ເຊົ່າສຳປະທານທີ່ດິນລັດ ສ້າງຕະຫລາດບ້ານເມືອງຫານ ແຂວງໄຊຍະບູລີ ເພື່ອກະຕຸ້ນເສດຖະກິດພາຍໃນເມືອງ

ເພື່ອເປັນການພັດທະນາພື້ນຖານໂຄ່ງລາງໃຫ້ມີຄວາມສະດວກ ແລະ ການຈັດຕັ້ງປະຕິບັດໃຫ້ມີຄວາມຖືກຕ້ອງສອດຄ່ອງກັບລະບຽບກົດໝາຍ, ວັນທີ 1 ກັນຍາ 2023 ເມືອງຫົງສາ ແຂວງໄຊຍະບູລີ ໄດ້ຈັດພິທີເຊັນສັນຍາ ໂຄງການເຊົ່າທີ່ດິນລັດ ເພື່ອປັບປຸງກໍ່ສ້າງຕະຫລາດບ້ານເມືອງຫານຂຶ້ນໃໝ່ ພ້ອມທັງກະຕຸ້ນເສດຖະກິດພາຍໃນເມືອງໃຫ້ດີຂຶ້ນ.

ໂຄງການນີ້ ແມ່ນຕະຫລາດບ້ານເມືອງຫານ ມີເນື້ອທີ່ທັງໝົດ 14.639 ຕາແມັດ ໂດຍກຳນົດໄລຍະເວລາການເຊົ່າທີ່ດິນ 20 ປີ ແລະ ການຊຳລະ ແມ່ນໄດ້ກຳນົດອັດຕາຄ່າເຊົ່າເປັນເງິນ 45 ລ້ານກີບຕໍ່ປີ (ໂດຍຊຳລະເປັນແຕ່ລະປີ) ແລະ ຈະໄດ້ມີການປະເມີນຄ່າເຊົ່າໃນທຸກໆ 5 ປີ ໂດຍອີງໃສ່ຕາມສະພາບເງື່ອນໄຂຂອງເສດຖະກິດໃນແຕ່ລະໄລຍະ ແລະ ກຳນົດໄລຍະເວລາຂອງການກໍ່ສ້າງໂຄງການນີ້ແມ່ນ 2 ປີໃຫ້ສຳເລັດຕາມສັນຍາ.