75% ຂອງເດັກນ້ອຍໃນອາຊີໃຕ້ ປະເຊີນຄວາມສ່ຽງຈາກອາກາດຮ້ອນ
ສະຫະປະຊາຊາດ (UN) ກ່າວເຕືອນວ່າ: 3 ໃນ 4 ຂອງເດັກໃນພາກພື້ນອາຊີໃຕ້ ກຳລັງປະເຊີນອຸນຫະພູມສູງຈົນເປັນອັນຕະລາຍ ເຊິ່ງເປັນລະດັບສູງສຸດທົ່ວໂລກ ອັນມາຈາກຜົນກະທົບຂອງການປ່ຽນແປງສະພາບອາກາດທີ່ຮຸນແຮງຂຶ້ນຢ່າງຕໍ່ເນື່ອງ.
ວັນທີ 8 ສິງຫາ 2023, ສຳນັກຂ່າວຕ່າງປະເທດລາຍງານວ່າ: ກອງທຶນເພື່ອເດັກແຫ່ງສະຫະປະຊາຊາດ (ອຸຍນິເຊັບ) ລະບຸວ່າ: ເດັກປະມານ 460 ລ້ານຄົນ ຕ້ອງຜະເຊີນສະພາບອາກາດຮ້ອນອົບເອົ້າໃນອາຊີໃຕ້ ຫລື ປະມານ 76% ຂອງເດັກໃນພາກພື້ນ ເມື່ອທຽບໃສ່ຈຳນວນ 1 ໃນ 3 ຂອງເດັກນ້ອຍທົ່ວໂລກ.
“ໂລກກຳລັງເຂົ້າສູ່ສະພາບໂລກເດືອດ ແລະ ຂໍ້ມູນສະແດງໃຫ້ເຫັນຢ່າງຈະແຈ້ງວ່າ: ຊີວິດ ແລະ ການເປັນຢູ່ຂອງເດັກຫລາຍລ້ານຄົນທົ່ວອາຊີໃຕ້ ຖືກຄຸກຄາມເພີ່ມຂຶ້ນໂດຍຄື້ນຄວາມຮ້ອນ ແລະ ອຸນຫະພູມສູງ” ທ່ານ ຊານເຈ ວິເຈຊິເກຣາ ຜູ້ອຳນວຍການອຸຍນິເຊັບປະຈຳພາກພື້ນອາຊີໃຕ້ ກ່າວ.
ນອກຈາກນີ້, UN ຍັງເຕືອນວ່າ: ເດັກຢູ່ອັບການິດສະຖານ, ບັງກະລາເດັດ, ອິນເດຍ, ມັລດີບ ແລະ ປາກິດສະຖານ “ມີຄວາມສ່ຽງສູງ” ຕໍ່ຜົນກະທົບຂອງການປ່ຽນແປງສະພາບອາກາດ. ພ້ອມລະບຸວ່າ: ຈຳນວນວັນທີ່ມີອຸນຫະພູມສູງຫລາຍກວ່າ 35 ອົງສາໃນ 1 ປີ ມີ 83 ວັນຂຶ້ນໄປ.
ທ່ານ ວິເຈຊິເກຣາ ກ່າວອີກວ່າ: ເດັກບໍ່ສາມາດປັບຕົວໄດ້ໄວເທົ່າການປ່ຽນແປງຂອງອຸນຫະພູມ ແລະ ບໍ່ສາມາດກຳຈັດຄວາມຮ້ອນສ່ວນເກີນອອກຈາກຮ່າງກາຍໄດ້ ເຊິ່ງຖ້າບໍ່ມີການດຳເນີນການໃນຕອນນີ້ ເດັກເຫລົ່ານີ້ຈະຍັງປະເຊີນຄື້ນຄວາມຮ້ອນທີ່ເກີດຫລາຍຂຶ້ນ ແລະ ຮຸນແຮງຍິ່ງຂຶ້ນໃນອະນາຄົດ.
ນັບແຕ່ທ້າຍປີ 1800 ໂລກຮ້ອນຂຶ້ນປະມານ 1,2 ອົງສາ ເຊິ່ງການເຜົາໄໝ້ເຊື້ອໄຟຟໍຊິລເຮັດໃຫ້ຄື້ນຄວາມຮ້ອນຮ້ອນຂຶ້ນ, ຢູ່ດົນຂຶ້ນ ແລະ ເກີດຂຶ້ນເລື້ອຍ ລວມທັງເພີ່ມຄວາມຮຸນແຮງຂອງສະພາບອາກາດອື່ນໆເຊັ່ນ: ພາຍຸ ແລະ ອຸທົກກະໄພ ເຊິ່ງບັນດານັກວິທະຍາສາດກ່າວວ່າ: ມົນລະພິດກາກບອນຈະຕ້ອງຫລຸດລົງຫລາຍໃນທົດສະວັດນີ້ ເພື່ອຫລີກລ່ຽງສະພາບການທີ່ຮ້າຍແຮງກວ່າເກົ່າໃນອະນາຄົດ.
