ຜູ້ສະໝັກປະທານາທິບໍດີເອກົວດໍ ຖືກຍິງເສຍຊີວິດລະຫວ່າງຫາສຽງ

ທ່ານ ເຟີນັນໂດ ວິລລາວິເຊນຊິໂອ ສະມາຊິກສະມັດຊາແຫ່ງຊາດເອກົວດໍ ແລະ ຜູ້ສະໝັກຊີງຕຳແໜ່ງປະທານາທິບໍດີຈາກພັກ Movimiento Construye ອາຍຸ 59 ປີ ຖືກຄົນຮ້າຍຍິງເສຍຊີວິດຫລັງຈາກທ່ານສຳເລັດພາລະກິດຫາສຽງຢູ່ເມືອງກີໂຕ ໃນຕອນຄໍ່າວັນທີ 9 ສິງຫາ ຕາມເວລາທ້ອງຖິ່ນ.

ສະມາຊິກຂອງທີມຫາສຽງກ່າວວ່າ: ໃນລະຫວ່າງທ່ານ ວິລລາວິເຊນຊິໂອ ກຳລັງຈະກ້າວຂຶ້ນລົດຫລັງສຳເລັດກິດຈະກຳ ໄດ້ມີຜູ້ຊາຍຄົນໜຶ່ງທີ່ຍ່າງມາໃກ້ ກ່ອນຈະກໍ່ເຫດຍິງເຂົ້າຫົວ ໂດຍພະຍານຜູ້ເຫັນເຫດການເລົ່າວ່າ: ທ່ານ ວິລລາເຊນຊິໂອ ຖືກຍິງທັງໝົດ 3 ນັດ.

ທ່ານ ກິລເຢໂມ ລັສໂຊ ປະທານາທິບໍດີເອກົວດໍ ໄດ້ອອກມາຢືນຢັນການເສຍຊີວິດຂອງທ່ານ ວິລລາວິເຊນຊິໂອ ຜ່ານທາງແພກຟອມ X ໂດຍທ່ານ ລັສໂຊ ກ່າວວ່າ: ທ່ານຮູ້ສຶກຄຽດແຄ້ນ ລະ ຊັອກຈາກເຫດການທີ່ເກີດຂຶ້ນ. ພ້ອມຢືນຢັນວ່າ: ຈະຕ້ອງລົງໂທດຜູ້ກະທຳຄວາມຜິດໃຫ້ໄດ້. ຂະນະທີ່ເອກົວດໍກຳລັງຈະເປີດຫີບເລືອກຕັ້ງຮອບໃໝ່ໃນວັນທີ 20 ສິງຫານີ້.

ສຳນັກຂ່າວ BBC ລາຍງານວ່າ: ເອກົວດໍຜະເຊີນອາດຊະຍາກຳຮຸນແຮງເພີ່ມຂຶ້ນ ເນື່ອງຈາກແກ້ງຄ້າຢາທີ່ມີອິດທິພົນໃນປະເທດ ໂດຍໃນການຫາສຽງທີ່ເກີດຂຶ້ນນັ້ນ ຜູ້ສະໝັກຊີງຕຳແໜ່ງປະທານາທິບໍດີຫລາຍທ່ານໄດ້ໃຫ້ຄຳໝັ້ນຈະແກ້ໄຂບັນຫາຢາເສບຕິດໃນປະເທດໃຫ້ເດັດຂາດ. ຂະນະທີ່ອາທິດຜ່ານມາ, ທ່ານ ວິລລາວິເຊນຊິໂອ ເຊິ່ງເປັນອະດີດນັກຂ່າວເກົ່າ ກ່າວວ່າ: ທ່ານ ແລະ ສະມາຊິກພັກຖືກຫົວໜ້າແກ້ງຄ້າຢາຂົ່ມຂູ່.

ໃນເວລາຕໍ່ມາ, ສຳນັກຂ່າວ Reuters ລາຍງານວ່າ: ຜູ້ຖືກສົງໄສທີ່ກໍ່ເຫດຍິງທ່ານ ວິລລາວິເຊນຊິໂອ ເສຍຊີວິດແລ້ວ ເນື່ອງຈາກອາການບາດເຈັບທີ່ເກີດຈາກການຍິງປະທະກັບເຈົ້າໜ້າທີ່ຮັກສາຄວາມປອດໄພ.

ພາບຈາກໂຊຊຽວມີເດຍເຜີຍແຜ່ໃຫ້ເຫັນໄລຍະວິນາທີເກີດເຫດ ໂດຍຫລັງຈາກສຽງປືນດັງຂຶ້ນ ຝູງຊົນທີ່ຢູ່ໃນບໍລິເວນດັ່ງກ່າວເກີດຄວາມແຕກຕື່ນ ຟ້າວແລ່ນຫລົບ ທ່າມກາງສຽງຮ້ອງຂອງຄົນປົນກັບສຽງປືນທີ່ດັງຕໍ່ເນື່ອງ.

ທັງນີ້, ຖ້າເບິ່ງຄະແນນນິຍົມຈາກການສຳຫລວດຄວາມຄິດເຫັນຂອງປະຊາຊົນໃນໄລຍະກ່ອນໜ້າ ຈະເຫັນວ່າຄະແນນສະໜັບສະໜູນຂອງທ່ານ ວິລລາວິເຊນຊິໂອ ຢູ່ລະດັບ 7,5% ສົ່ງຜົນໃຫ້ທ່ານເປັນຜູ້ສະໝັກປະທານາທິບໍດີທີ່ໄດ້ຮັບຄວາມນິຍົມສູງສຸດເປັນອັນດັບ 5 ຈາກຈຳນວນຜູ້ສະໝັກທັງໝົດ 8 ທ່ານ.

ອ້າງອີງ:

• https://www.bbc.com/news/world-latin-america-66457472
• https://www.reuters.com/world/americas/ecuadorean-candidate-villavicencio-killed-campaign-event-local-media-2023-08-10/