ອິນເດຍ ລົງຈອດຍານສໍາຫລວດ Chandrayaan-3 ບໍລິເວນຂົ້ວໃຕ້ຂອງດວງຈັນສໍາເລັດຕາມກໍານົດການ
ສຳນັກຂ່າວຕ່າງປະເທດລາຍງານ: ວັນທີ 23 ສິງຫາ 2023, ປະເທດອິນເດຍ ສາມາດລົງຈອດ ຍານສໍາຫຼວດ “ຈັນທຣາຍານ-3” (Chandrayaan-3) ບໍລິເວນຂົ້ວໃຕ້ຂອງດວງຈັນໄດ້ສໍາເລັດຕາມກໍານົດການ ໃນເວລາ 18:04 ນາທີ, ຫລັງຈາກສາມາດເຂົ້າສູ່ວົງໂຄຈອນຂອງດວງຈັນໄດ້ສໍາເລັດ.
ການລົງຈອດຂອງຍານສໍາຫລວດ ຈັນທຣາຍານ-3 ໃນຄັ້ງນີ້ເຮັດໃຫ້ ປະເທດອິນເດຍກາຍເປັນປະເທດທີ 4 ຂອງໂລກທີ່ສາມາດປະສົບຜົນສໍາເລັດ ໃນການສົ່ງຍານອາວະກາດໄປດວງຈັນ ຕໍ່ຈາກສະຫະລັດອາເມຣິກາ, ຮັດເຊຍ ແລະ ຈີນ. ນອກຈາກນີ້, ອິນເດຍກາຍເປັນປະເທດທໍາອິດຂອງໂລກທີ່ສາມາດສົ່ງຍານສໍາຫລວດ ລົງຈອດບໍລິເວນຂົ້ວໃຕ້ຂອງດວງຈັນໄດ້ສໍາເລັດອີກດ້ວຍ.
ປະເທດອິນເດຍ ໄດ້ເລີ່ມພາລະກິດສໍາຫລວດດວງຈັນຄັ້ງທໍາອິດໃນປີ 2008 ດ້ວຍການສົ່ງຍານສໍາຫລວດ ຈັນທຣາຍານ-1 ອອກນອກໂລກເພື່ອມຸ່ງໜ້າໄປຍັງດວງຈັນ ເຊິ່ງພາຍໃນຄັ້ງນັ້ນແມ່ນສາມາດເຂົ້າສູ່ວົງໂຄຈອນຂອງດວງຈັນໄດ້ສໍາເລັດ. ຕໍ່ມາໃນປີ 2019 ອິນເດຍໄດ້ສົ່ງຍານສໍາຫລວດລໍາທີສອງ ຂຶ້ນສູ່ດວງຈັນອີກຄັ້ງ ດ້ວຍຍານສໍາຫລວດທີ່ມີຊື່ວ່າ ຈັນທຣາຍານ-2 ເເຕ່ພາຍໃນຄັ້ງນັ້ນຍານສໍາຫລວດລໍາດັ່ງກ່າວ ແມ່ນຍັງບໍ່ທັນສາມາດລົງຈອດເທິງພື້ນຜິວດວງຈັນໄດ້ສໍາເລັດ ເນື່ອງຈາກໄດ້ເກີດການຂາດການຕິດຕໍ່ໃນເວລາໃກ້ລົງຈອດ. ຕໍ່ກັບຄວາມຜິດພາດເຫລົ່ານັ້ນ ເຮັດໃຫ້ອິນເດຍໄດ້ເລີ່ມມີການປັບປຸງ ແລະ ພັດທະນາລະບົບຕ່າງໆ ຂອງຍານສໍາຫລວດລໍາໃໝ່ທີ່ມີຊື່ວ່າ ຈັນທຣາຍານ-3 ແລະ ໄດ້ເລີ່ມສົ່ງຍານລໍານີ້ອອກຈາກນອກໂລກໃນວັນທີ 14 ກໍລະກົດ 2023 ເພື່ອມຸ່ງໜ້າໄປຍັງດວງຈັນອີກຄັ້ງ.
#ຂ່າວຕ່າງປະເທດລາວພັດທະນາ #ອິນເດຍ #ລົງຈອດຍານສໍາຫລວດດວງຈັນສຳເລັດ
