ເນັ້ນໃຫ້ຂະແໜງພະລັງງານ ແລະ ບໍ່ແຮ່ ນວ ປັບປຸງຂອດການຄົ້ນຄວ້າອະນຸຍາດດໍາເນີນ ທຸລະກິດໃຫ້ເຄັ່ງຄັດ, ເຂັ້ມງວດ, ໂປ່ງໃສ

ວັນທີ 30 ສິງຫາ 2023, ທ່ານ ອາດສະພັງທອງ ສີພັນດອນ ເຈົ້າຂອງນະຄອນຫລວງວຽງຈັນ (ນວ) ພ້ອມຄະນະ ໄດ້ເຄື່ອນໄຫວພົບປະ ແລະ ຊີ້ນໍາວຽກງານ ຢູ່ພະແນກພະລັງງານ ແລະ ບໍ່ແຮ່ ນວ, ພາຍຫຼັງຟັງ ຊຶ່ງທ່ານໄດ້ເນັ້ນໃຫ້ພະແນກພະລັງງານ ແລະ ບໍ່ແຮ່ ນວເອົາໃຈໃສ່ປະຕິບັດນິຕິກໍາຕ່າງໆທີ່ກ່ຽວຂ້ອງກັບຂະແໜງການຂອງຕົນ, ຕິດຕາມກວດກາໂຄງການກໍ່ສ້າງ ແລະ ຕິດຕັ້ງລະບົບສາຍສົ່ງໄຟຟ້າແຮງສູງທີ່ຜ່ານ ນວ, ສຸມໃສ່ປະກອບສວນປະຕິບັດ 2 ວາລະແຫ່ງຊາດ, ເອົາໃຈໃສ່ກວດກາຄືນວຽກງານຈຸດສຸມໃນບາງດ້ານ, ປັບປຸງໃຫ້ສອດຄ່ອງກັບສະພາບ ແລະ ເງື່ອນໄຂໃໝ່ ທັງສອດຄ່ອງກັບຄວາມຮຽກຮ້ອງຕ້ອງການ ແລະ ຄວາມສາມາດຕົວຈິງ. ສືບຕໍ່ຊີ້ນໍາຊຸກຍູ້ ແລະ ປະຕິບັດຕາມທິດເປັນມິດກັບສິ່ງແວດລ້ອມຂະຫຍາຍຕົວແບບໜັກແໜ້ນຕໍ່ເນື່ອງ ແລະ ຍືນຍົງ, ປັບປຸງຂອດການຄົ້ນຄວ້າອະນຸຍາດດໍາເນີນທຸລະກິດໃຫ້ເຄັ່ງຄັດ, ເຂັ້ມງວດ, ໂປ່ງໃສ ແລະ ສອດຄ່ອງກັບລະບຽບກົດໝາຍ, ແບ່ງຂັ້ນຄຸ້ມຄອງໃຫ້ຖືກຕ້ອງມີປະສິດທິຜົນ, ແກ້ໄຂປະກົດການຫຍໍ້ທໍ້ຕ່າງໆໃນຂະແໜງການບໍ່ແຮ່ໃຫ້ຫລຸດລົງຢ່າງຈະແຈ້ງ, ຕິດຕາມກວດກາການລັກລອບຂຸດຄົ້ນແຮ່ທາດແບບຊະຊາຍໃຫ້ເຂັ້ມງວດ.