ພູຖານຫລຸດຄ່າທຳນຽມນັກທ່ອງທ່ຽວລົງເຄິ່ງໜຶ່ງ ຫວັງດຶງດູດນັກທ່ອງທ່ຽວເຂົ້າປະເທດເພີ່ມຂຶ້ນ
ພູຖານປະກາດຫລຸດຄ່າທຳນຽມນັກທ່ອງທ່ຽວລົງເຄິ່ງໜຶ່ງ ຈາກ 200 ໂດລາສະຫະລັດ ເຫລືອ 100 ໂດລາສະຫະລັດ ດ້ວຍຄວາມພະຍາຍາມຈະສົ່ງເສີມຂະແໜງອຸດສາຫະກຳການທ່ອງທ່ຽວທີ່ຍັງບໍ່ຟື້ນຕົວ ຫລັງຈາກປະເທດຍົກເລີກຂໍ້ຈຳກັດກ່ຽວກັບໂຄວິດມາແລ້ວ 1 ປີ.
ໃນເດືອນກັນຍາປີຜ່ານມາ, ພູຖານຂຶ້ນ “ຄ່າທຳນຽມການພັດທະນາທີ່ຍືນຍົງ” ຫລື ຄ່າທຳນຽມທີ່ເກັບຈາກນັກທ່ອງທ່ຽວຕໍ່ຄົນຕໍ່ຄືນຈາກ 65 ໂດລາສະຫະລັດ ເປັນ 200 ໂດລາສະຫະລັດ ເມື່ອປະເທດຕັດສິນໃຈຍົກເລີກມາດຕະການຄວບຄຸມໂຄວິດທີ່ດຳເນີນມາເປັນເວລາ 2 ປີ ໂດຍຊີ້ແຈງວ່າ: ຈະນຳເອົາເງິນທີ່ໄດ້ຈາກການເກັບຄ່າທຳນຽມດັ່ງກ່າວໄປຊົດເຊີຍກັບກາກບອນທີ່ນັກທ່ອງທ່ຽວສ້າງຂຶ້ນ.
ລັດຖະບານພູຖານລະບຸໃນຖະແຫລງການວັນທີ 25 ສິງຫາວ່າ: ອັດຕາຄ່າທຳນຽມໃໝ່ 100 ໂດລາສະຫະລັດຕໍ່ຄືນ ຈະມີຜົນບັງຄັບໃຊ້ນັບແຕ່ເດືອນກັນຍານີ້ ຕໍ່ເນື່ອງໄປເປັນໄລຍະເວລາ 4 ປີ.
ຫລັງຖືກໂດດດ່ຽວມາດົນ, ພູຖານຕັດສິນໃຈເປີດປະເທດຕ້ອນຮັບນັກທ່ອງທ່ຽວໃນປີ 1974. ຂໍ້ມູນທາງການເປີດເຜີຍວ່າ: ໃນປີທຳອິດ ພູຖານມີນັກທ່ອງທ່ຽວ 300 ຄົນ ກ່ອນຕົວເລກດັ່ງກ່າວຈະເພີ່ມສູງຂຶ້ນເປັນ 315.600 ຄົນໃນປີ 2019 ເຊິ່ງເພີ່ມຂຶ້ນ 15,1% ຈາກປີກ່ອນໜ້າ.
ຜ່ານມາພູຖານລະມັດລະວັງຜົນກະທົບທີ່ຈະເກີດຈາກການເປີດຮັບນັກທ່ອງທ່ຽວຈຳນວນຫລາຍມາໂດຍຕະຫລອດເຊັ່ນ: ຫ້າມປີນພູເພື່ອຮັກສາຄວາມສັກສິດຂອງຍອດພູ ແລະ ຄ່າທຳນຽມນັກທ່ອງທ່ຽວເປັນການຈຳກັດຈຳນວນນັກທ່ອງທ່ຽວໃຫ້ເຫລືອພຽງນັກທ່ອງທ່ຽວທີ່ມີກຳລັງຈ່າຍ.
ເຖິງຢ່າງໃດກໍຕາມ, ພູຖານຫວັງຈະເພີ່ມອັດຕາສ່ວນຂອງຂອງຂະແໜງອຸດສາຫະກຳການທ່ອງທ່ຽວໃນລະບົບເສດຖະກິດມູນຄ່າ 3 ພັນລ້ານໂດລາສະຫະລັດ ຂອງປະເທດ ໂດຍເພີ່ມຈາກປະມານ 5% ເປັນ 20%.
ອະທິບໍດີກົມການທ່ອງທ່ຽວ ກ່າວວ່າ: ການຫລຸດຄ່າທຳນຽມລົງເຄິ່ງໜຶ່ງອາດຊ່ວຍເພີ່ມຈຳນວນນັກທ່ອງທ່ຽວໃນໄລຍະເດືອນກັນຍາ-ທັນວາ ເຊິ່ງຖືເປັນໄລຍະຮ້າຍແຮງຂອງການທ່ອງທ່ຽວ.
ກ່ອນໜ້ານີ້ໃນເດືອນມິຖຸນາ, ລັດຖະບານໄດ້ຫລຸດຜ່ອນກົດເກນກ່ຽວກັບໄລຍະເວລາເຂົ້າພັກ ແລະ ຄ່າທຳນຽມສຳລັບນັກທ່ອງທ່ຽວ, ແຕ່ຈຳນວນນັກທ່ອງທ່ຽວພັດບໍ່ເພີ່ມຂຶ້ນຕາມຄາດຫວັງໄວ້.
ອະທິບໍດີເປີດເຜີຍວ່າ: ນັບແຕ່ຕົ້ນປີນີ້ມີນັກທ່ອງທ່ຽວໄປທ່ຽວພູຖານຫລາຍກວ່າ 56.000 ຄົນ, ແຕ່ໃນຈຳນວນນີ້ເປັນຊາວອິນເດຍປະມານ 42.000 ຄົນ ເຊິ່ງຕ້ອງຈ່າຍຄ່າທຳນຽມພຽງ 1.200 ຣູປີອິນເດຍ (14,5 ໂດລາສະຫະລັດ) ຕໍ່ວັນເທົ່ານັ້ນ.
ປັດຈຸບັນມີຊາວພູຖານທີ່ເຮັດວຽກໃນຂະແໜງການທ່ອງທ່ຽວປະມານ 50.000 ຄົນ ເຊິ່ງສ້າງລາຍໄດ້ໃຫ້ປະເທດປະມານ 84 ລ້ານໂດລາສະຫະລັດຕໍ່ປີ ໃນໄລຍະ 3 ປີກ່ອນເກີດການລະບາດໃຫຍ່.
ອ້າງອີງ:
