ແຂວງຜົ້ງສາລີ ແຈ້ງໂຈະຊົ່ວຄາວ!! ໃນການເຄື່ອນຍ້າຍ ແລະ ນຳເຂົ້າງົວ-ຄວາຍ ເນື່ອງຈາກ ມີການແຜ່ລະບາດຂອງພະຍາດເຕົ້າໂຮມເລືອດ

ຫ້ອງວ່າການແຂວງຜົ້ງສາລີ ໄດ້ອອກແຈ້ງການເລກທີ 221/ຫວຂ ລົງວັນທີ 9 ສິງຫາ 2023 ກ່ຽວກັບການນໍາເຂົ້າງົວ-ຄວາຍ ຈາກຕ່າງແຂວງ ແລະ ເຄື່ອນຍ້າຍພາຍໃນແຂວງນັ້ນ, ເນື່ອງຈາກວ່າມາໃນຕົ້ນເດືອນກໍລະກົດ 2023 ນີ້ ໄດ້ເກີດມີການລະບາດພະຍາດເຕົ້າໂຮມເລືອດ ງົວ-ຄວາຍ ຢູ່ບ້ານບາການ້ອຍ, ບ້ານສາລາເອເບ ແລະ ບ້ານສາມາຄີ ເມືອງຜົ້ງສາລີ ແລະ ບ້ານຫ້ວຍຍື່ງ ເມືອງບຸນເໜືອ ແຂວງຜົ້ງສາລີ. ສະນັ້ນ, ເພື່ອເປັນການສະກັນກັ້ນ ແລະ ຄວບຄຸມການແຜ່ລະບາດ ຂອງພະຍາດດັ່ງກ່າວ ບໍ່ໃຫ້ແຜ່ອອກເປັນວົງກວ້າງ ແລະ ຫລຸດຜ່ອນຜົນກະທົບໂດຍກົງ ແລະ ທາງອ້ອມ ຕໍ່ການລ້ຽງສັດ ຂອງປະຊາຊົນບັນດາເຜົ່າ ແລະ ຜູ້ປະກອບການໃນ ທົ່ວແຂວງນັ້ນ, ຈຶ່ງໃຫ້ໂຈະການນໍາເຂົ້າ ງົວຄວາຍ ຈາກຕ່າງແຂວງ ແລະ ຫ້າມເຄື່ອນຍ້າຍພາຍໃນແຂວງ ຊົ່ວຄາວກ່ອນ ໂດຍ ໃຫ້ປະຕິບັດດັ່ງນີ້:

1. ເລີ່ມແຕ່ວັນທີ 7 ສິງຫາ 2023 ເປັນຕົ້ນໄປແມ່ນໃຫ້ໂຈະການນໍາເຂົ້າງົວ-ຄວາຍ ເປັນການຊົ່ວຄາວ ຈາກຕ່າງແຂວງ ແລະ ຫ້າມເຄື່ອນຍ້າຍພາຍໃນແຂວງກ່ອນ ຈົນກ່ວາການລະບາດພະຍາດ ເຕົ້າໂຮມເລືອດ ງົວ-ຄວາຍ ຈະຫລຸດລົງ ແລະ ກັບຄືນສູ່ສະພາບປົກກະຕິ ຈຶ່ງຈະມີແຈ້ງການໃນການອະນຸຍາດໃຫ້ນໍາເຂົ້າເປັນທາງການຕື່ມ;
2. ໃຫ້ອົງການປົກຄອງເມືອງຊີ້ນໍາຫ້ອງການກະສິກໍາ ແລະ ປ່າໄມ້ເມືອງ ແຈ້ງໃຫ້ພາກສ່ວນກ່ຽວຂ້ອງ ແລະ ບໍລິສັດຜູ້ປະກອບການຮັບຊາບ ພ້ອມທັງແນະນໍາ, ອະທິບາຍທາງດ້ານວິຊາການໃຫ້ຜູ້ບໍລິໂພກເຂົ້າໃຈ ບໍ່ໃຫ້ມີຄວາມແຕກຕື່ນ ເຊິ່ງຈະມີຜົນກະທົບຕໍ່ການຜະລິດ ແລະ ບໍລິໂພກຊີ້ນສັດ (ງົວ-ຄວາຍ) ສ່ວນເຂດທີ່ບໍ່ເກີດການລະບາດພະຍາດແມ່ນສາມາດບໍລິໂພກໄດ້;
3. ໃຫ້ພະແນກກະສິກໍາ ແລະ ປ່າໄມ້ແຂວງ ຊີ້ນໍາຂະແຫນງລ້ຽງສັດ ແລະ ການປະມົງ ເປັນເຈົ້າການສົມທົບກັບພາກສ່ວນກ່ຽວຂ້ອງ ແລະ ພະນັກງານປະຈໍາຢູ່ຈຸດກວດກາ ເຄື່ອນໄຫວລາດຕະເວັນເປັນປົກກະຕິ ຖ້າກໍລະນີຍັງມີການຝ່າຝືນ ແລະ ກວດພົບເຫັນແມ່ນຈະຖືກປັບໃຫມຕາມລະບຽບການ.