ໂກລົມບີຈັບກຸມໂຄເຄນຄັ້ງໃຫຍ່ 7 ໂຕນ
ຕຳຫຼວດໂກລົມບີຈັບກຸມໂຄເຄນນ້ຳໜັກລວມປະມານ 7 ໂຕນ ມູນຄ່າປະມານ 200 ລ້ານໂດລາສະຫະລັດ ຈາກສວນກ້ວຍແຫ່ງໜຶ່ງຢູ່ແຂວງອັນຕຽວກີ ທາງພາກເໜືອຂອງປະເທດ ເຊິ່ງກຽມລັກລອບຂົນສົ່ງທາງເຮືອໄປອາເມລິກາ.
ສຳນັກຂ່າວຣອຍເຕີລາຍງານຈາກນະຄອນຫຼວງໂບໂກຕາ ປະເທດໂກລົມບີ ໃນວັນທີ 23 ກັນຍາວ່າ: ຖະແຫຼງການຮ່ວມຂອງກະຊວງປ້ອງກັນປະເທດ ແລະ ສຳນັກງານຕຳຫຼວດແຫ່ງຊາດໂກລົມບີ ໃນວັນທີ 22 ກັນຍາ ລະບຸວ່າ: ຢາເສບຕິດຊຸດນີ້ເປັນຂອງແກ້ງອາຊະຍາກຳກອລໂຟ, ໜ່ວຍປະຕິບັດການຮ່ວມທະຫານ-ຕຳຫຼວດຈັບກຸມຜູ້ຕ້ອງສົງໄສໄດ້ 5 ຄົນ ໃນລະຫວ່າງການບຸກຢຶດໂຄເຄນພາຍໃນສວນປູກກ້ວຍ ແລະ ຈາກການສອບສວນຜູ້ຕ້ອງສົງໄສ ໂຄເຄນຊຸດນີ້ຈະເຊື່ອງໃນຕູ້ຂົນສົ່ງສິນຄ້າທາງເຮືອ, ສິນຄ້າຈາກໝາກກ້ວຍ ແລະ ໝາກໄມ້ຖືກກົດໝາຍ ໄປອາເມລິກາກາງ ໂດຍຈຸດໝາຍປາຍທາງສຸດທ້າຍຢູ່ອາເມລິກາ.
ແກ້ງກອລໂຟ ຫຼື ຮູ້ຈັກກັນອີກຊື່ວ່າ: ແກ້ງຢູຊູກາ ເປີດເຜີຍໃນເດືອນນີ້ວ່າ: ພ້ອມຈະມອບຕົວຕໍ່ລັດຖະບານໂກລົມບີ. ກອລໂຟຖືກກ່າວຫາລັກລອບຄ້າຢາເສບຕິດຂ້າມຊາດ, ຮ່ວມກັບຫຼາຍແກ້ງຂອງແມັກຊິກ ແລະ ມີສ່ວນຮ່ວມໃນການເຮັດບໍ່ຄຳເຖື່ອນ.
