ລິເວີພູລ ພ້ອມທຸ້ມເງິນທຸບສະຖິຕິໃໝ່ສະໂມສອນ ຊື້ຕົວ “ມອຍເຊສ ໄກເຊໂດ້” ແຂ່ງກັບເຊວຊີ ເຊິ່ງໄບຣຕັນຕັ້ງຄ່າຕົວໄວ້ທີ່ 100 ລ້ານປອນ

ສື່ດັງຕີຂ່າວ “ຫົງແດງ” ລິເວີພູລ ພ້ອມທີ່ຈະລ່າໂຕ ມອຍເຊສ ໄກເຊໂດ້ ແບັກເນື້ອຫອມ ໄບຣຕັນ ແຂ່ງກັບ ເຊວຊີ ດ້ວຍຈຳນວນເງິນເປັນສະຖິຕິໃໝ່ຂອງສະໂມສອນ.

ລິເວີພູລ ສະໂມສອນຍັກໃຫຍ່ຂອງ ພຣີເມຍລີກອັງກິດ ພ້ອມທີ່ຈະຈ່າຍເງິນຄ່າຕົວ ມອຍເຊສ ໄກເຊໂດ້ ກອງກາງຂອງ ໄບຣຕັນ ໃນລະດູຮ້ອນນີ້ ຕາມການລາຍງານຈາກ Sky Sports ສື່ກິລາຊັ້ນນຳຂອງເມືອງຜູ້ດີ. ໃນວັນພະຫັດທີ 10 ສິງຫາ ທີ່ຜ່ານມາ.

ເປັນທີ່ເຂົ້າໃຈກັນວ່າ ຕອນນີ້ ລິເວີພູລ ພ້ອມທີ່ຈະເປີດສຶກແຂ່ງກັບ ເຊວຊີ ແບບເຕັມຕົວໃນການຍາດລາຍເຊັນຂອງ ໄກເຊໂດ້ ໂດຍທີ່ ໄບຣຕັນ ຕັ້ງລາຄາໃຫ້ກັບ ດາວເຕະຊາວ ເອກົວດໍ ອາຍຸ 21 ປີ ຢູ່ທີ່ 100 ລ້ານປອນ.

ເຖິງວ່າບໍ່ມີການລະບຸຕົວເລກທີ່ແນ່ນອນ ແຕ່ຫລ້າສຸດ ສະກາຍ ສະປອດ ລາຍງານວ່າ “ຫົງແດງ” ພ້ອມແລ້ວທີ່ຈະລົງທຶນຊື້ ໄກເຊໂດ້ ດ້ວຍຈຳນວນເງິນສູງສຸດໃນປະຫວັດສາດສະໂມສອນ ຂະນະທີ່ ຟາບຣິຊິໂອ ໂຣມາໂນ້ ນັກຂ່າວບານເຕະຊື່ດັງ. ໄດ້ຢືນຢັນວ່າ ລິເວີພູລ ຍື່ນຊື້ແນ່ນອນ.