ສປປ ລາວ ກະກຽມການເປັນປະທານອາຊຽນ ໃນປີ 2024
ກອງປະຊຸມຄະນະກຳມະການ ຊີ້ນຳລະດັບຊາດ ເພື່ອທົບທວນຄືນຄວາມຄືບໜ້າໃນການຈັດຕັ້ງປະຕິບັດບັນດາໜ້າວຽກຂອງບັນດາອະນຸກໍາມະການ ໃນການກະກຽມ ແລະ ດຳເນີນການເປັນປະທານອາຊຽນ ຂອງ ສປປ ລາວ ໃນປີ 2024, ດຳເນີນໄປໃນວັນທີ 10 ສິງຫາ 2023 ທີ່ຫ້ອງວ່າການສຳນັກ ງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໃຫ້ກຽດເປັນປະທານ.
ກອງປະຊຸມຄັ້ງນີ້, ໄດ້ປຶກສາຫາລືກະກຽມດ້ານເນື້ອໃນ; ທີ່ພັກ ແລະ ພາຫະນະສຳລັບບັນດາປະມຸກລັດ, ຫົວໜ້າລັດຖະບານ ແລະ ຄະນະຜູ້ແທນ; ສະຖານທີ່ຈັດກອງປະຊຸມ; ອຸປະກອນຮັບໃຊ້ກອງປະຊຸມ; ການກະກຽມບຸກຄະລາກອນ; ແຜນງົບປະມານ ແລະ ການກະກຽມຄວາມພ້ອມດ້ານ ອື່ນໆ. ນອກນີ້, ຍັງໄດ້ຮັບຊາບຄວາມຄືບໜ້າໃນການກະກຽມ ຄຳຂວັນ, ກາໝາຍປະທານອາຊຽນ ແລະ ວີດີໂອສັ້ນ ການກະກຽມ ເພື່ອໄປຮັບການເປັນປະທານອາຊຽນ ຕໍ່ຈາກອິນໂດເນເຊຍ ໃນໂອກາດກອງປະຊຸມສຸດຍອດອາຊຽນ ຄັ້ງທີ 43 ແລະ ບັນ ດາກອງປະຊຸມສຸດຍອດອື່ນໆທີ່ກ່ຽວຂ້ອງ ທີ່ຈະຈັດຂື້ນ ແຕ່ ວັນທີ 4-7 ກັນຍາ 2023 ທີ່ ຈາກາກຕາ, ອິນໂດເນເຊຍ.
ທ່ານ ສອນໄຊ ສີພັນດອນ ໄດ້ເນັ້ນໃຫ້ ແຕ່ລະອະນຸກຳມະການ ສືບຕໍ່ດຳເນີນການກະກຽມບັນດາໜ້າວຽກຂອງຕົນດ້ວຍຄວາມເອົາໃຈໃສ່, ມີຄວາມຮັບຜິດຊອບສູງ ແລະ ຊຸກຍູ້ໃຫ້ບັນດາກະຊວງຂະ ແໜງການທີ່ຈະເປັນປະທານກອງປະຊຸມອາຊຽນໃນປີ 2024 ສືບຕໍ່ກະກຽມດ້ານເນື້ອໃນ, ດ້ານພາລາທິການ ແລະ ດ້ານອື່ນໆ ໃຫ້ມີຄວາມພ້ອມ ເພື່ອຮັບປະກັນຜົນສຳເລັດຂອງກອງປະຊຸມໃນຂະແໜງການ ເພື່ອເປັນພື້ນຖານໃຫ້ແກ່ກອງປະຊຸມສຸດຍອດອາຊຽນ ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ທີ່ຈະຈັດຂຶ້ນຢູ່ ສປປ ລາວ ໃນປີ 2024 ໃຫ້ໄດ້ຮັບຜົນສຳເລັດຢ່າງຈົບງາມ.
