ຈີນເດີນໜ້າແຜນຣີໄຊເຄິລອຸປະກອນພະລັງງານລົມ-ແສງຕາເວັນ ຫວັງຊ່ວຍສິ່ງແວດລ້ອມໂລກ

ຄະນະກຳມະການປະຕິຮູບ ແລະ ການພັດທະນາແຫ່ງຊາດຈີນ ເປີດເຜີຍໃນວັນທີ 17 ສິງຫາວ່າ: ກຸ່ມໜ່ວຍງານທາງການຈີນໄດ້ເຜີຍແພ່ແນວທາງປະຕິບັດເພື່ອສົ່ງເສີມການຣີໄຊເຄິລອຸປະກອນພະລັງງານລົມ ແລະ ພະລັງງານແສງຕາເວັນທີ່ເລີກໃຊ້ແລ້ວ.

ແນວປະຕິບັດເບື້ອງຕົ້ນລະບຸວ່າ: ຈີນຈະສ້າງລະບົບຣີໄຊເຄິລອຸປະກອນພະລັງງານລົມ ແລະ ພະລັງງານແສງຕາເວັນ ເຊິ່ງຄວບຄຸມການອອກແບບອັນເປັນມິດຕໍ່ສິ່ງແວດລ້ອມ, ການຣີໄຊເຄິລທີ່ໄດ້ມາດຕະຖານ, ການໃຊ້ປະໂຫຍດທີ່ມີມູນຄ່າສູງ, ການກຳຈັດຖິ້ມທີ່ບໍ່ເປັນອັນຕະລາຍ ແລະ ຈຸດເຊື່ອມໂຍງອື່ນໆໃນຕ້ອງໂຊ້ຣີໄຊເຄິລ.

ນອກຈາກນັ້ນ ແນວປະຕິບັດຍັງກຳນົດ 6 ພັນທະກິດຕົ້ນຕໍ່ ໄດ້ແກ່ ການສົ່ງເສີມການອອກແບບທີ່ເປັນມິດຕໍ່ສິ່ງແວດລ້ອມຢ່າງຈິງຈັງ, ການຈັດຕັ້ງ ແລະ ປັບປຸງກົນໄກຄວາມຮັບຜິດຊອບກຳຈັດອຸປະກອນທີ່ເລີກໃຊ້ແລ້ວ, ການພັດທະນາລະບົບຣີໄຊເຄິລອຸປະກອນ, ການເສີມສ້າງປະສິດທິພາບການຣີໄຊເຄິລຊັບພະຍາກອນ, ການສົ່ງເສີມການຜະລິດອຸປະກອນຢ່າງຮອບຄອບ ແລະ ການສ້າງມາດຕະຖານກຳຈັດຂີ້ເຫຍື້ອທີ່ບໍ່ເປັນອັນຕະລາຍ.

ຄະນະກຳມະການດັ່ງກ່າວລະບຸວ່າ: ອຸດສາຫະກຳພະລັງງານໃໝ່ຂອງຈີນພັດທະນາຢ່າງວ່ອງໄວ ໂດຍມີກຳລັງການຕິດຕັ້ງພະລັງງານລົມ ແລະ ແສງຕາເວັນເປັນອັນດັບໜຶ່ງຂອງໂລກ ເຊິ່ງການເລັ່ງຍົກລະດັບທາງອຸດສາຫະກຳ ແລະ ການປ່ຽນອຸປະກອນໃໝ່ຈະນຳໄປສູ່ບັນຫາມີອຸປະກອນພະລັງງານໃໝ່ທີ່ເລີກໃຊ້ແລ້ວປະລິມານຫລາຍ.

ໂດຍຂໍ້ມູນຈາກທາງການຈີນຊີ້ວ່າ: ກຳລັງການຕິດຕັ້ງພະລັງງານລົມຂອງຈີນສູງເຖິງ 380 ລ້ານກິໂລວັດ, ສ່ວນກຳລັງການຕິດຕັ້ງພະລັງງານແສງຕາເວັນມີ 440 ລ້ານກິໂລວັດ ໄລ່ຮອດເດືອນເມສາຜ່ານມາ ເຊິ່ງຖ້ານຳເອົາຕົວເລກທັງສອງລວມກັນຈະຄິດເປັນ 30,9% ຂອງກຳລັງການຜະລິດຕິດຕັ້ງພະລັງງານຂອງປະເທດຈີນ.

ອ້າງອີງ: Xinhua News Agency