ຍັງປາກົດເຫັນການໂພສໂຄສະນາຊື້ຂາຍແລກປ່ຽນເງິນຕາຕ່າງປະເທດ ແບບຜິດກົດໝາຍ ຢູ່ອອນລາຍ

ວັນທີ 31 ສິງຫາ 2023 ຍັງປາກົດເຫັນການໂພສໂຄສະນາ ຊື້-ຂາຍ ເງິນຕາແບບຜິດກົດໝາຍ ຢູ່ເຟສບຸກສ່ວນຕົວ ແລະ ຕັ້ງເປັນເພຈຮ້ານແລກປ່ຽນ ກໍມີ ຊຶ່ງເປັນສາເຫດໜຶ່ງທີ່ເຮັດໃຫ້ອັດຕາແລກປ່ຽນເງິນຕາປັ່ນປ່ວນ. ກ່ອນໜ້ານີ້ທາງການໄດ້ອອກສັ່ງເລກທີ 10/ນຍ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ເພື່ອເລັ່ງແກ້ໄຂບັນຫາອັດຕາແລກປ່ຽນ ແລະ ໃຊ້ມາດຕະການເດັດຂາດຕໍ່ການຄຸ້ມຄອງເງິນຕາຕ່າງປະເທດ.

ຫລ້າສຸດວັນທີ 29 ສິງຫາ 2023 ນາຍົກໄດ້ອອກຄຳສັ່ງເລກທີ 13/ນຍ ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ. ມາດຕາ 2.2 ຂໍ້2) ມອບໃຫ້ກະຊວງ ປ້ອງກັນຄວາມສະຫງົບ ຄຸມຄອງ, ຕິດຕາມ, ກວດກາ, ແລະ ແກ້ໄຂການແລກປ່ຽນເງິນຕາ ທີ່ບໍ່ຖືກຕ້ອງ ໃຫ້ເພີ່ມທະວີຄວາມຮັບຜິດຊອບໃນການເຄື່ອນໄຫວ, ກວດກາ ແລະ ດຳເນີນຄະດີ ຕໍ່ບຸກຄົນ ຜູ້ທີ່ຍັງເຄື່ອນໄຫວແລກປ່ຽນເງິນຕາແບບຊະຊາຍ ສ້າງຄວາມປັ່ນປ່ວນ ຢ່າງເຂັມງວດ ແລະ ເດັດຂາດ; ຕິດຕາມກູ່ມເປົ້າໝາຍ ທີ່ມີການນຳໃຊ້ບັນຊີສ່ວນຕົວ ເຂົ້າໃນການແລກປ່ຽນເງິນຕາແບບຜິດກົດໝາຍ, ພ້ອມທັງຕິດຕາມ ຖ້າພົບເຫັນພະນັກງານ ແລະ ເຈົ້າໜ້າທີ່ ສວຍໃຊ້ໜ້າທີ່ອຳນວຍຄວາມສະດວກໃນການດຳເນີນການແລກປ່ຽນເງິນແບບຜິດກົດໝາຍ ຕ້ອງໄດ້ດຳເນີນຕາມຂະບວນການຂອງກົດໝາຍຢ່າງເຂັມງວດ; ຕິດຕາມການນຳເງິນສົດເຂົ້າ-ອອກ ສປປ ລາວ ໃຫ້ຖືກຕ້ອງຕາມກົດໝາຍ ແລະ ລະບຽບການພ້ອມທັງປະຕິບັດຕາມມາດຕະການເດັດຂາດຕໍ່ຜູ້ລະເມີດ ຕາມພາລະບົດບາດຂອງຕົນ ແລະ ແລກປ່ຽນຂໍ້ມູນກັບທະນາຄານແຫ່ງ ສປປ ລາວ ຢ່າງເປັນປະຈຳ.

ຫວັງວ່າຈາກແຈ້ງການຂອງນາຍົກລັດຖະມົນຕີສະບັບນີ້ຈະເປັນບ່ອນອີງໃນການຈັດຕັ້ງປະຕິບັດວຽກງານໃຫ້ທາງການ ແລະ ໜ່ວຍງານທີ່ກ່ຽວຂ້ອງໃນການນຳໃຊ້ມາດຕະການຕາມລະບຽບກົດໝາຍຢ່າງເຂັ້ມງວດ ແລະ ເດັດຂາດ ເລັ່ງປາບປາມ ບຸກຄົນຫລືກຸ່ມຄົນທີ່ໂຄສະນາແລກປ່ຽນເງິນຊະຊາຍແບບຜິດກົດໝາຍນີ້ໃຫ້ໝົດໄປ ເຮັດໃຫ້ການແລກປ່ຽນເງິນຕາເຂົ້າສູ່ລະບົບປົກກະຕິ ຖືກຕ້ອງຕາມກົດໝາຍ, ສັງຄົມມີຄວາມສະຫງົບໂດຍໄວ.