ນາຍົກລັດຖະມົນຕີ ຈະເດີນທາງເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 43 ໃນວັນທີ 4-7 ກັນຍາ 2023 ທີ່ ຈາກາກຕາປະເທດ ອິນໂດເນເຊຍ

ໂດຍຕອບສະໜອງຕາມຄໍາເຊີນ ຂອງ ທ່ານ ໂຈໂກ ວີໂດໂດ ປະທານາທິບໍດີ ແຫ່ງ ສາທາ ລະນະລັດ ອິນໂດເນເຊຍ ໃນຖານະປະທານອາຊຽນ ປີ 2023, ທ່ານ ສອນໄຊ ສີພັນດອນ ນາຍົກລັດ ຖະມົນຕີ ແຫ່ງ ສປປ ລາວ ຈະເດີນທາງເຂົ້າຮ່ວມ ກອງປະຊຸມສຸດຍອດອາຊຽນ ຄັ້ງທີ 43 ແລະ  ກອງປະຊຸມສຸດຍອດອື່ນໆທີ່ກ່ຽວຂ້ອງ ພາຍໃຕ້ຄໍາຂວັນ “ອາຊຽນມີຄວາມສໍາຄັນ: ສູນກາງແຫ່ງການຈະເລີນເຕີບໂຕ” ເຊິ່ງຈະຈັດຂຶ້ນໃນວັນທີ 04-07 ກັນຍາ 2023, ທີ່ ຈາກາກຕາ, ສາທາລະນະລັດ ອິນໂດເນເຊຍ.

ໃນກອງປະຊຸມສຸດຍອດອາຊຽນຄັ້ງນີ້, ທ່ານນາຍົກລັດຖະມົນຕີ ສອນໄຊ ສີພັນດອນ ຈະໄດ້ຮ່ວມກັບຜູ້ນຳຂອງປະເທດສະມາຊິກອາຊຽນອື່ນໆ ທົບທວນຄືນການສ້າງປະຊາຄົມອາຊຽນ ໃຫ້ເຂັ້ມ ແຂງ ແລະ ການຮ່ວມມືຂອງອາຊຽນກັບພາຍນອກ ແລະ ຈະຮັບຊາບຄວາມຄືບໜ້າຂອງການສ້າງວິໄສທັດປະຊາຄົມອາຊຽນຫລັງປີ 2025. ພ້ອມນີ້, ທ່ານນາຍົກລັດຖະມົນຕີ ກໍຈະໄດ້ເຂົ້າຮ່ວມກອງປະຊຸມສຸດຍອດ ລະຫວ່າງອາຊຽນ ກັບບັນດາປະເທດຄູ່ເຈລະຈາ ຄື: ອົດສະຕຣາລີ, ການາດາ, ສປ ຈີນ, ອິນເດຍ, ຍີ່ປຸ່ນ, ນິວຊີແລນ, ສ ເກົາຫລີ , ຣັດເຊຍ, ສ ອາເມລິກາ ແລະ ສປຊ. ອັນສຳຄັນ, ໃນພິທີປິດຂອງກອງປະຊຸມສຸດຍອດຄັ້ງນີ້, ທ່ານປະທານາທິບໍດີ ແຫ່ງ ສ ອິນໂດເນເຊຍ (ໃນນາມປະທານອາຊຽນ ໃນປີ 2023) ຈະໄດ້ມອບການເປັນປະທານອາຊຽນໃຫ້ ທ່ານນາຍົກລັດຖະມົນຕີ ແຫ່ງ ສປປ ລາວ (ໃນນາມປະທານອາຊຽນ ໃນປີ 2024).

ນອກຈາກນີ້, ທ່ານນາຍົກລັດຖະມົນຕີ ຍັງຈະໄດ້ພົບປະສອງຝ່າຍກັບ ຄູ່ຮ່ວມຕຳແໜ່ງຈາກ ປະເທດສະມາຊິກອາຊຽນ ແລະ ປະເທດຄູ່ເຈລະຈາອາຊຽນ ເພື່ອປຶກສາກາລື ກ່ຽວກັບການພົບພັນຮ່ວມມືສອງຝ່າຍ ແລະ ຖືໂອກາດເຊື້ອເຊີນບັນດາຜູ້ນຳດັ່ງກ່າວ ມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ທີ່ ສປປ ລາວ ຈະໄດ້ຮັບກຽດເປັນເຈົ້າພາບ ແລະ ເປັນປະທານ ໃນປີ 2024.

#ຂ່າວພາຍໃນລາວພັດທະນາ #ນາຍົກລັດຖະມົນຕີ #ຈະເດີນທາງເຂົ້າຮ່ວມກອງປະຊຸມສຸດຍອດອາຊຽນ