ໄຂ້ເລືອດອອກລະບາດໜັກຢູ່ບັງກະລາເທດ ຮ້າຍແຮງສຸດເປັນປະຫວັດສາດ

ບັງກະລາເທດກຳລັງຕໍ່ສູ້ກັບການລະບາດຂອງພະຍາດໄຂ້ເລືອດອອກ ຄັ້ງຮ້າຍແຮງເປັນປະຫວັດສາດ ເຊິ່ງໂຮງໝໍຫລາຍແຫ່ງປະສົບບັນຫາໃນການຫາເນື້ອທີ່ໃຫ້ຜູ້ຕິດເຊື້ອ ທ່າມກາງເຊື້ອໄວຣັສເດງກີທີ່ແພ່ກະຈາຍຢ່າງວ່ອງໄວ.

ວັນທີ 7 ສິງຫາ 2023, ສຳນັກຂ່າວ AFP ລາຍງານວ່າ: ຕົວເລກຢ່າງເປັນທາງການເປີດເຜີຍໃຫ້ເຫັນວ່າ: ບັງກະລາເທດມີຜູ້ເສຍຊີວິດຈາກພະຍາດໄຂ້ເລືອດອອກແລ້ວຢ່າງໜ້ອຍ 293 ຄົນໃນປີນີ້ ແລະ ມີຜູ້ຕິດເຊື້ອອີກເກືອບ 61.500 ຄົນ ສົ່ງຜົນໃຫ້ປີນີ້ເປັນປີທີ່ມີຜູ້ເສຍຊີວິດຫລາຍທີ່ສຸດ ນັບແຕ່ເກີດການລະບາດຄັ້ງທຳອິດໃນປະເທດ ໃນປີ 2000.

ເຈົ້າໜ້າທີ່ສາທາລະນະສຸກຂອງບັງກະລາເທດ ລະບຸວ່າ: ໂຮງໝໍຫລາຍແຫ່ງ ໂດຍສະເພາະໃນນະຄອນຫລວງທາກາຕ່າງປະສົບຄວາມລຳບາກໃນການຫາເນື້ອທີ່ຮອງຮັບຜູ້ຕິດເຊື້ອຈຳນວນຫລາຍ ເຊິ່ງມີໄຂ້ສູງ, ປວດຕາມຂໍ້ ແລະ ຮາກ.

ທ່ານ ຊາຮິດ ມາເລກ ຮອງລັດຖະມົນຕີກະຊວງສາທາລະນະສຸກບັງກະລາເທດ ກ່າວວ່າ: ລັດຖະບານດຳເນີນໂຄງການຕ່າງໆ ເພື່ອຈຳກັດການແພ່ກະຈາຍຂອງພະຍາດທີ່ມີຍຸງລາຍເປັນພາຫະແລ້ວ ນັບແຕ່ການປຸກລະດົມສ້າງຄວາມເນັ້ນໜັກຈົນເຖິງຄວາມພະຍາຍາມໃນການຂ້າໜອນນ້ຳຍຸງລາຍ ຫລັງເກີດຝົນຕົກໜັກ.

ພະຍາດໄຂ້ເລືອດອອກທີ່ເກີດຈາກເຊື້ອເດງກີ ບໍ່ມີວັກຊີນ ຫລື ຢາທີ່ໃຊ້ໃນການປິ່ນປົວໂດຍສະເພາະ ເຊິ່ງພະຍາດດັ່ງກ່າວພົບໄດ້ທົ່ວໄປໃນພາກພື້ນອາຊີໃຕ້ ຊ່ວງລະດູມໍລະສຸມລະຫວ່າງເດືອນມິຖຸນາ-ກໍລະກົດ ເມື່ອຍຸງລາຍບ້ານຂະຫຍາຍພັນຕາມແຫລ່ງນ້ຳຈົນມີຈຳນວນຫລາຍ.