ຜູ້ນຳຄົນໃໝ່ຂອງກຳປູເຈຍຕັ້ງເປົ້າ “ເປັນປະເທດລາຍໄດ້ສູງ” ພາຍໃນປີ 2050
ນາຍົກລັດຖະມົນຕີຄົນໃໝ່ຂອງກຳປູເຈຍ ປະກາດເປົ້າໝາຍໄປສູ່ການເປັນປະເທດ “ທີ່ມີລາຍໄດ້ສູງ” ໃນອີກ 27 ປີຕໍ່ໜ້າ.
ວັນທີ 24 ສິງຫາ 2023, ສຳນັກຂ່າວຕ່າງປະເທດລາຍງານວ່າ: ພົນເອກ ຮຸນ ມາເນດ ນາຍົກລັດຖະມົນຕີກຳປູເຈຍ ເປັນປະທານກອງປະຊຸມຄະນະລັດຖະບານຄັ້ງທຳອິດ ໃນວັນທີ 24 ສິງຫາຜ່ານມາ ຫລັງຮັບຕຳແໜ່ງຢ່າງເປັນທາງການໃນວັນທີ 22 ສິງຫາ.
ທັງນີ້, ພົນເອກ ຮຸນ ມາເນດ ກ່າວເຖິງ “ການປະຕິຮູບເສດຖະກິດເປັນວົງກວ້າງ” ເພື່ອບັນລຸເປົ້າໝາຍໃນການເຮັດໃຫ້ກຳປູເຈຍ “ເປັນປະເທດທີ່ມີລາຍໄດ້ສູງ” ພາຍໃນປີ 2050 ຈຶ່ງຖືໄດ້ວ່າ 25 ປີຕໍ່ຈາກນີ້ຖືເປັນ “ໄລຍະເວລາແຫ່ງການປ່ຽນແປງທີ່ສຳຄັນຂອງກຳປູເຈຍ” ໂດຍຜູ້ນຳກຳປູເຈຍໃຫ້ຄຳໝັ້ນເພີ່ມການເຂົ້າເຖິງທາງສາທາລະນະສຸກ ແລະ ການສຶກສາ ຕະຫລອດຈົນການເພີ່ມຄວາມຈິງຈັງໃນການຮັບມື ແລະ ແກ້ໄຂສະຖານະການທ່າມກາງສະພາບການປ່ຽນແປງຂອງສະພາບອາກາດໂລກ.
ນອກຈາກນີ້, ຜູ້ນຳກຳປູເຈຍກ່າວເຖິງ ເປົ້າໝາຍການເຕີບໃຫຍ່ທາງເສດຖະກິດຂອງປະເທດໃຫ້ສະເລ່ຍຢູ່ປີລະ 7%, ເນັ້ນການຫລຸດຄວາມທຸກຍາກ ແລະ ຄວາມປອດໄພທາງອາຫານ, ຕ້ອງຄວບຄຸມຊາວກຳປູເຈຍທົ່ວປະເທດ ໂດຍເນັ້ນວ່າ: “ຈະບໍ່ມີການຖິ້ມໃຜໄວ້ທາງຫລັງ”.
