ເຮືອຜູ້ອົບພະຍົບຂວ້ຳຢູ່ນອກຝັ່ງຂອງອິຕາລີ ມີຜູ້ເສຍຊີວິດ 41 ຄົນ
ມີຜູ້ເສຍຊີວິດ 41 ຄົນ ຈາກເຫດການເຮືອຜູ້ອົບພະຍົບຂວ້ຳກາງທະເລເມດິເຕລານຽນບໍ່ຫ່າງຈາກອິຕາລີ.
ວັນທີ 9 ສິງຫາ 2023, ສຳນັກຂ່າວຕ່າງປະເທດລາຍງານວ່າ: ສື່ທ້ອງຖິ່ນຫລາຍແຫ່ງຂອງອິຕາລີລາຍງານວ່າ: ເກີດເຫດເຮືອໂດຍສານລຳໜຶ່ງຂອງຜູ້ອົບພະຍົບຈາກອາຟຣິກາ ເດີນທາງມາຈາກຕູນິເຊຍ ຂວ້ຳກາງທະເລເມດິເຕລານຽນ ນອກຊາຍຝັ່ງເກາະລຳເປດູຊາ ທີ່ຢູ່ທາງຕາເວັນອອກສຽງໃຕ້ຂອງອິຕາລີ ສົ່ງຜົນໃຫ້ມີຜູ້ເສຍຊີວິດ 41 ຄົນ ແລະ ມີຜູ້ລອດຊີວິດ 4 ຄົນ ເປັນຊາວໄອວໍຣີໂຄດ ແລະ ຊາວກິນີ ກ່າວວ່າ: ຜູ້ໂດຍສານໃນເຮືອມີທັງໝົດ 45 ຄົນ ແລະ ມີເດັກນ້ອຍນຳ.
ກະຊວງປ້ອງກັນປະເທດຕູນິເຊຍລາຍງານວ່າ: ນັບແຕ່ຕົ້ນປີນີ້ ເຫດການເຮືອໂດຍສານຂອງຜູ້ອົບພະຍົບຂວ້ຳຫລາຍສິບຄັ້ງໃນທະເລເມດິເຕລານຽນນອກຊາຍຝັ່ງຕູນິເຊຍ ສົ່ງຜົນໃຫ້ມີຜູ້ເສຍຊີວິດລວມກັນຫລາຍກວ່າ 900 ຄົນແລ້ວ. ຂະນະດຽວກັນ ເຈົ້າໜ້າທີ່ຈາກໜ່ວຍງານຫລາຍແຫ່ງຮ່ວມກັນໃຫ້ການຊ່ວຍເຫລືອຜູ້ອົບພະຍົບໄດ້ຫລາຍກວ່າ 34.000 ຄົນ ສ່ວນຫລາຍມາຈາກທາງເໜືອຂອງທະວີບອາຟຣິກາ ແລະ ມີປາຍທາງຄືເກາະລຳເປດູຊາຂອງອິຕາລີ ເຊິ່ງຢູ່ຫ່າງຈາກຕູນິເຊຍພຽງ 130 ກິໂລແມັດ.
ສ່ວນລາຍງານໂດຍອົງການສາກົນເພື່ອການຍົກຍ້າຍຖິ່ນຖານ (IOM) ລະບຸວ່າ: ພື້ນທີ່ທາງຕອນກາງຂອງທະເລເມດິເຕລານຽນ ຄືເສັ້ນທາງອົບພະຍົບທາງເຮືອອັນຕະລາຍທີ່ສຸດໃນໂລກ ໂດຍມີຜູ້ເສຍຊີວິດໃນບໍລິເວນນີ້ຫລາຍກວ່າ 20.000 ຄົນ ນັບແຕ່ປີ 2014.
