ຕ້ອງເພີ່ມຄວາມສາມາດໃນການຄຸ້ມຄອງສິນຄ້າ ຢຸດຕິການສົ່ງອອກຊັບພະຍາກອນທີ່ເປັນວັດຖຸດິບ (ຖ້າບໍ່ຈໍາເປັນ) ເພີ່ມການສົ່ງອອກຜະລິດຕະພັນສໍາເລັດຮູບ.

ໃນໂອກາດທີ່ ທ່ານ ອາດສະພັງທອງ ສີພັນດອນ ທ່ານເຈົ້າຄອງນະຄອນຫຼວງວຽງຈັນ ລົງຊີ້ນໍາການຈັດຕັ້ງ ປະຕິບັດວຽກງານຂົງເຂດອຸດ ສາຫະກໍາ ແລະ ການຄ້າ ໃນວັນທີ 22 ສິງຫາ 2023, ທ່ານໄດ້ເນັ້ນໜັກໃຫ້ພະແນກອຸດສາຫະກໍາ ແລະ ການຄ້ານະຄອນຫລວງວຽງຈັນ ເອົາໃຈໃສ່ວຽກງານຕ່າງໆ ເພື່ອເປັນປັດໄຈຊຸກຍູ້ການຜະລິດໃຫ້ຂະຫຍາຍຕົວ ໂດຍຕິດພັນກັບລາຄາສິນຄ້າໃນຕະຫຼາດໃນຕົວເມືອງ ໃນນັ້ນ ຕ້ອງເພີ່ມຄວາມສາມາດໃນການຄຸ້ມຄອງສິນຄ້າ ຢຸດຕິການສົ່ງອອກຊັບພະຍາກອນທີ່ເປັນວັດຖຸດິບ (ຖ້າບໍ່ຈໍາເປັນ) ເພີ່ມການສົ່ງອອກຜະລິດຕະພັນສໍາເລັດຮູບ, ສ້າງກົນໄກ ແລະ ລະບຽບຈໍລະຈອນສິນຄ້າໃຫ້ສະດວກ ວ່ອງໄວ ແລະ ສາມາດ ເຊື່ອມໂຍງກັບປະເທດໄກ້ຄຽງ ແລະ ປະເທດ ອື່ນໆ.

ສະນັ້ນ, ໃນເງື່ອນໄຂທີ່ປະເທດຊາດກໍາລັງຜະເຊີນໜ້າກັບສິ່ງທ້າທ້າຍ ທາງດ້ານເສດຖະກິດ, ການເງິນ, ສິນຄ້າ, ເງິນຕາ, ໄພຫວ່າງງານ ນໍ້າມັນເຊື້ອໄຟແພງ ຈຶ່ງຮຽກຮ້ອງໃຫ້ສະມາຊິກພັກ, ພະນັກງານ-ລັດຖະກອນ ຕ້ອງໄດ້ເພີ່ມຄວາມເຂັ້ມແຂງໃນການປະຕິບັດໜ້າທີ່ຂອງຕົນໃຫ້ມີ ຄວາມຮັບຜິດຊອບສູງແທ້ໆ ເພື່ອໃຫ້ປະຊາຊົນ ຜູ້ປະກອບການຈະຜ່ານວິກິດໃນໄລຍະປະເທດຊາດ ພວມຕົກຢູ່ໃນຄວາມຝືດເຄືອງທາງດ້ານເສດຖະກິດ, ຂະແໜງການຄ້າ ຕ້ອງເປັນເຈົ້າການໃນການຄຸ້ມຄອງດັດປັບລາຄາສິນຄ້າ ທັງພາຍໃນ ແລະ ຕ່າງປະເທດ ໃຫ້ຢູ່ໃນເກນທີ່ພວກ ເຂົາເຈົ້າສາມາດແກ່ງແຍ່ງໄດ້ ສິ່ງສໍາຄັນແມ່ນສາມາດຄໍ້າປະກັນຄວາມ ໜັ້ນທ່ຽງທາງດ້ານສະບຽງອາຫານໃຫ້ໄດ້.

ພ້ອມດຽວກັນນີ້ ກໍເປັນໄລຍະທີ່ຊາວກະສິກອນທົ່ວ ນວ ພວມຂຸ້ນຂ້ຽວສຸມໃສ່ບົວລະບັດຮັກສາ ຜົນຜະລິດລະດູຝົນ ສະເພາະ ພືດສວນຄົວ ແມ່ນຜະລິດອອກສູ່ຕະຫຼາດ ເປັນປົກກະຕິ, ຂະແໜງ ອຄ ຕ້ອງໄດ້ລົງຕິດຕາມ ການເໜັງຕີງຂອງລາຄາສິນຄ້າ ທີ່ຊາວກະສິກອນຜະລິດ ບໍ່ໃຫ້ແມ່ຄ້າເອົາປຽບລາຄາສິນຄ້າຕໍ່າເກີນລາຄາກໍານົດໄວ້ ພ້ອມທັງໃຫ້ລົງຊ່ວຍຊາວກະສິກອນ ຜູ້ຜະລິດແທ້ໆ.