ສິງກະໂປເລືອກອະດີດຮອງນາຍົກລັດຖະມົນຕີ ເປັນປະທານາທິບໍດີຄົນໃໝ່

ອະດີດຮອງນາຍົກລັດຖະມົນຕີ ແລະ ລັດຖະມົນຕີການເງິນສິງກະໂປ ໄດ້ຮັບການເລືອກຕັ້ງຈາກປະຊາຊົນໃຫ້ເປັນປະທານາທິບໍດີຄົນຕໍ່ໄປ.

ວັນທີ 2 ກັນຍາ, ສຳນັກຂ່າວຕ່າງປະເທດລາຍງານວ່າ: ຜົນຢ່າງເປັນທາງການຂອງການເລືອກຕັ້ງປະທານາທິບໍດີສິງກະໂປ ເຊິ່ງມີການລົງຄະແນນໃນວັນທີ 1 ກັນຍາຜ່ານມາ ປາກົດວ່າ: ທ່ານ ທາມັນ ຊັນມູກາຮັດນຳ ອະດີດຮອງນາຍົກລັດຖະມົນຕີ ແລະ ລັດຖະມົນຕີການເງິນ ອາຍຸ 66 ປີ ໄດ້ຮັບຄະແນນສຽງສະໜັບສະໜູນຫລາຍທີ່ສຸດ 70,4% ຫລື ປະມານ 1,7 ລ້ານຄະແນນ.

ຂະນະທີ່ທ່ານ ອິ້ງ ກັກ ຊົງ ອະດີດປະທານກອງທຶນຄວາມໝັ້ນຄົງແຫ່ງຊາດສິງກະໂປ ອາຍຸ 75 ປີ ໄດ້ຮັບຄະແນນສຽງສະໜັບສະໜູນມາເປັນອັນດັບສອງ 15,7% ຫລື 390.041 ຄະແນນ ແລະ ທ່ານ ຕັນ ກິນ ຫລຽນ ອະດີດຜູ້ບໍລິຫານລະດັບສູງຂອງບໍລິສັດປະກັນໄພແຫ່ງໜຶ່ງ ອາຍຸ 75 ປີ ໄດ້ຮັບຄະແນນສຽງສະໜັບສະໜູນມາເປັນອັນດັບສາມ 13,8% ຫລື 344.292 ຄະແນນ.

ທັງນີ້, ທ່ານ ທາມັນ ຈະຮັບຕຳແໜ່ງແທນປະທານາທິບໍດີ ຮາລິມາ ຢາຄ໊ອບ ເຊິ່ງໄດ້ຮັບການເລືອກຕັ້ງໃນປີ 2018 ແລະ ບໍ່ປະສົງລົງສະໝັກຮັບເລືອກຕັ້ງເປັນສະໄໝທີສອງ.

ສຳລັບການເລືອກຕັ້ງປະທານາທິບໍດີຂອງສິງກະໂປຄັ້ງນີ້ ເປັນຄັ້ງທຳອິດໃນຮອບກວ່າ 1 ທົດສະວັດຂອງສິງກະໂປ ທີ່ມີຜູ້ສະໝັກຫລາຍກວ່າ 1 ຄົນ ໂດຍການດຳລົງຕຳແໜ່ງປະທານາທິບໍດີ ມີວາລະ 6 ປີ ແລະ ສາມາດດຳລົງຕຳແໜ່ງໄດ້ຕໍ່ເນື່ອງບໍ່ເກີນສອງສະໄໝ ອີກທັງຕ້ອງບໍ່ສັງກັດພັກການເມືອງໃດ.

ເຖິງຢ່າງໃດກໍຕາມ, ທ່ານ ທາມັນ ເຄີຍເປັນສະມາຊິກພັກກິດປະຊາຊົນ (PAP) ເຊິ່ງເປັນພັກລັດຖະບານ ຫລາຍຝ່າຍຈຶ່ງຕັ້ງຄຳຖາມກ່ຽວກັບ “ຄວາມເໝາະສົມ”. ສ່ວນນາຍົກລັດຖະມົນຕີ ຫລີຊຽນລຸງ ສະແດງຄວາມຍິນດີຕໍ່ທ່ານ ທາມັນ ແລະ ເຊື່ອໝັ້ນວ່າອີກຝ່າຍຈະສາມາດປະຕິບັດໜ້າທີ່ໄດ້ຢ່າງດີ ເຖິງວ່າປະທານາທິບໍດີເປັນຕຳແໜ່ງ “ພິທີການ” ກໍຕາມ.

ການເລືອກຕັ້ງເປັນ “ຂໍ້ບັງຄັບ” ຕາມກົດໝາຍຂອງສິງກະໂປ ເຊິ່ງປັດຈຸບັນຈຳນວນຜູ້ມີສິດອອກສຽງມີປະມານ 2,7 ລ້ານຄົນ ແລະ ຜູ້ທີ່ບໍ່ມາໃຊ້ສິດໂດຍບໍ່ສາມາດສະແດງຫລັກຖານ ແລະ ໃຫ້ເຫດຜົນທີ່ເໝາະສົມໄດ້ ອາດຖືກຕັດສິດຈາກການລົງຄະແນນໃນອະນາຄົດ.