັກຂອງຮົງກົງ, ເຂດເກົາລູນ ແລະ ທາງຕາເວັນອອກສຽງເໜືອຂອງເຂດນິວເທີຣິທໍຣີ ນັບແຕ່ຄືນວັນທີ 7 ກັນຍາ ກ່ອນຫລຸດລະດັບການແຈ້ງເຕືອນລົງເມື່ອເວລາ 18:00 ໂມງ ແຕ່ຍັງເຕືອນໃຫ້ປະຊາຊົນລະວັງຄວາມສ່ຽງທີ່ຈະເກີດນໍ້າຖ້ວມຢ່າງຕໍ່ເນື່ອງ.
ສໍານັກຂ່າວ Associated Press ລາຍງານອ້າງການເປີດເຜີຍຂອງຕໍາຫລວດຮົງກົງວ່າ: ພົບຜູ້ເສຍຊີວິດແລ້ວຢ່າງໜ້ອຍ 2 ຄົນ ແລະ ມີຜູ້ໄດ້ຮັບບາດເຈັບຫລາຍກວ່າ 100 ຄົນ ຫລັງຈາກຝົນຕົກໜັກຖະຫລົ່ມຮົງກົງນັບແຕ່ຄືນວັນທີ 7 ກັນຍາ ຕາມເວລາທ້ອງຖິ່ນ. ຂະນະທີ່ໜ່ວຍມອດໄຟຂອງຮົງກົງໄດ້ອົບພະຍົບປະຊາຊົນ 110 ຄົນ ແລະ ຊ່ວຍເຫລືອຜູ້ໄດ້ຮັບບາດເຈັບ 20 ຄົນ.
ໂຮງຮຽນ ແລະ ສໍານັກງານຫລາຍແຫ່ງຖືກປິດ ລວມທັງຕະຫລາດຫລັກຊັບຮົງກົງກໍປະກາດປິດໃນວັນທີ 8 ກັນຍາເຊັ່ນກັນ. ຂະນະທີ່ການຈະລາຈອນຕິດຂັດ ເນື່ອງຈາກຖະໜົນກາຍເປັນແມ່ນ້ຳ.
ອ້າງອີງ:
- https://www.nbcnews.com/news/world/hong-kong-record-rainfall-flooding-black-storm-hits-rcna104025
- https://www.theguardian.com/world/2023/sep/08/hong-kong-weather-record-rain-flooding-after-typhoon-haikui
