ນັກເຕະບານຍິງ ທີ່ຕົກຮອບ 8 ທີມສຸດທ້າຍ ບານໂລກ ເພດຍິງ 2023 ໄດ້ຮັບເງິນລາງວັນປອບໃຈຜູ້ລະ 9 ໝື່ນໂດລາ
August 15, 2023 - 10:19 AM
ສະຫະພັນບານເຕະນາໆຊາດ ຫລື ຟີຟ້າ ແລະ ປະເທດເຈົ້າພາບ ໄດ້ເປີດເຜີຍວ່າ: ທີມທີ່ຕົກຮອບ 8 ທີມສຸດທ້າຍ ເຕະບານຍິງ ຊິງແຊ້ມໂລກ 2023 ທີ່ປະເທດອົດສະຕຣາລີ ແລະ ນິວຊີແລນ (ນູແວນເຊລັງ) ເປັນເຈົ້າພາບຮ່ວມກັນ ໃນລະຫວ່າງວັນທີ 20 ກໍລະກົດ – 20 ສິງຫາ 2023 ນີ້ ໂດຍນັກກິລາແມ່ນໄດ້ຮັບມອບເງິນລາງວັນປອບໃຈຜູ້ລະ 9 ໝື່ນໂດລາສະຫະລັດ ຫລື ປະມານ 1 ຕື້ 750 ກວ່າລ້ານກີບ, ສ່ວນສະຫະພັນ ຫລື ສະມາຄົມບານເຕະ ໄດ້ຮັບທີມລະ 2 ລ້ານ 180,000 ໂດລາ.
ຂະນະທີ່ ທີມທີ່ຜ່ານເຂົ້າສູ່ຮອບ 4 ທີມສຸດທ້າຍ, ທີມແຊ້ມຈະໄດ້ຮັບເງິນລາງວັນ 10.5 ລ້ານໂດລາສະຫະລັດ, ນັກກິລາຈະໄດ້ຮັບຜູ້ລະ 270,000 ໂດລາ ແລະ ສະມາຄົມ ຫລື ສະຫະພັນຈະໄດ້ຮັບ 4.29 ລ້ານໂດລາ.ທີມຮອງແຊ້ມໂລກ ນັກກິລາຈະໄດ້ຮັບຜູ້ລະ 195,000 ໂດລາ, ສະມາຄົມ ຫລື ສະຫະພັນ ຈະໄດ້ຮັບ 3 ລ້ານ 15,000 ໂດລາ. ອັນດັບ 3 ນັກກິລາຈະໄດ້ຮັບຜູ້ລະ 185,000 ໂດລາ, ສະມາຄົມ ຫລື ສະຫະພັນ ຈະໄດ້ຮັບ 2 ລ້ານ 610,000 ໂດລາ, ອັນດັບ 4 ນັກກິລາຈະໄດ້ຮັບຜູ້ລະ 165,000 ໂດລາ, ສະມາຄົມ ຫລື ສະຫະພັນ ຈະໄດ້ຮັບ 2 ລ້ານ 450,000 ໂດລາ.
