ອິຕາລີລົງທຶນເກືອບ 3 ລ້ານເອີໂຣ ແກ້ໄຂບັນຫາ “ປູມ້າ” ບຸກແຫລ່ງນ້ຳ
ອິຕາລີພົບບັນຫາຝູງປູມ້າບຸກລຸກຊາຍຝັ່ງ ແລະ ລາກູນຫລາຍແຫ່ງໃນປະເທດ ກາຍເປັນບັນຫາເລື່ອງສິ່ງແວດລ້ອມ ແລະ ເສດຖະກິດທີ່ລັດຖະບານຕ້ອງຈັດສັນງົບປະມານເກືອບ 3 ລ້ານເອີໂຣ ເພື່ອຫລຸດຈຳນວນສັດນ້ຳປະເພດນີ້.
ເມື່ອຕົ້ນເດືອນສິງຫາຜ່ານມາ, ອິຕາລີຕ້ອງປະສົບບັນຫາ “ປູມ້າ” ຈຳນວນມະຫາສານບຸກລຸກຊາຍຝັ່ງ ແລະ ແອ່ງນ້ຳລາກູນໃນຫລາຍພື້ນທີ່ ສ້າງຄວາມເສຍຫາຍຕໍ່ສະພາບແວດລ້ອມ ແລະ ເປັນອັນຕະລາຍຕໍ່ສັດນ້ຳປະເພດອື່ນ ຈົນຕ້ອງຈັດງົບປະມານ 2,9 ລ້ານເອີໂຣ ເພື່ອແກ້ໄຂບັນຫາ.
ເມື່ອກ່ອນ ປູມ້າອາໄສຢູ່ໃນມະຫາສະໝຸດອັດລັງຕິກເບື້ອງຕາເວັນຕົກ ແລະ ເລີ່ມລຸກລາມເຂົ້າມາຫາກິນໃນແອ່ງນ້ຳລາກູນແຄມຝັ່ງທະເລຂອງອິຕາລີຫລາຍແຫ່ງ ພວກມັນລ່າເຫຍື່ອທີ່ເປັນສັດນ້ຳໃນທ້ອງຖິ່ນເຊັ່ນ: ຫອຍ, ໄຂ່ປາເປັນຈຳນວນຫລາຍ. ນັກວິທະຍາສາດທາງທະເລລະບຸວ່າ: ລູກຫອຍປະມານ 90% ຖືກພວກມັນຈັບກິນ.
ອິຕາລີຕ້ອງເລັ່ງແກ້ໄຂບັນຫາຢ່າງຮີບດ່ວນ ເນື່ອງຈາກເປັນປະເທດຜູ້ນຳດ້ານການສົ່ງອອກຫອຍທະເລ ແລະ ພຶດຕິກຳການກິນຂອງປູມ້າເຫລົ່ານີ້ ສ້າງຄວາມເສຍຫາຍຕໍ່ອຸດສາຫະກຳໂດຍລວມ. ທັງນີ້ ມີຟາມຫອຍທີ່ໄດ້ຮັບຄວາມເສຍຫາຍຢ່າງໜັກຈາກເຫດການປູມ້າບຸກນີ້ ຄືຟາມທີ່ຢູ່ໃນບໍລິເວນສາມຫລ່ຽມປາກແມ່ນ້ຳໂປ ທາງຕອນເໜືອຂອງອິຕາລີ ເຊິ່ງກຳລັງຈະໄດ້ຮັບເງິນຊ່ວຍເຫລືອຢ່າງຮີບດ່ວນຈາກລັດຖະບານ.
ນອກຈາກນີ້, ງົບປະມານ 2,9 ລ້ານເອີໂຣ ຈະຖືກຈັດສັນໃຫ້ອົງກອນດ້ານການປະມົງ ແລະ ຟາມສັດທະເລ ໄປໃຊ້ໃນມາດຕະການປ້ອງກັນການເພີ່ມຈຳນວນປະຊາກອນປູມ້າ ດ້ວຍການເປີດໂຄງການຕຶກເບັດ ແລະ ການປະມົງຄັ້ງໃຫຍ່ ໂດຍຊາວປະມົງທີ່ຢູ່ໃນພື້ນທີ່ທີ່ໄດ້ຮັບຜົນກະທົບ ສາມາດເອົາປູມ້າໃຫ້ຫລາຍທີ່ສຸດເທົ່າທີ່ຈະເຮັດໄດ້ ເພື່ອຫລຸດຈຳນວນປູລົງ.
ຕາມລາຍງານຂອງໜ່ວຍງານດ້ານການປະມົງວ່າ: ມີການຈັບປູມ້າວັນລະ 12 ໂຕນ ໃນພື້ນທີ່ສາມຫລ່ຽມປາກແມ່ນ້ຳໂປ. ແຕ່ນັ້ນກໍຫລຸດຈຳນວນປູມ້າທີ່ບຸກລຸກແຫລ່ງນ້ຳໄດ້ພຽງໜ້ອຍດຽວ.
