ໝໍຜ່າຕັດລືມເຄື່ອງມື “ໃຫຍ່ຊໍ່າຈານ” ໄວ້ໃນທ້ອງຄົນເຈັບ

ຜູ້ຍິງຈາກນິວຊີແລນອອກມາຮ້ອງຮຽນໝໍທີ່ຜ່າຕັດເກີດລູກໃຫ້ນາງ ຫລັງຈາກຄົ້ນພົບວ່າໃນອີກ 18 ເດືອນຕໍ່ມາ ໝໍໄດ້ຫລົງລືມເຄື່ອງມືຜ່າຕັດອັນໃຫຍ່ໄວ້ໃນຊ່ອງທ້ອງຂອງນາງ.

ວັນທີ 4 ກັນຍາ, ທ່ານ ມໍແຣກ ແມກດາວ ກໍາມາທິການສໍານັກສຸຂະພາບ ແລະ ຜູ້ພິການ ລາຍງານເຖິງກໍລະນີຮ້ອງຮຽນໝໍຜູ້ທີ່ຜ່າຕັດເກີດລູກໃນປີ 2020 ໃຫ້ແມ່ມານນິລະນາມອາຍຸ 20 ກວ່າປີຄົນໜຶ່ງ.

ແມ່ມານນິລະນາມຄົນນີ້ລະບຸວ່າ: ຫລັງຈາກເກີດລູກ ນາງມີອາການເຈັບທ້ອງເປັນບາງຄັ້ງຄາວ ເຊິ່ງເຮັດແນວໃດກໍບໍ່ເຊົາ ນາງຈຶ່ງໄປກວດຮ່າງກາຍ ພ້ອມເອັກສະເລເບິ່ງພາຍໃນ ແຕ່ວ່າໝໍຄົນໃດກໍຫາສາເຫດບໍ່ພົບ.

ຈົນຮອດຕອນນາງເຈັບທ້ອງຢ່າງຮຸນແຮງ ແລະ ຈໍາເປັນຕ້ອງສົ່ງໄປປິ່ນປົວຢູ່ພະແນກສຸກເສີນຂອງໂຮງໝໍໃນປີ 2021 ເຊິ່ງມີການສັ່ງໃຫ້ເຮັດຊີທີສະແກນ ແລະ “ບັງເອີນ” ພົບເຄື່ອງມືຖ່າງແຜເຊິ່ງໃຊ້ໃນການເປີດບາດແຜຄ້າງໄວ້ໃນລະຫວ່າງການຜ່າຕັດ ຕົກຄ້າງຢູ່ໃນຊ່ອງທ້ອງຂອງນາງ.

ເຄື່ອງມືດັ່ງກ່າວຜະລິດຈາກປລາສຕິກໃສ ມີລັກສະນະເປັນຮູບມົນພ້ອມຊ່ອງເປີດ ແລະ ມີຂະໜາດ “ໃຫຍ່ຊໍ່າຈານ” ເຊິ່ງປົກກະຕິຈະຕ້ອງມີການເກັບອອກມາຈາກຮ່າງກາຍຂອງຄົນເຈັບເມື່ອສິ້ນສຸດການຜ່າຕັດເປີດໜ້າທ້ອງ ກ່ອນຈະຫຍິບບາດແຜໃຫ້ຄົນເຈັບ.

ຫລັງຈາກພົບຕົ້ນຕໍຂອງອາການເຈັບທ້ອງ ແລະ ເອົາອອກຈາກຮ່າງກາຍຂອງນາງໃນທັນທີ ນາງກໍຍື່ນເອກະສານຮ້ອງຮຽນທີມແພດໝໍທີ່ຜ່າຕັດເກີດລູກໃຫ້ນາງ.

ເມື່ອພິຈາລະນາກໍລະນີຂອງຄົນເຈັບແລ້ວ, ທ່ານ ແມກດາວ ລະບຸວ່າ: ໂຮງໝໍໂອກແລນຊິຕີ້ ເຊິ່ງເປັນໂຮງໝໍທີ່ຜ່າຕັດເກີດລູກໃຫ້ນາງ ໄດ້ລະເມີດມາດຕະຖານການເບິ່ງແຍງຄົນເຈັບຢ່າງຊັດເຈນ ແລະ ເຫດການແບບນີ້ບໍ່ສົມຄວນເກີດຂຶ້ນ.

ຫລັງຈາກສອບສວນ, ທ່ານ ແມກດາວ ພົບວ່າໃນການຜ່າຕັດປີ 2020 ບໍ່ມີການນັບລວມເຄື່ອງຖ່າງແຜເຂົ້າໄປໃນຊຸດເຄື່ອງມືໃນການຜ່າຕັດ ເຊິ່ງຈະຕ້ອງນັບເພື່ອເຊັກຈຳນວນທັງກ່ອນ ແລະ ຫລັງຜ່າຕັດຕາມລະບຽບ ຈຶ່ງເຮັດໃຫ້ບໍ່ມີໃຜໃນທີມຜ່າຕັດຜິດສັງເກດທີ່ມີເຄື່ອງມືຫາຍໄປອັນໜຶ່ງ.

ນອກຈາກນີ້ ຍັງບໍ່ມີໃຜໃນທີມຜ່າຕັດຄັ້ງນັ້ນສາມາດອະທິບາຍໄດ້ວ່າ: ເຫດໃດເຄື່ອງມືຖ່າງແຜຈຶ່ງເຂົ້າໄປຢູ່ໃນຊ່ອງທ້ອງໄດ້ ແລະ ເຫດໃດຈຶ່ງບໍ່ມີໃຜລະບຸເຖິງ ຫລື ກວດເຊັກເຄື່ອງມືອັນນີ້ກ່ອນຈະຫຍິບແຜ.

ດ້ານຕົວແທນຂອງຄະນະບໍລິຫານໂຮງໝໍໂອກແລນຊິຕີ້ໄດ້ອອກມາຂໍໂທດຕໍ່ຄົນເຈັບທີ່ເກີດຄວາມຜິດພາດຂຶ້ນໃນລະຫວ່າງການປິ່ນປົວ. ຂະນະທີ່ທ່ານ ແມກດາວ ລະບຸວ່າ: ນາງຈະຍື່ນເລື່ອງຮ້ອງຮຽນນີ້ໄປຫາຝ່າຍກົດໝາຍ ແລະ ທະນາຍຄວາມເພື່ອພິຈາລະນາວ່າຈະມີຄຳສັ່ງໃຫ້ໂຮງໝໍດຳເນີນການຕໍ່ໄປແນວໃດ ຫລື ບໍ່.