ການສ້າງແຜນ ແລະ ສະເໜີ ແຜນງົບປະມານແຫ່ງລັດ ຄວນຖືກຕ້ອງ ກັບແຜນນະໂຍບາຍ-ກົດໝາຍ

ວັນທີ 6 ກັນຍາ 2023, ທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ ກ່າວໃນກອງ ປະຊຸມ ການຈັດຕັ້ງປະຕິບັດດຳລັດວ່າດ້ວຍການສ້າງແຜນງົບປະມານແຫ່ງລັດ ແລະ ບົດສະເໜີແຜນງົບປະມານແຫ່ງລັດວ່າ: ການສ້າງແຜນງົບປະມານແຫ່ງລັດ ແລະ ບົດສະເໜີແຜນງົບປະມານແຫ່ງລັດນີ້ ພັກ ແລະ ລັດຖະບານ ຖືວ່າມີຄວາມໝາຍສຳຄັນຫຼາຍ , ສະນັ້ນຈຶ່ງຮຽກຮ້ອງໃຫ້ທຸກພາກສ່ວນກ່ຽວຂ້ອງ ເອົາໃຈໃສ່ຄົ້ນຄວ້າຢ່າງລະອຽດຊັດເຈນຕາມຫລັກການ, ເງື່ອນໄຂຂອງວຽກງານດັ່ງກ່າວ ເພື່ອເຮັດໃຫ້ວຽກງານມີຄວາມຖືກຕ້ອງສອດຄ່ອງ ແລະ ສາມາດປະຕິບັດໄດ້ຢ່າງມີປະສິດທິຜົນສູງ.

ທ່ານ ສຸພາວັນ ພັນທະວິໄລ ຫົວໜ້າພະແນກແຜນການງົບປະມານ ໄດ້ນຳສະເໜີບາງເນື້ອໃນທີ່ສຳຄັນຂອງ ດຳລັດວ່າດ້ວຍການສ້າງແຜນງົບປະມານແຫ່ງລັດ ເປັນຕົ້ນແມ່ນ: ຫລັກການກ່ຽວກັບການສ້າງແຜນງົບປະມານແຫ່ງລັດແມ່ນ ຕ້ອງສອດຄ່ອງກັບແຜນນະໂຍບາຍ, ກົດໝາຍ ແລະ ແຜນພັດທະ ນາເສດຖະກິດ-ສັງຄົມແຫ່ງຊາດ; ສອດຄ່ອງກັບຄວາມອາດສາມາດຕົວຈິງຂອງເສດຖະກິດແຫ່ງຊາດ; ຮັບປະກັນຄວາມ ດຸ່ນດ່ຽງຂອງເສດຖະກິດມະຫາພາກ; ສອດຄ່ອງກັບວິໄສທັດຍຸດທະສາດ ແລະແຜນ ພັດທະນາໃນແຕ່ລະໄລຍະຂອງຂະແໜງການຂັ້ນສູນກາງ ແລະ ທ້ອງຖິ່ນ ບົນພື້ນຖານງົບປະມານທີ່ໄດ້ແຈ້ງໃຫ້. ພ້ອມທັງສະເໜີຂັ້ນຕອນການສ້າງງົບປະມານໄລຍະກາງທັງ 7 ຂັ້ນຕອນ ແລະ ບັນຫາອື່ນໆໃຫ້ຜູ້ເຂົ້າຮ່ວມໄດ້ຮູ້ຕື່ມອີກ.