ຫວຍພັດທະນາລາວ ຈະເພີ່ມການອອກເລກລາງວັນ ຫວຍ 12 ລາສີ ເພີ່ມຕື່ມສະເພາະວັນອັງຄານ ແລະ ພະຫັດ ລວມກັບຫວຍປົກກະຕິເປັນ 5 ມື້/ອາທິດ
ຫວຍພັດທະນາລາວ ຈະເພີ່ມການອອກເລກລາງວັນ ຫວຍ 12 ລາສີ ສະເພາະວັນອັງຄານ ແລະ ພະຫັດ ລວມກັບປົກກະຕິເປັນ 5 ມື້/ອາທິດ, ເພື່ອຫລຸດຜ່ອນການຊື້ຫວຍນອກລະບົບ, ເປັນການດຶງດູດເອົາເງິນສົດສ່ວນໜຶ່ງທີ່ຈໍລະຈອນໃນທ້ອງຕະຫລາດເຂົ້າສູ່ລະບົບການເງິນທະນາຄານຂອງລັດ, ສ້າງລາຍຮັບ ແລະ ພັນທະເຂົ້າງົບປະມານແຫ່ງລັດ.
ຫວຍພັດທະນາລາວ ໄດ້ມີການຈັດຕັ້ງອອກເລກລາງວັນ 3 ຄັ້ງ/ອາທິດ ໃນທຸກໆວັນຈັນ, ວັນພຸດ ແລະ ວັນສຸກ ມີໄລຍະຫ່າງກັນໜຶ່ງມື້ ເມື່ອທຽບໃສ່ກັບການອອກເລກລາງວັນຫວຍຂອງບາງປະເທດອ້ອມຂ້າງມີການອອກເລກລາງວັນທຸກໆມື້, ຫລາຍຄັ້ງ, ຫລາຍເວລາແຕກຕ່າງກັນ ເຊິ່ງເຮັດໃຫ້ກຸ່ມຄົນຈຳນວນໜຶ່ງ ສວຍໂອກາດນຳເອົາຜົນການອອກຫວຍຂອງປະເທດເຫລົ່ານັ້ນມາຊື້-ຂາຍຫວຍນອກລະບົບ ມີການໂຄສະນາທາງສື່ສັງຄົມອອນລາຍຕ່າງໆ ເພື່ອສ້າງຄວາມສົນໃຈໃຫ້ຜູ້ມັກສ່ຽງໂຊກ-ຊິງລາງວັນຫັນມາຊື້-ຂາຍຫວຍ ນອກລະບົບທີ່ບໍ່ໄດ້ຮັບອະນຸຍາດຕາມລະບຽບ-ກົດໝາຍ, ທີ່ຖືເອົາຜົນການອອກລາງວັນ ຂອງບໍລິສັດ ລັດວິສາຫະກິດ ຫວຍພັດທະນາ ແລະ ຜົນການອອກເລກລາງວັນຂອງຕ່າງປະເທດ ຊື້-ຂາຍປະປົນຢູ່ກັບຫວຍລັດທີ່ໄດ້ຮັບອະນຸຍາດຈາກລັດຖະບານຕາມລະບຽບ-ກົດໝາຍ ຊື່ງປະກົດການດັ່ງກ່າວ ເກີດຂຶ້ນໃນສັງຄົມແຜ່ລາມຢ່າງກວ້າງຂວາງ ຢູ່ພາຍໃນນະຄອນຫລວງວຽງຈັນ ແລະ ທົ່ວທຸກແຂວງ, ເມືອງ ແລະ ບ້ານ.
ເພື່ອຫລຸດຜ່ອນ, ຈໍາກັດໃນການຕີຖອຍຫວຍນອກລະບົບທີ່ບໍ່ຖືກຕ້ອງຕາມລະບຽບ-ກົດໝາຍ ທັງເປັນການສ້າງຄວາມເຂັ້ມແຂງໃຫ້ການສ້າງລາຍຮັບ ແລະ ພັນທະໃຫ້ລັດຫຼາຍຂຶ້ນ, ມີແຫລ່ງທຶນ ສະໜັບສະໜູນ ຊ່ວຍເຫລືອສັງຄົມຫລາຍຂຶ້ນ ແລະ ທັງເປັນການຈັດຕັ້ງຜັນຂະຫຍາຍວັດຖຸປະສົງກິດຈະການຫວຍພັດທະນາ ກໍຄືຂອງລັດຖະບານ ຕາມແຈ້ງການຂອງຫ້ອງວ່າການສໍານັກງານນາຍົກ ລັດຖະມົນຕີ ສະບັບເລກທີ 973/ຫສນຍ, ລົງວັນທີ 26 ພຶດສະພາ 2023 ແລະ ຂໍ້ຕົກລົງຂອງກະຊວງການເງິນ ສະນັບເລກທີ 1852/ກງ, ລົງວັນທີ 26 ມິຖຸນາ 2023 ໃຫ້ມີການທົດລອງພິມ- ຈໍາໜ່າຍຜະລິດຕະພັນຫວຍ 12 ລາສີເພີ່ມ ແລະ ເພີ່ມອອກເລກລາງວັນເປັນອັນສະເພາະໃນທຸກໆວັນອັງຄານ ແລະ ວັນພະຫັດ ຊ່ອງທາງການຈໍາຫນ່າຍຜ່ານເຄື່ອງຂາຍ POS ແລະ Application Insee Hub ເຊິ່ງເປັນທາງເລືອກໃຫມ່ຂອງຜູ້ມັກສ່ຽງໂຊກ-ຊິງລາງວັນ.
ຄຽງຄູ່ກັບການຈໍາໜ່າຍຫວຍ ເລກ 1 ໂຕ ຫາ 6 ໂຕ, ຫວຍຕໍາລາຝັນ 4/40 ແລະ ສະຫລາກພັດທະນາ 5/45 ໃນທຸກໆວັນຈັນ, ວັນພຸດ ແລະ ວັນສຸກ 3 ຄັ້ງ/ອາທິດ ຍັງຮັກສາການຈໍາໜ່າຍເປັນປົກກະຕິ.
