ການກໍ່ສ້າງປ້ອງກັນຕາຝັ່ງເຈື່ອນ ແຄມຂອງ ໃຫ້ສຳເລັດປີ 2025 ຕ້ອງໃຊ້ງົບປະມານ 2.380 ຕື້້ກວ່າກີບ ຄາດວ່າຈະບໍ່ບັນລຸຕາມແຜນ
ທ່ານ ງາມປະສົງ ເມືອງມະນີ ລັດຖະມົນຕີກະຊວງ ຍທຂ ໃຫ້ຮູ້ວ່າ: ສະພາບຝັ່ງແມ່ນໍ້າຂອງ ແລະ ນໍ້າເຫືອງ ທີ່ເປັນຊາຍແດນລະຫວ່າງປະເທດ ຖືກເຊາະເຈື່ອນຢ່າງຮ້າຍແຮງ ເນື່ອງຈາກການປ່ຽນແປງຂອງທຳມະຊາດ ແລະ ມະນຸດເປັນຜູ້ສ້າງຂຶ້ນດ້ວຍຮູບການຕ່າງໆເປັນຕົ້ນ: ການຂຸດຄົ້ນແຮ່ທາດ, ການດູດຫີນ-ດູດຊາຍ ຕາມລຳແມ່ນໍ້າຂອງ ແລະ ການກໍ່ສ້າງກິດຈະກຳຕ່າງໆທີ່ຍື່ນອອກໄປຕາມແຄມແມ່ນໍ້າ ເຮັດໃຫ້ກະແສນໍ້າມີການປ່ຽນແປງກະທົບໃສ່ຕາຝັ່ງຢ່າງຮ້າຍແຮງ ໂດຍສະເພາະຢູ່ຝັ່ງເຮົາ ແລະ ອື່ນໆ, ເພື່ອສືບຕໍ່ຈັດຕັ້ງປະຕິບັດວຽກງານການກໍ່ສ້າງປ້ອງກັນຕາຝັ່ງເຈື່ອນ ຊຶ່ງມີຄວາມຍາວ 514 ກິໂລໃຫ້ມີຄວາມຄືບໜ້າ ແລະ ບັນລຸຕາມແຜນທີ່ກຳນົດໄວ້ ເມື່ອຮອດປີ 2025 ຕ້ອງໄດ້ນຳໃຊ້ງົບປະ ມານເຖິງ 2.380 ຕື້ກີບ, ທຶນຕ່າງປະເທດ 1.130 ລ້ານໂດລາ, ເພາະການຂົນຂວາຍທຶນຈາກແຫຼ່ງທຶນຕ່າງໆໃນເຮົາຍັງມີຂອບເຂດຈຳກັດ.
ຜ່ານມາ, ກະຊວງ ຍທຂ ເຄີຍສະເໜີຫາລັດຖະບານເພື່ອເອົາວຽກງານປ້ອງກັນຕາຝັ່ງເຈື່ອນຕາມລຳແມ່ນໍ້າຂອງ ແລະ ນໍ້າເຫືອງເຂົ້າເປັນໂຄງການບຸລິມະສິດຂອງລັດຖະ ບານ ເພື່ອຈັດສັນງົບປະ ມານໃຫ້ພຽງພໍຕອບສະໜອງກັບຄວາມຮຽກຮ້ອງຕ້ອງການ.
ນອກນີ້ຍັງໄດ້ກຳນົດໂຄງ ການຮ່ວມມືກັບສະຖາບັນການເງິນໂດຍສະເພາະທະນາຄານໂລກ, ທະນາຄານພັດທະນາອາຊີ ລວມທັງຂອບ 2 ຝ່າຍກັບອົງການອຸຍນີເຊັບ, ໄດ້ສ້າງໂຄງການປ້ອງກັນຕາຝັ່ງເຈື່ອນຢູ່ນະຄອນຫຼວງວຽງຈັນ, ສະຫວັນນະເຂດ, ຈຳປາສັກ, ຄຳມ່ວນ, ບໍ່ແກ້ວ, ບໍລິຄຳໄຊ, ອຸດົມໄຊ, ແຂວງວຽງຈັນ ແລະ ແຂວງຫຼວງພະບາງ.
ທີ່ມາ: ໜັງສືພິມປະຊາຊົນ
