ເຈົ້າຄອງນະຄອນຫລວງ ເນັ້ນໃຫ້ ຮສສ ນວ ພັດທະນາກໍາລັງແຮງງານໃຫ້ແທດເໝາະກັບຄວາມຕ້ອງການຂອງຕະຫລາດແຮງງານ

ວັນທີ 11 ສິງຫາ 2023, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ວຽກງານແຮງງານ ແລະ ສະຫວັດດີການສັງຄົມ ຢູ່ພະແນກແຮງງານ ແລະ ສະຫວັດດີການສັງຄົມ ນະຄອນຫລວງວຽງຈັນ (ຮສສ ນວ).

ທ່ານ ສາລະພິດ ສູນວໍລະວົງ ຫົວໜ້າພະແນກ ຮສສ ນວ ລາຍງານວ່າ: ພະແນກ ຮສສ ນວ ໄດ້ເອົາໃຈໃສ່ຈັດຕັ້ງປະຕິບັດບັນດາ 14 ຄາດໝາຍສູ້ຊົນ ໃນປີ 2023, ມາຮອດປັດຈຸບັນສາມາດພັດທະນາສີມືແຮງງານໃຫ້ຜູ້ບໍ່ມີວິຊາຊີບ ຜູ້ຕ້ອງການປ່ຽນອາຊີບ, ຜູ້ວ່າງງານ, ສົ່ງເສີມການຈັດຫາວຽກເຮັດງານທໍາໃຫ້ແຮງງານທີ່ຕ້ອງການມີວຽກເຮັດງານທໍາໃຫ້ເຂົ້າສູ່ຕະຫລາດແຮງງານ ໂດຍຕິດພັນກັບວາລະແຫ່ງຊາດ, ຕັ້ງຈຸດຮັບສະໝັກງງານຢູ່ຫ້ອງການ ຮສສ 9 ຕົວເມືອງ, ໂຄສະນາເຜີຍແຜ່ກົດໝາຍວ່າດ້ວຍແຮງງານ ແລະ ລົງຕິດຕາມກວດກາບັນດາຫົວໜ່ວຍແຮງງານ, ພ້ອມທັງຊຸກຍູ້ຫົວໜ່ວຍແຮງງານສ້າງ ແລະ ປັບປຸງກົດລະບຽບພາຍໃນ, ຊຸກຍູ້ຫົວໜ່ວຍແຮງງານເຮັດສັນຍາແຮງງານ, ສ້າງຕັ້ງໜ່ວຍງານຄວາມປອດໄພ ແລະ ສຸຂະພາບແຮງງານໃນສະຖານທີ່ເຮັດວຽກ. ນອກນີ້, ຍັງໄດ້ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງານຄວາມດີໃນພາລະກິດປະຕິວັດຊາດປະຊາທິປະໄຕ ແລະ ຊ່ວຍເຫລືອຜູ້ອອກຢາເສບຕິດດ້ວຍການເຝິກອົບຮົມວິຊາຊີບ ແລະ ສ້າງໂອກາດມີວຽກເຮັດງານທໍາ.

ໂອກາດນີ້, ທ່ານ ເຈົ້າຄອງນະຄອນຫລວງ ໄດ້ໂອ້ລົມສະແດງຄວາມຍ້ອງຍໍຊົມເຊີຍຕໍ່ພະແນກ ຮສສ ນວ ໃນການຈັດຕັ້ງປະຕິບັດວຽກງານໄລຍະຜ່ານມາ, ພ້ອມທັງເນັ້ນໃຫ້ເອົາໃຈໃສ່ຈັດຕັ້ງເຜີຍແຜ່ເຊື່ອມຊຶມບັນດາກົດໝາຍ ດຳລັດ, ຂໍ້ກຳນົດ, ບົດແນະນຳ ແລະ ລະບຽບການຕ່າງໆ ກ່ຽວກັບວຽກງານ ຮສສ ເພື່ອໃຫ້ສັງຄົມຮັບຮູ້, ເຂົ້າໃຈສະເພາະດ້ານນີ້ເຫັນວ່າຍັງບໍ່ທັນກວ້າງຂວາງ ແລະ ຍັງບໍ່ທັນທົ່ວເຖິງກໍາລັງແຮງງານເປົ້າໝາຍທີ່ຢູ່ບັນດາຮາກຖານບ້ານເທື່ອ ການຕິດຕາມ, ກວດກາ, ການຄຸ້ມຄອງແຮງງານລາວ ແລະ ແຮງງານຕ່າງປະເທດ ຍັງບໍ່ທັນເອົາໃຈໃສ່ຄຸ້ມຄອງຢ່າງລະອຽດ ແລະ ເຂັ້ມງວດ, ຜູ້ໃຊ້ແຮງງານຈຳນວນໜຶ່ງຍັງບໍ່ປະຕິບັດຕາມລະບຽບກົດໝາຍ ເຮັດໃຫ້ມີຊ່ອງວ່າງຫລາຍດ້ານເກີດຂຶ້ນ. ສ່ວນການພັດທະນາຍົກລະດັບສີມືແຮງງານຍັງມີຈໍາກັດ, ບໍ່ມີຈຸດສຸມ, ການສ້າງກໍາລັງແຮງງານບາງດ້ານຍັງບໍ່ແທດເໝາະກັບຄວາມຕ້ອງການຂອງຕະຫລາດແຮງງານ, ການປະຕິບັດນະໂຍບາຍດ້ານຕ່າງໆ ຕໍ່ຜູ້ທີ່ມີຜົນງານຄວາມດີຕໍ່ປະເທດຊາດ ຍັງບໍ່ທັນຕອບສະໜອງໄດ້ຢ່າງທົ່ວເຖິງ, ການມີສ່ວນຮ່ວມຂອງສັງຄົມ ການເບິ່ງແຍງຊ່ວຍເຫລືອຄົນພິການ, ຜູ້ອາຍຸສູງ ຍັງບໍ່ທັນກວ້າງຂວາງ, ການຊ່ວຍເຫລືອບັນເທົາທຸກຜູ້ປະສົບເຄາະຮ້າຍຈາກໄພພິບັດດ້ານຕ່າງໆຍັງຊັກຊ້າ ແລະ ຜູ້ດ້ອຍໂອກາດໃນສັງຄົມ ຍັງບໍ່ທັນໄດ້ຮັບຄວາມເອົາໃຈໃສ່ເບິ່ງແຍງດູແລຢ່າງທົ່ວເຖິງເທົ່າທີ່ຄວນ.