WHO ປະກາດເຕືອນທົ່ວໂລກລະວັງຢາດີຫວັດ ປົນເປື້ອນສານພິດທີ່ຜະລິດຢູ່ອິນເດຍ
ອົງການອະນາໄມໂລກ (WHO) ອອກປະກາດເຕືອນທົ່ວໂລກກ່ຽວກັບຢາດີຫວັດທີ່ຜະລິດຢູ່ອິນເດຍ ແລະ ຈຳໜ່າຍໃນອີຣັກວ່າ ມີການປົນເປື້ອນຂອງສານເຄມີເປັນພິດ.
WHO ລະບຸໃນວັນທີ 7 ສິງຫາວ່າ: Cold Out ເຊິ່ງເປັນຢາດີຫວັດຊະນິດນ້ຳທີ່ມັກໃຊ້ກັບເດັກຊຸດໜຶ່ງທີ່ຜະລິດຂຶ້ນໃນປີຜ່ານມານັ້ນ ມີຄວາມບໍ່ປອດໄພ ແລະ ການໃຊ້ຢານັ້ນອາດສົ່ງຜົນເຮັດໃຫ້ເກີດຄວາມເຈັບປ່ວຍຮ້າຍແຮງ ຫລື ເສຍຊີວິດໄດ້.
ຢາດີຫວັດດັ່ງກ່າວມີສານໄດເອທິລີນໄກຄໍ (DEG) 0,25% ແລະ ເອທິລີນໄກຄໍ (EG) 2,1%. ຂະນະທີ່ປະລິມານການນຳໃຊ້ທີ່ປອດໄພຂອງສານທັງ 2 ຊະນິດນີ້ຕ້ອງບໍ່ເກີນ 0,01%.
ການປະກາດດັ່ງກ່າວເປັນການເຕືອນຄັ້ງທີ 6 ໂດຍ WHO ໃນປີຜ່ານມາກ່ຽວກັບຢານ້ຳທີ່ປົນເປື້ອນຕົວທຳລະລາຍທີ່ເປັນພິດຂອງອຸດສາຫະກຳ. ເຖິງຢ່າງໃດກໍຕາມ, ທາງການອີຣັກບໍ່ໄດ້ລາຍງານອາການປ່ວຍໃດໆທີ່ກ່ຽວຂ້ອງກັບຢາ Cold Out, ແຕ່ກະຊວງສາທາລະນະສຸກອີຣັກລະບຸໃນອາທິດຜ່ານມາວ່າ: ຢາດັ່ງກ່າວບໍ່ຜ່ານການທົດສອບຂອງທາງການ ແລະ ຜະລິດຕະພັນທີ່ໝູນວຽນຢູ່ໃນຕະຫລາດກຳລັງຖືກສັ່ງຢຶດ.
ພະຍາດລະບາດທີ່ກ່ຽວຂ້ອງກັບຢານ້ຳທີ່ເຈືອປົນສານພິດຢູ່ອິນໂດເນເຊຍ, ແກມເບຍ, ອຸສເບກິດສະຖານ ແລະ ແຄເມີຣູນນັ້ນ ໄດ້ຂ້າຊີວິດເດັກໄປແລ້ວປະມານ 300 ຄົນໃນປີຜ່ານມາ.
ຂະນະທີ່ໜ່ວຍງານເບິ່ງແຍງຂອງອິນເດຍໄດ້ສັ່ງຍົກເລີກໃບອະນຸຍາດການຜະລິດຂອງບໍລິສັດແມຣຽນ ໄບໂອເທັກ ເຊິ່ງໄດ້ສົ່ງອອກຢານ້ຳດັ່ງກ່າວໄປອຸສເບກິດສະຖານ ແລະ ໄດ້ຈັບກຸມພະນັກງານບາງສ່ວນຂອງບໍລິສັດດັ່ງກ່າວແລ້ວ.
