ຮອງປະທານປະເທດ ເນັ້ນໃຫ້ເມືອງທ່າແຂກ ເອົາໃຈໃສ່ພັດທະນາເສດຖະກິດ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ

ວັນທີ 28 ສິງຫາ 2023, ທ່ານ ບຸນທອງ ຈິດມະນີ ຮອງປະທານປະເທດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ  ພ້ອມທັງເຄື່ອນໄຫວເບິ່ງກິດຈະການລ້ຽງປາກະຊັງ ຂອງຜູ້ປະກອບການທຸລະກິດສ່ວນບຸກຄົນ ຢູ່ບ້ານທ່າແຂກໃຕ້, ເມືອງທ່າແຂກ,  ເຊິ່ງໄດ້ຮັບຟັງລາຍງານສະພາບລວມການພັດທະນາເສດຖະກິດ-ສັງຄົມຂອງເມືອງ ແລະ ກິດຈະການ ລ້ຽງປາກະຊັງ ຂອງຜູ້ປະກອບການທຸລະກິດ.

ຈາກນັ້ນ, ທ່ານຮອງປະທານປະເທດ ໄດ້ມີຄໍາເຫັນ ແລະ ໃຫ້ທິດຊີ້ນໍາຕໍ່ຜູ້ປະກອບການທຸລະກິດດັ່ງກ່າວ, ພ້ອມທັງແນະນໍາໃຫ້ສືບຕໍ່ຂະຫຍາຍການລ້ຽງໃຫ້ຫລາຍບົນພື້ນຖານອີງໃສ່ຄວາມຕ້ອງການຂອງທ້ອງຕະຫລາດ ແລະ ລວມເຖິງບັນຫາດ້ານອື່ນໆທີ່ຕິດພັນກັບກິດຈະການລ້ຽງປາ. ສ່ວນການພັດທະນາຕົວເມືອງທ່າແຂກ ໃຫ້ຄະນະການນໍາຂັ້ນເມືອງຈົ່ງໄດ້ເປັນເຈົ້າການເອົາໃຈໃສ່ສືບຕໍ່ໃນການພັດທະນາໃຫ້ສົມກັບວ່າເມືອງທ່າແຂກເປັນເມືອງໃຈກາງທາງດ້ານເສດຖະກິດ, ວັດທະນະທໍາ-ສັງຄົມ, ສ້າງຕົວເມືອງໃຫ້ມີຄວາມສະອາດຈົບງາມ ແລະ ເປັນເມືອງໜ້າຢູ່, ສ້າງຂະບວນການຕ້ອນຮັບວັນສໍາຄັນຕ່າງໆ ຂອງຊາດຂອງພັກ. ພ້ອມທັງເອົາໃຈໃສ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການແກ້ໄຂບັນຫາປະກົດການຫຍໍ້ທໍ້ຕ່າງໆໃນສັງຄົມ; ສືບຕໍ່ຊຸກຍູ້ສົ່ງເສີມການຜະລິດກະສິກໍາດ້ວຍການປູກ-ການລ້ຽງ, ສ້າງທ່າແຮງພັດທະນາ ໃຫ້ສາມາດກຸ້ມຕົນເອງ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ ແລະ ໃຫ້ສືບຕໍ່ເຝົ້າລະວັງກ່ຽວກັບສະພາບບັນຫາໄພພິບັດ ແລະ ປ້ອງກັນການລະບາດຂອງພະຍາດທີ່ເກີດຂຶ້ນຕາມລະດູການຕື່ມອີກ.