ຍີ່ປຸ່ນ ໃຫ້ທຶນຊ່ວຍເຫລືອ ກໍ່ສ້າງໂຮງຮຽນປະຖົມບ້ານຜາຫລວງ ເມືອງເຟືອງ ແຂວງວຽງຈັນ ມູນຄ່າ72.873 ໂດລາ
ວັນທີ 25 ສິງຫາ 2023 ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອ ໃນການສະໜັບສະໜູນໂຄງການດ້ານການສຶກສາເພື່ອປັບປຸງສະພາບການຮ່ຳຮຽນ-ສິດສອນຂອງນັກຮຽນ ແລະ ຄູ-ອາຈານໃນແຂວງວຽງຈັນ ເຊິ່ງຕາງໜ້າເຊັນສັນຍາ ລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ຜູ້ກ່ຽວຂ້ອງຈາກແຂວງເປົ້າໝາຍ ໂດຍມີ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ເປັນສັກຂີພິຍານ ພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP).ໂຄງການຈະໃຫ້ການສະໜັບສະໜູນທຶນຮອນເພື່ອກໍ່ສ້າງອາຄານຮຽນ ແລະ ຫ້ອງນ້ຳໃໝ່, ພ້ອມທັງສະໜອງອຸປະກອນເຄື່ອງໃຊ້ໃຫ້ແກ່ໂຮງຮຽນປະຖົມສົມບູນ ບ້ານຜາຫຼວງ ເມືອງເຟືອງ, ແຂວງວຽງຈັນ ເປັນມູນຄ່າ 72.873 ໂດລາ ເພື່ອປະກອບສ່ວນເຂົ້າໃນການປັບປຸງສະພາບແວດລ້ອມການສຶກສາ ແລະ ສະພາບສຸຂະອານະໄມຂອງໂຮງຮຽນດັ່ງກ່າວ.
ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ກ່າວວ່າ: ຕະຫລອດໄລຍະຫລາຍປີຜ່ານມາ ປະເທດຍີ່ປຸ່ນໄດ້ປະກອບສ່ວນເຂົ້າໃນວຽກງານພັດທະນາເສດຖະກິດ-ສັງຄົມຂອງແຂວງໃນຫລາຍດ້ານເຊັ່ນ: ດ້ານກະສິກຳ, ການສຶກສາ, ສາທາລະນະສຸກ ລວມເຖິງການປົກປັກຮັກສາສິ່ງແວດລ້ອມ ແລະ ການຊ່ວຍເຫລືອອັນລ້ຳຄ່າໃນຄັ້ງນີ້ ມີຄວາມສຳຄັນຢ່າງຍິ່ງທີ່ຈະຊ່ວຍໃຫ້ແຂວງວຽງຈັນ ສາມາດສ້າງສະພາບແວດລ້ອມທີ່ມີຄວາມປອດໄພ ແລະ ຮັບປະກັນໃຫ້ນັກຮຽນມີຜົນການຮຽນທີ່ດີຍິ່ງຂຶ້ນ ຊຶ່ງຈະເປັນການປະກອບສ່ວນໃນການສ້າງຊັບພະຍາກອນມະນຸດມີຄຸນະພາບ ທີ່ຈະກາຍເປັນອະນາຄົດຂອງຊາດໃນພາຍພາກໜ້າ.
ທ່ານ ໂຄບະຢະຊິ ເຄັນອິຈິ ກ່າວວ່າ: “ໂຮງຮຽນປະຖົມບ້ານຜາຫລວງ ແມ່ນມີອາຄານຮຽນເກົ່າ ທີ່ເປ່ເພຢ່າງໜັກໜ່ວງ ດັ່ງນັ້ນ, ຈຶ່ງມີຄວາມຈຳເປັນຕ້ອງໄດ້ຮີບຮ້ອນ ແກ້ໄຂບັນຫາເພື່ອຄວາມປອດໄພຂອງຄູ ແລະ ນັກຮຽນ, ໃນຂະນະດຽວກັນ, ຈຳນວນຫ້ອງນ້ຳກໍບໍ່ພຽງພໍຕໍ່ຈຳນວນນັກຮຽນ ເຮັດໃຫ້ມີຄວາມກັງວົນເຖິງສະພາບ ສຸຂະອະນະໄມຢູ່ໃນໂຮງຮຽນດັ່ງກ່າວ”.
