ພັນທະບັດ ຄືໜຶ່ງມາດຕະການຈະຊ່ວຍລັດກອບກູ້ວິກິດການດ້ານເສດຖະກິດ

ໂດຍ: ຜາຕຸງ

ວັນທີ 5 ກັນຍາ 2023 ຫ້ອງການທະນາຄານແຫ່ງ ສປປ ລາວໄດ້ອອກແຈ້ງການເລກທີ 221/ຫກ ກ່ຽວກັບການຈຳໜ່າຍພັນທະບັດ ທະນາຄານແຫ່ງ ສປປ ລາວສະກຸນເງິນກີບ

ເຊິ່ງງວດນີ້ເປັນງວດທີ 3 ທີ່ທະນາຄານແຫ່ງ ສປປ ລາວ ໄດ້ເປີດໃຫ້ມວນຊົນໄດ້ສັ່ງຈອງ ເພື່ອເປັນການປະຕິບັດ ນະໂຍບາຍເງິນຕາ ປະກອບສ່ວນເຂົ້າໃນການຮັກສາສະຖຽນລະພາບເງິນຕາແຫ່ງຊາດ ບົນພື້ນຖານໃຫ້ບັນລຸໄດ້ຄາດໝາຍ ຂອງແຜນພັດທະນາເສດຖະກິດ-ສັງຄົມແຫ່ງຊາດ ກໍຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ທະນາຄານແຫ່ງ ສປປ ລາວໄດ້ຈັດຕັ້ງປະຕິບັດນະໂຍບາຍດັ່ງກ່າວ ດ້ວຍການສືບຕໍ່ອອກຈຳໜ່າຍພັນທະບັດ ທຫລ ສະກຸນເງິນກີບ ງວດທີ 3 ໃຫ້ມວນຊົນ ເຊິ່ງມີມູນຄ່າທັງໝົດ 3.000.000.000ກີບ (ສາມພັນຕື້ກີບ).

ພັນທະບັດທະນາຄານ ແຫ່ງ ສປປ ລາວ ລະບຸວ່າ ການຈຳໜ່າຍໃນງວດນີ້ມີຈຳນວນຈຳກັດ, ທະນາຄານແຫ່ງ ສປປ ລາວ ຈະເປັນຜູ້ຈັດສັນຕາມມູນຄ່າ ຈຳໜ່າຍຕົວຈິງ ແລະ ມູນຄ່າການສັ່ງຈອງທັງໝົດ ໃຫ້ຜູ້ສັ່ຈອງຕາມລາຍຊື່ທີ່ສັ່ງຈອງ ນຳທະນາຄານຕົວແທນຈຳໜ່າຍ ເພື່ອຄວາມເປັນເອກະພາບກັນ ເຊີຊວນໃຫ້ຜູ້ທີ່ມີຄວາມສົນໃຈຊື້ ສາມາດເຂົ້າພົວພັນກັບທະນາຄານທຸລະກິດ ທີ່ເປັນຕົວແທນຈຳໜ່າຍ ນັບແຕ່ວັນທີອອກຈຳໜ່າຍເປັນຕົ້ນໄປ.

ເຖິງຢ່າງໃດກໍຕາມ ນີ້ເປັນພຽງໜຶ່ງໃນຫລາຍມາດຕະການ ທີ່ລັດຖະບານນຳໃຊ້ເພື່ອເປັນການກະຕຸ້ນເສດຖະກິດຂອງປະເທດທີ່ກຳລັງປະສົບກັບບັນຫາວິກິດໃນປະຈຸບັນ ແລະເຊື່ອວ່າການນຳໃຊ້ມາດຕະການນີ້້ ຈະຊ່ວຍເຮັດໃຫ້ເສດຖະກິດແຫ່ງຊາດສາມາດຟື້ນຕົວແລ້ວກັບຄືນເຂົ້າສູ່ສະພາບປົກກະຕິ,  ແຕ່ຮູບການນີ້ຈະແກ້ໄຂໄດ້ສ່ຳໄດນັ້ນມັນຂຶ້ນກັບທຸກພາກສ່ວນຕ້ອງໄດ້ຊ່ວຍກັນປະກອບສ່ວນດ້ວຍການສັ່ງຈອງທະນາບັດ ຈະໜ້ອຍຫຼືຫຼາຍກໍແລ້ວແຕ່ຕາມຄວາມສາມາດທີ່ມີ ຍັງຈະດີກວ່າເຮົາຈະໄປຕົກເຂົ້າໃນວັງວົນສັງຄົມອອນລາຍ ທີ່ຕົວະຍົວະ ຫຼອກລວງ ອ້າງນັ້ນອ້າງນີ້, ເຮັດວຽກງ່າຍ ໄດ້ຜົນແບ່ງປັນສູງ ສຸດທ້າຍມາກໍ ເປິອ່ຳອ່າ ມີແຕ່ເສຍກັບເສຍ ບໍ່ສາມາດຈັບມືໃຜໄດ້ເລີຍແຕ່ການລົງທຶນສັ່ງຈອງພັນທະບັດຊ່ວຍລັດຖະບານ ທີມີ ທະນາຄານແຫ່ງ ສປປ ລາວ ເຊິ່ງເປັນອົງການຈັດຕັ້ງຂອງລັດຖະບານເປັນຜູ້ກຳກັບນັບຊາ ຖືວ່າເປັນເລື່ອງທີ່ດີນອກຈາກເພິ່ນມີດອກເບ້ຍໃຫ້ 15% ຕໍ່ປີ ທັງຮັບປະກັນຄວາມປອດໄພແລ້ວ ອີກດ້ານໜຶ່ງຍັງເປັນການປະກອບສ່ວນພັດທະນາແລະກອບກູ້ເສດຖະກິດຂອງຊາດ ໃຫ້ກັບມາເຂັ້ມແຂງຕື່ມອີກທາງໜຶ່ງ.