ອິນເດຍສັ່ງເກັບພາສີສົ່ງອອກເຂົ້າ 20% ມີຜົນທັນທີ ຄາດດັນລາຄາຕະຫລາດໂລກເພີ່ມຂຶ້ນ
ອິນເດຍບັງຄັບໃຊ້ມາດຕະການຄວບຄຸມການສົ່ງອອກເຂົ້າເພີ່ມຂຶ້ນ ເພື່ອຮັບປະກັນຄວາມໝັ້ນຄົງດ້ານອາຫານໃນປະເທດ ໂດຍການເຄື່ອນໄຫວຫລ້າສຸດຂອງອິນເດຍ ເຊິ່ງເປັນຜູ້ສົ່ງອອກເຂົ້າຊັ້ນນຳນັ້ນ ມີທ່າອ່ຽງຈະເຮັດໃຫ້ປະລິມານເຂົ້າທົ່ວໂລກຫລຸດລົງອີກ.
ກະຊວງການເງິນອິນເດຍປະກາດໃນວັນທີ 25 ສິງຫາວ່າ: ລັດຖະບານໄດ້ເກັບພາສີ 20% ສຳລັບການສົ່ງອອກເຂົ້າ ໂດຍມີຜົນບັງຄັບໃຊ້ທັນທີ. ປັດຈຸບັນ ອິນເດຍໄດ້ຈຳກັດການຂະຫຍາຍເຂົ້າທັງໝົດທີ່ບໍ່ແມ່ນພັນບາສມາຕິໃນຕ່າງປະເທດທັງໝົດ ປະມານ 80% ຂອງການສົ່ງອອກເຂົ້າທັງໝົດ ແລະ ອິນເດຍມີສ່ວນແບ່ງຕະຫລາດໃນການຄ້າເຂົ້າທົ່ວໂລກປະມານ 40%.
ສຳນັກຂ່າວບລູມເບິກລາຍງານວ່າ: ລາຄາເຂົ້າໃນອາຊີເພີ່ມຂຶ້ນສູງສຸດໃນຮອບເກືອບ 15 ປີໃນຕົ້ນເດືອນນີ້ ແລະ ອາດປັບສູງຂຶ້ນອີກ ສົ່ງຜົນໃຫ້ຕົ້ນທຶນຂອງປະເທດຜູ້ນຳເຂົ້າເຊັ່ນ: ຟີລິບປິນ ແລະ ບາງປະເທດໃນອາຟຣິກາ ເພີ່ມສູງຂຶ້ນ.
ທັງນີ້, ມາດຕະການກີດກັນທາງການຄ້າຫລ້າສຸດຂອງອິນເດຍສອດຄ່ອງກັບຄວາມພະຍາຍາມທາງບຸກທີ່ຈະຫລຸດລາຄາອາຫານໃນປະເທດກ່ອນການເລືອກຕັ້ງທົ່ວໄປໃນຕົ້ນປີໜ້າ ເຊິ່ງນາຍົກລັດຖະມົນຕີ ນາເຣນທຣາ ໂມດີ ຈະລົງສະໝັກເລືອກຕັ້ງເປັນສະໄໝທີ 3.
ປະທານສະມາຄົມຜູ້ສົ່ງອອກເຂົ້າຂອງອິນເດຍເປີດເຜີຍວ່າ: “ຈາກການເຄື່ອນໄຫວນີ້ ລາຄາເຂົ້າໃນປະເທດຈະຫລຸດລົງ ແລະ ນັ້ນຈະຊ່ວຍລັດຖະບານໃນການຄວບຄຸມອັດຕາເງິນເຟີ້ດ້ານອາຫານ”.
